ភ្នំពេញៈអ្នកនាំពាក្យក្រសួងសុខាភិបាលលោកស្រីឱវណ្ណឌីនបានបញ្ជាក់ប្រាប់រស្មីកម្ពុជានៅយប់ថ្ងៃទី១៤ខែកញ្ញានេះថាការវិភាគវត្ថុសំណាកដែលទទួលបានពីមន្ទីរពិសោធន៌នៃវិទ្យាស្ថានប៉ាស្ទ័រកម្ពុជានាល្ងាចថ្ងៃទី១៤ខែកញ្ញា ឆ្នាំ២០២០បានបង្ហាញ លទ្ធផលអវិជ្ជមានវីរុសកូវីដ-១៩ ទាំង២១អង្គនាក់ ។
លោកស្រី ឱ វណ្ណឌីន បានបញ្ជាក់ទៀតថា ក្នុងចំណោមព្រះសង្ឃ ៤៦នាក់ គង់នៅវត្ត ស្វាយដង្គំ ស្រុកឯកភ្នំ ខេត្តបាត់ដំបង ដែលប្រពាធរោគនោះ គឺ ជាករណីជំងឺផ្តាសាយធំ ។
អ្នកនាំពាក្យក្រសួងសុខាភិបាលបានឱ្យដឹងថាកាលថ្ងៃទី១៣ខែកញ្ញាឆ្នាំ២០២០ក្រសួងសុខាភិបាលបានទទួលរបាយការណ៍ថាមានហេតុការណ៌ករណីសង្ស័យគ្រុនផ្តាសាយធំបានកើតឡើងចំពោះក្រុមព្រះសង្ឃចំនួន ៤៦នាក់ ដែលគង់នៅវត្ត ស្វាយដង្គំ ស្រុកឯកភ្នំ ខេត្តបាត់ដំបង ដែលនិមន្តមកពីតាមខេត្តនានា ដើម្បីសិក្សានៅសាលាពុទ្ធិកបឋមសិក្សានៅក្នុងវត្តនេះ ។
មានព្រះអាការ:រោគដូចជា ក្តៅខ្លួន លើសពី៣៧,៥ អង្សារសេ ក្អក និងហៀរសំបោរ។ហេតុការណ៍នេះ បានកើតមានឡើងចំនួន ៥-៦ថ្ងៃមកហើយ ដែលមានព្រះសង្ឃប្រហែលជាងពាក់កណ្តាលនៃចំនួនខាងលើបានជាសះស្បើយ បន្ទាប់ពីបានទទួលការព្យាបាលពីក្រុមគ្រូពេទ្យខេត្តបាត់ដំបង។
ព្រះសង្ឃដែលនៅមានរោគសញ្ញាសង្ស័យ ក្រុមគ្រូពេទ្យខេត្តបាត់ដំបង បានយកវត្ថុសំណាកព្រះសង្ឍចំនួន ២១អង្គនាក់ ផ្ញើរទៅធ្វើវិភាគនៅវិទ្យាស្ថានប៉ាស្ទ័រកម្ពុជានាព្រឹកថ្ងៃទី១៤ ខែកញ្ញា ឆ្នាំ២០២០ ។មន្ទីរសុខាភិបាលខេត្តបាត់ដំបង ក៏បានអប់រំណែនាំព្រះសង្ឃលោកតាអាចារ្យវត្ត និងគណគ្រប់គ្រងសាលាពុទ្ធិក:នៅទីនោះ រួចហើយដែរ។ បច្ចុប្បន្ននេះ ស្ថានភាពសុខភាពព្រះសង្ឍដែលឈឺនោះ មានការវិវត្តទៅរកភាពល្អប្រសើរហើយ ដោយការសន្និដ្ឋានបថមពីក្រុមគ្រូពេទ្យគឺសង្ស័យជំងឺគ្រុនផ្តាសាយធំ។
ដោយសារមានការសង្កេតកន្លងមកនេះឃើញថានៅមានការខ្វះចន្លោះក្នុងការអនុវត្តវិធានការសុខាភិបាលក្នុងអំឡុងពេលកាន់បិណ្ឌ និងបុណ្យភ្ជុំបិណ្ឌនេះ ក្នុងនាមក្រសួងសុខាភិបាល សូមអំពាវនាវក្រើនរំលឹកសារជាថ្មី ដល់បងប្អូនប្រជាលរដ្ឋទាំងអស់ ។
ជាពិសេស លោកតាអាចារ្យ លោកតា-យាយជីគណៈគ្រប់គ្រងសាលាពុទ្ធិកៈនិងគណ:កម្មការគ្រប់គ្រងទីវត្តអារ៉ាមនៅទូទាំងប្រទេស ព្រមទាំងពុទ្ធបរិស័ទ្ធទាំងអស់ ត្រូវបន្តអនុវត្តនូវវិធានការអនាម័យការពារខ្លួន ពីការចម្លងវីរុសកូវីដ-១៩ ការចម្លងគរុនផ្តាសាយធំ និងការចម្លងជំងឺឆ្លងផ្សេងៗទៀត ដោយអនុវត្តវិធានការការសាមញ្ញៗដូចតទៅ៖
១. រក្សាអនាម័យដៃស្អាតជានិច្ច ដោយលាងសម្អាតដៃញឹកញាប់ និងកុំយកដៃដែល មិនទាន់បានលាងសម្អាត ទៅប៉ះផ្ទៃមុខ មាត់ ឫច្រមុះ និងត្រូវឆាន់ ឫពិសារទឹក ក្តៅដាំពុះ និងចង្ហាន់ ឫម្ហូបអាហារត្រូវចម្អិនឲ្យបានឆ្អិនល្អ ។២. ពាក់ម៉ាស់ ក្នុងករណីចាំបាច់ ជាពិសេសត្រូវពាក់ម៉ាស់ជាចាំបាច់ នៅពេលចូលទៅកាន់ទីវត្តអារ៉ាម ជួបជុំពុទ្ធបរិស័ទ មិនត្រូវជួបជុំគ្នាទ្រង់ទ្រាយធំ (ការប្រគេនចង្ហាន់ និងទេយ្យវត្ថុ ត្រូវធ្វើក្នុងក្រុមតូចៗ ទៅតាមក្រុមគ្រួសារនិមួយៗ) និងពេលសម្តែងព្រះធ៌ម
៣. រក្សាគម្លាតសុវត្ថិភាពបុគ្គលយ៉ាងតិចចម្ងាយបុគ្គលម្នាក់ ទៅបុគ្គលម្នាក់ពីមួយម៉ែត្រកន្លះឡើងទៅ។៤. ជាពិសេសព្រះសង្ឍ ឫបុគ្គលដែលឈឺ មានរោគសញ្ញាផ្តាសាយ ឫមិនស្រួលខ្លួន ត្រូវសម្រាក និងនៅដាច់ដោយឡែក។ដោយមិនត្រូវចូលរួមក្នុងពិធីជួបជុំក្នុងសាលាឆាន់ឫទទួលទេយ្យវត្ថុនៅក្នុងទីកន្លែងណាមួយនៃវត្តអារ៉ាមដែលអាចបង្កឲ្យមានការចម្លងបន្តគ្នាពីមនុស្សម្នាក់ទៅមនុស្សម្នាក់។
៥.ត្រូវចៀសវាងការពុលចំណីអាហារការពុលស្រាសដោយប្រើប្រាស់សាធារធាតុមេតាណុលដែលមិនត្រូវបច្ចេកទេស ចៀសវាងគ្រោះថ្នាក់ចរាចរ និងចៀសវាងការសេពគ្រឿងញៀន៕សុភាព