ភ្នំពេញៈគ្រោះថ្នាក់ចរាចរណ៍ទូទាំងប្រទេសរយៈពេល១៣៧ថ្ងៃបណ្តាលឱ្យមានអ្នកស្លាប់ចំនួន៥៧៣នាក់និងជាង១.៧០០នាក់ផ្សេងទៀតរបួសធ្ងន់និងស្រាល។ចំណែកយានយន្តជាង១៧ម៉ឺនគ្រឿង ត្រូវបានសមត្ថកិច្ចត្រួតពិនិត្យ និងផាកពិន័យ។
អ្នកនាំពាក្យអគ្គស្នងការដ្ឋាននគរបាលជាតិ បានឱ្យដឹងកាលពីរសៀលថ្ងៃទី១៤ ខែកញ្ញា ថា គ្រោះថ្នាក់ចរាចរណ៍រយៈពេល ១៣៧ថ្ងៃ គិតចាប់ពីថ្ងៃទី១ ខែឧសភា ដល់ថ្ងៃទី១៤ ខែកញ្ញា បានកើតឡើង ១.១៣៥លើក បណ្តាលឱ្យស្លាប់មនុស្សចំនួន ៥៧៣នាក់ របួសចំនួន ១.៧៧២នាក់ ។ក្នុងនោះរបួសធ្ងន់ ១.០៥២នាក់។ ដោយឡែកថ្នាក់ចរាចរណ៍នៅថ្ងៃទី១៤ ខែកញ្ញា កើតឡើងចំនួន ១៤លើក ស្លាប់ ៨នាក់ និងរបួសចំនួន ២០នាក់ ក្នុងនោះរបួសធ្ងន់ ១៦នាក់។
ឯលទ្ធផលរឹតបន្តឹងការអនុវត្តច្បាប់ចរាចរណ៍ផ្លូវគោក តាមស្មារតីអនុក្រឹត្យលេខ៣៩ រយៈពេល ១៣៧ថ្ងៃ គិតចាប់ពីថ្ងៃទី១ ខែឧសភា ដល់ថ្ងៃទី១៤ ខែកញ្ញាយានយន្តដែលត្រូវបានត្រួតពិនិត្យ និងផាកពិន័យ សរុបចំនួន ១៧០.១២៧គ្រឿង។ក្នុងនោះម៉ូតូមានចំនួន ១២.៦០៨៣គ្រឿង និងរថយន្តមានចំនួន ៤៤.០៤៤គ្រឿង (រថយន្តតូច ៣៧៨៣៦គ្រឿង និងរថយន្តធំ ៦២០៨គ្រឿង)។
អ្នកនាំពាក្យអគ្គស្នងការដ្ឋាននគរបាលជាតិបានបញ្ជាក់ថា បទល្មើសភាគច្រើនចំពោះម៉ូតូ និងរថយន្ត គឺអត់ពាក់មួកសុវត្ថិភាព ល្មើសសញ្ញា បត់ជែង លើសចំណុះ ស្រវឹង អត់ផ្លាកលេខ ល្មើសល្បឿន អត់ប័ណ្ណបើកបរ អត់ខ្សែក្រវាត់ គ្មានស្លាកលេខ និងនិយាយទូរស័ព្ទពេលបើកបរ៕
