ភ្នំពេញៈក្រសួងការបរទេសកម្ពុជាបានប្រតិកកម្មនិងសម្តែងការខកចិត្តចំពោះការចោទប្រកាន់ដោយហេតុផលនយោបាយរបស់ឥស្សរជននយោបាយសហរដ្ឋអាមេរិកចំនួនពីររូប ។ក្នុងនោះមានសមាជិកសភា និងឧបការីរដ្ឋមន្ត្រីក្រសួងការបរទេសសហរដ្ឋអាមេរិក កាលពីថ្ងៃទី១៥ ខែកញ្ញា ឆ្នាំ២០២០ទៅលើវិធានការរបស់អាជ្ញាធរកម្ពុជា ក្នុងការធានាសន្តិភាព សណ្តាប់ធ្នាប់ និងសុខភាពសាធារណៈនៅក្នុងប្រទេស។
ោកកុយ គួង អ្នកនាំពាក្យក្រសួងការបរទេសកម្ពុជា
អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា មានការខកចិត្តចំពោះការចោទប្រកាន់ដោយហេតុផលនយោបាយកាលពីថ្ងៃទី១៥ ខែកញ្ញា ឆ្នាំ២០២០ របស់ឥស្សរជននយោបាយសហរដ្ឋអាមេរិកចំនួនពីររូបគឺ លោក Alan Lowenthal សមាជិកសភា និងលោក Robert A. Destro ឧបការីរដ្ឋមន្ត្រីក្រសួងការបរទេស ទៅលើវិធានការរបស់អាជ្ញាធរកម្ពុជាក្នុងការធានាសន្តិភាពសណ្តាប់ធ្នាប់និងសុខភាពសាធារណៈនៅក្នុងប្រទេស។ ការប្រតិកម្មឆ្លើយតបរបស់ក្រសួងការបរទេសកម្ពុជាបានធ្វើឡើងនៅថ្ងៃទី១៨ ខែកញ្ញា ឆ្នាំ២០២០ នេះ។
អ្នកនាំពាក្យកត់សម្គាល់ដោយសោកស្តាយយ៉ាងខ្លាំងថា ការវាយតម្លៃរបស់ពួកគេ មិនត្រឹមត្រូវទាល់តែសោះ និងមិនបានគិតពីទិដ្ឋភាពអង្គហេតុ និងអង្គច្បាប់នៃបញ្ហានេះ។ ប្រទេសកម្ពុជាលើកតម្កើងសេរីភាពនៃការបញ្ចេញមតិ សមាគម និងការជួបជុំដោយសន្តិវិធី ដូចដែលបានធានានៅក្នុងរដ្ឋធម្មនុញ្ញ។ ប៉ុន្តែទោះយ៉ាងណា ការប្រើប្រាស់សិទ្ធិ និងសេរីភាពបែបនេះ ត្រួវអនុលោមតាមច្បាប់។សេរីភាពនៃការបញ្ចេញមតិមិនមែនជាសេរីភាពក្នុងការផ្សព្វផ្សាយការរើសអើង ដែលនាំឱ្យមានការស្អប់ខ្ពើម ការប្រកាន់ពូជសាសន៍ និងអំពើហឹង្សានោះឡើយ។
អ្នកនាំពាក្យក្រសួងការបរទេសបានបញ្ជាក់ថា គ្រប់អង្គការក្រៅរដ្ឋាភិបាលទាំងអស់ រួមទាំងអ្នកការពារសិទ្ធិមនុស្ស និងក្រុមយុវជន មានសេរីភាពក្នុងការអនុវត្តសកម្មភាពរបស់ខ្លួន ដើម្បីរួមចំណែកក្នុងកិច្ចអភិវឌ្ឍជាតិដរាបណាសកម្មភាពអស់ទាំងនោះស្ថិតនៅក្រោមដែនកំណត់នៃច្បាប់។អ្នកនាំពាក្យកត់សម្គាល់នូវកម្រិតជាក់លាក់មួយនៃស្តង់ដារទ្វេដែលសម្តែងចេញដោយឥស្សរជនទាំងពីរដោយម្យ៉ាងអំពាវនាវឱ្យដោះលែងក្រុមពិសេសមួយចំនួនក្រៅប្រព័ន្ធតុលាការដែលផ្ទុយទៅនឹងការអនុវត្តនៃដំណើរការនីតិវិធីតុលាការនិងម្យ៉ាងវិញទៀតបែរជាអំពាវនាវឱ្យគោរពនីតិរដ្ឋទៅវិញ។
កម្ពុជារក្សាការប្តេជ្ញាចិត្តក្នុងការកសាងទំនាក់ទំនងល្អប្រសើរជាមួយសហរដ្ឋអាមេរិក និងវាយតម្លៃខ្ពស់ចំពោះការគាំទ្ររបស់សហរដ្ឋអាមេរិក ដើម្បីស្ថិរភាព សន្តិភាព និងការអភិវឌ្ឍរបស់ប្រទេសកម្ពុជា៕សុភាព
