កំពង់ឆ្នាំង:(ព័ត៌មានបឋម)កាលពីយប់រំលងអាធ្រាត្រទៀបភ្លឺថ្ងៃទី១៦ខែកញ្ញាឆ្នាំ២០២០មានករណីផ្ទុះអាវុធមួយគ្រាប់នៅមុខសាលាខេត្តកំពង់ឆ្នាំងបណ្ដាលឱ្យស្ត្រីម្នាក់បានស្លាប់នៅក្នុងរថយន្តដែលមានគ្នា៣នាក់។ក្រោយពីមានការផ្ទុះអាវុធបណ្តាលឱ្យស្ត្រីនេះស្លាប់ជនជាសង្សារបានបើករថយន្តជាមួយនឹងសពចូលសារភាពប្រាប់សមត្ថកិច្ចកងរាជអាវុធហត្ថខេត្តកំពង់ស្ពឺ។
សមត្ថកិច្ចបានបញ្ជាក់ឱ្យដឹងដឹងថានៅវេលាទៀបភ្លឺថ្ងៃទី១៦ខែកញ្ញាឆ្នាំ២០២០មានបុរសម្នាក់ឈ្មោះទាក់ឌីអាយុ២៨ឆ្នាំរស់នៅរាជធានីភ្នំពេញមានមុខរបរលក់ដូរអចលនទ្រព្យបើកបររថយន្តម៉ាកLexusRX200Tពណ៌ក្រហមដោយដឹកមនុស្ស២នាក់។ក្នុងនោះមានសពស្ត្រីម្នាក់ឈ្មោះធីលីស្សាភេទស្រីអាយុ១៨ឆ្នាំដែលជាសង្សារឯម្នាក់ទៀតឈ្មោះណយប៉ូរ៉ានៅភ្នំពេញរួមដំណើរ បានចូលខ្លួនមកសារភាព នៅមូលដ្ឋានកងរាជអាវុធហត្ថស្រុកឧដុង្គ។
ឈ្មោះ ទាក់ ឌី ជាជនបង្កបានសារភាពប្រាប់សមត្ថកិច្ចថា៖ក្រោយធ្វើដំណើរចេញពីខេត្តសៀមរាប ពួកគេទាំង៣នាក់ បានមកដល់ខេត្តកំពង់ឆ្នាំង ក៏ជជែកគ្នាជាមួយសង្សារ ។គាប់ជួនពេលនោះឈ្មោះ ធី លីស្សា ជាសង្សារបានឈោងទាញកាំភ្លើងពីលើតាបឡូរថយន្តដោយឃើញបែបនេះរូបគេឈ្មោះ ទាក់ឌីបានឈោងទាញដៃសង្សារកុំឱ្យលេង។ស្រាប់តែពេលនោះរថយន្តបានរេចង្កូតទៅបុកនឹងខឿនផ្លូវបណ្តាលផ្ទុះកាំភ្លើងម៉ាកZORAKIM9oTDមួយគ្រាប់ចំគល់ដោះខាងឆ្វេងបណ្តាលឱ្យស្លាប់ភ្លាមៗក្នុងរថយន្ត។
ក្រោយពីដឹងថាសង្សារខ្លួនបានស្លាប់ឈ្មោះទាក់ឌីមិនបានបើករត់គេចខ្លួនទេបានបើករថយន្តមកចូលក្នុងមូលដ្ឋានកងរាជអាវុធស្រុកឧដុង្គដើម្បីប្រាប់ពីដំណើររឿងដល់សមត្ថកិច្ច។ដោយសារតែករណីនេះ បានកើតហេតុនៅក្នុងទឹកដីខេត្តកំពង់ឆ្នាំង។ដូច្នេះពេលនេះសមត្ថកិច្ចកងរាជអាវុធហត្ថខេត្តកំពង់ស្ពឺ បានប្រគល់រឿងនេះឱ្យទៅសមត្ថកិច្ចកំពង់ឆ្នាំងម្ចាស់ករណីស្រាវជ្រាវបន្តតាមនីតិវិធី៕
