ភ្នំពេញ៖ដើម្បីកាត់បន្ថយនូវការកកស្ទះចរាចរណ៍នៅក្នុងតំបន់នៃខណ្ឌសែនសុខខណ្ឌឫស្សីកែវនិងខណ្ឌព្រែកព្នៅរដ្ឋបាលរាជធានីភ្នំពេញគ្រោងនឹងបើកការដ្ឋានស្ថាបនាមហាវិថីថ្មីមួយខ្សែដែលមានទទឹង៣០ម៉ែត្រ និងបណ្តោយផ្លូវជាង៥គីឡូម៉ែត្រ។ដោយចាប់ពីផ្លូវលេខ១០០៣ ផ្លូវបត់ចូលផ្សារទំនើបអ៊ីអន ម៉លសែនសុខស្របប្រឡាយមេខាងជើងរាជធានីភ្នំពេញរហូតដល់មហាវិថីឈ្នះឈ្នះក្នុងខណ្ឌឫស្សីកែវ តភ្ជាប់ទៅខណ្ឌព្រែកព្នៅ ។
លោកសាំ ពិសិដ្ឋ ប្រធានមន្ទីរសាធារណការនិងដឹកជញ្ជូនរាជធានីភ្នំពេញ បានបញ្ជាក់ឱ្យដឹងនៅថ្ងៃទី ៤ខែកញ្ញាឆ្នាំ២០២០នេះថាៈរដ្ឋបាលរាជធានីភ្នំពេញមានគម្រោងនឹងបើកការដ្ឋានស្ថាបនាមហាវិថីមួយខ្សែនៅសប្តាហ៍ក្រោយនេះ។មហាវិថីនេះមានប្រវែង៥.៨៦០ម៉ែត្រទទឹង៣០ម៉ែត្រជាប្រភេទផ្លូវបេតុងមានសួនច្បារកណ្តាល២ម៉ែត្រផ្លូវ១២ម៉ែត្រសងខាងដែលអាចឱ្យរថយន្តធ្វើចរាចរណ៍បាន៣គន្លងទៅ៣គន្លងមកមាន១គន្លងទៅមកសម្រាប់ម៉ូតូមានចិញ្ចើមផ្លូវសងខាង២ម៉ែត្រសម្រាប់អ្នកថ្មើជើងជាមួយនឹងការដាក់លូសង្ខាងផ្លូវទំហំ៨តឹក។
លោកសាំ ពិសិដ្ឋ បានបញ្ជាក់ផងដែរថា៖ បើមិនមានការប្រែប្រួលទេ នៅដើមសប្តាហ៍ក្រោយនេះ លោក ឃួង ស្រេង អភិបាលរាជធានីភ្នំពេញ នឹងអញ្ជើញជាអធិបតីភាព ក្នុងពិធីបើកការដ្ឋាន ហើយការដ្ឋាននេះនឹងស្ថាបនារួចរាល់ក្នុងរយៈពេល៦ខែទៀត។
ក្រោយការស្ថាបនារួចរាល់កំណាត់មហាវិថីនេះនឹងកាត់បន្ថយការកកស្ទះចរាចរនៅតំបន់ភាគខាងជើងរាជធានីភ្នំពេញ ស្របប្រឡាយមេខាងជើងរាជធានីភ្នំពេញ ចាប់ពីផ្លូវលេខ ១០០៣ ផ្លូវបត់ចូលផ្សារទំនើបអ៊ីអន ម៉ល សែនសុខដល់មហាវិថី ឈ្នះ ឈ្នះ ក្នុងខណ្ឌឫស្សីកែវ៕វណ្ណា