ព័ត៌មានអន្តរជាតិ៖បើយោងតាមទីភ្នាក់ងារសារព័ត៌មានវៀតណាមដែលបានចុះផ្សាយកាលពីរសៀលថ្ងៃទី៣០ខែមករាឆ្នាំ២០២០បានឱ្យដឹងថាអាជ្ញាធរអាកាសចរណ៍ស៊ីវិលនៃប្រទេសវៀតណាមបានសម្រេចផ្អាករាល់ជើងហោះហើរទាំងអស់ដែលឆ្ពោះទៅនិងមកពីបណ្តាតំបន់ដែលរងការវាយប្រហារខ្លាំងដោយសារវីរុសកូរ៉ូណាប្រភេទថ្មីនៅប្រទេសចិន។ សូមបញ្ជាក់ផងដែរថា បើគិតត្រឹមថ្ងៃព្រហស្បតិ៍នេះ តំបន់និងខេត្តទាំងអស់នៅក្នុងប្រទេសចិន សុទ្ធតែមានករណីឆ្លងវីរុសកូរ៉ូណាប្រភេទថ្មីខណៈខេត្តHubeiមានចំនួនច្រើនខ្លាំងជាងគេព្រោះទីក្រុងWuhanដែលប្រភពដើមនៃការផ្ទុះវីរុសស្ថិតនៅទីនោះ។បើតាមអាជ្ញាធរចិនអ្នកឆ្លងវីរុសកូរ៉ូណាថ្មីនៅចិនបានកើនដល់៧.៧១១នាក់នាក់និងបានផ្តាច់ជីវិតមនុស្ស១៧០នាក់ហើយ។ ក្រៅពីការផ្អាកជើងហោះហើរជាមួយបណ្តាតំបន់រងការវាយប្រហារដោយវីរុសនៅចិនអាជ្ញាធរអាកាសចរណ៍ស៊ីវិលវៀតណាមកំពុងតែបន្តការត្រួតពិនិត្យអ្នកដំណើរនានាដែលចូលមកដល់ប្រទេសវៀតណាម។ករណីអ្នកផ្ទុកវីរុសកូរ៉ូណាប្រភេទថ្មី(2019nCoV)នៅវៀតណាមនៅមិនទាន់មានការកើនឡើងនោះឡើយគឺនៅ០២ករណីដដែលហើយសុទ្ធតែជាជនជាតិចិនពុំមានជនជាតិវៀតណាមណាម្នាក់បានឆ្លងទេ។ ដោយឡែកបើតាមសម្តេចតេជោហ៊ុនសែននាយករដ្ឋមន្ត្រីបានបញ្ជាក់មិនមានបិទជើងហោះហើរតាមអាកាសតាមកប៉ាល់ទឹកតាមផ្លូវគោកពីចិនមកកម្ពុជាស្របពេលដែលមានការរីករាលដាលនៃវីរុសកូរ៉ណាថ្មី។ក្នុងនោះសម្តេចតេជោ ហ៊ុន សែន បានលើកឡើងនៅហេតុផលចំនួន៥ ចំណុច៖ ទី១. ចិនជាដៃគូវិនិយោគ ពាណិជ្ជកម្ម និងទេសចដែលបានធ្វើអោយកំណើនសេដ្ឋកិច្ចជាតិរីកចម្រើន, ទី២.ពលរដ្ឋខ្មែរនិងពាណិជ្ជករខ្មែរទទួលបាននូវការងារនិងផលប្រយោជន៍វិនិយោគច្រើនពីទំនាក់ទំនងល្អរវាងចិនកម្ពុជា,ទី៣.មានសិស្សនិងនិស្សិតខ្មែរជាច្រើនដែលទទួលបានអាហារូបករណ៍កំពុងសិក្សានិងរស់នៅក្នុងប្រទេសចិន,ទី៤.មានការដឹកជញ្ជូនផ្លាស់ប្តូរទំនិញជាច្រើននាំចេញនិងនាំចូលមកកម្ពុជាដែលកំពុងបម្រើការទីផ្សារនិងទី៥.ទំនាក់ទំនងល្អរវាងកម្ពុជា-ចិនកំពុងស្ថិតនៅក្នុងភាពជាដៃគូយុទ្ឋសាស្ត្រគ្រប់ជ្រុងជ្រោយ។ គួរជម្រាបថាគិតត្រឹមថ្ងៃពុធសប្តាហ៍នេះវៀតណាមមានករណីសង្ស័យចំនួន៦៤នាក់ដែលអ្នកទាំងនោះបានបង្ហាញរោគសញ្ញាគ្រុនក្តៅ និង ក្អក ហើយសុទ្ធតែបានធ្វើដំណើរមកពីតំបន់នៅប្រទេសចិន ដែលរងការវាយប្រហារដោយវីរុស។ ក្នុងចំណោមនោះ ៣៩នាក់ កំពុងបន្តស្ថិត ក្រោមការតាមដាន និងរង់ចាំលទ្ធផលធ្វើតេស្ត។ សម្រាប់ជនជាតិចិនទាំងពីរនាក់នៅវៀតណាមដែលត្រូវបានពិនិត្យរកឃើញថាមានផ្ទុកវីរុសកូរ៉ូណាប្រភេទថ្មីនាពេលកន្លងទៅនេះគឺម្នាក់បានជាសះស្បើយវិញហើយខណៈម្នាក់ទៀតកំពុងបន្តទទួលការព្យាបាលនៅឡើយ។ ដោយឡែកកាលពីព្រឹកមិញថ្ងៃទី៣០ខែមករាឆ្នាំ២០២០នៅវិមានសន្តិភាពក្នុងពេលអញ្ជើញថ្លែងសន្និសីទសារព័ត៌មានអំពីជំងឺរលាកផ្លូវដង្ហើមថ្មីកូរ៉ូណា(Coronavirus)សម្តេចតេជោហ៊ុនសែននាយករដ្ឋមន្ត្រីបានជម្រាបជូនបងប្អូនជនរួមជាតិទូទាំងប្រទេសអោយបានជ្រាបថាមកទល់ថ្ងៃនេះគឺពុំមានប្រជាពល ដ្ឋខ្មែរណាម្នាក់ឆ្លងជំងឺផ្លូវដង្ហើមថ្មីកូរ៉ូណា (Coronavirus) នេះទេ៕
