ប៉ៃលិន៖រយៈពេលចុងក្រោយនេះហាងឆេងបន្លែសណ្តែកកួរបានធ្លាក់ចុះបន្តិចធ្វើឱ្យប្រជាកសិករអ្នកដាំលក់មិនសូវចំណេញ។អ្នកស្រីសុខភាពមានវ័យ៥០ឆ្នាំជាកសិកររស់នៅភូមិអូរតាពុកក្រោមសង្កាត់ទួលល្វាក្រុងប៉ៃលិនខេត្តប៉ៃលិន។
កាលពីនៅថ្ងៃទី១១ខែសីហាឆ្នាំ២០២០នេះអ្នកស្រីបានរៀបរាប់ឱ្យដឹងថា៖ការប្រកាន់យកមុខរបរដាំដុះបន្លែផ្សេងៗរួមទាំងការដំណាំបន្លែសណ្តែកកួរដំណាក់កាលបច្ចុប្បន្នបានប្រឈមនិងបញ្ហាសត្វចង្រៃបំផ្លាញមិនសូវហុចផលល្អ។រយៈពេលចុងក្រោយនេះទៀតសោតហាងឆេងសណ្តែកក៏បានធ្លាក់ទាបជាងឆ្នាំកន្លងមកដែរធ្វើឱ្យអ្នកស្រីមិនចំណេញស្ទើរតែដាច់ប្រាក់ដើម។
កសិកររូបនេះបានបន្តថាៈបន្លែសណ្តែកកួរដាំដុះក្នុងរយៈពេល៦សប្តាហ៍ចាប់ផ្តើមប្រមូលផលបានបណ្តើរៗ។វាបានធ្លាក់ថ្លៃចាប់តាំងពីដើមខែកក្កដាមកលក់បានត្រឹមតែតម្លៃ៨០០រៀលប៉ុណ្ណោះក្នុង១គីឡូក្រាម។ថ្មីៗនេះនៅក្នុងអំឡុងខែសីហាសណ្តែកឡើងថ្លៃបន្តិចវិញលក់បាន១.៥០០រៀលក្នុង១គីឡូក្រាម។
ទោះជាបែបនេះក្តីក៏មិនអាចទូទាត់ចំណេញបានឡើយបើគិតថ្លៃប្រាក់ដើមទិញពូជ ថ្លៃជួលដីដាំដុះ។ឆ្នាំកន្លងទៅឈ្មួញបញ្ជាទិញសណ្តែកកួរក្នុង១គីឡូក្រាមលក់តម្លៃពី៣.៥០០ទៅ៤.០០០រៀលដែលអាចធ្វើឱ្យគាត់ទទួលបានប្រាក់ចំណេញខ្លះសម្រាប់ទ្រទ្រង់ជីវភាពគ្រួសារ។
លោកស្រីបន្ថែមថាៈឆ្នាំនេះតម្លៃឈ្នួលដីដាំដុះមិនខុសពីឆ្នាំមុនឡើយចំនួន៥០ម៉ឺនរៀលក្នុងមួយឆ្នាំ។ លោកស្រីកាប់កាយជាថ្នាលដាំបានចំនួន៣២រងដាំដុះដោយប្រកាន់ជំហរមិនប្រើថ្នាំគីមីឡើយគឺនាំឱ្យប៉ះពាល់ដល់សុខមាលភាពរបស់អតិថិជនអ្នកទទួលទាន៕ខុម
រូបថត:ម្ចាស់ចម្ការសណ្តែកកួរកំពុងប្រមូលផលក្នុងមូលដ្ឋានភូមិអូរតាពុកក្រោម
