ព្រះវិហារ៖មន្ទីរសាធារណការនិងដឹកជញ្ជូនខេត្តព្រះវិហារបានសម្រេចផ្អាកការធ្វើចរាចរណ៍រថយន្តដឹកទំនិញធុនធំគ្រប់ប្រភេទ នៅលើកំណាត់ផ្លូវជាតិលេខ៩ ផ្លូវជាតិលេខ៦២ ផ្លូវជាតិលេខ៦៤ផ្លូវជាតិលេខ៩៥និងផ្លូវខេត្តលេខ២៦២៧ជាបណ្តោះអាសន្ន។ចាប់ពីថ្ងៃជូនដំណឹងនេះតទៅ រហូតដល់មានការជូនដំណឹងជាថ្មី ក្នុងគោលបំណង ដើម្បីចូលរួមថែរក្សា ផ្លូវ ស្ពាន និងធានាដល់សុវត្ថិភាព បងប្អូនប្រជាពលរដ្ឋ ក្នុងការធ្វើចរាចរណ៍ផងដែរ។
តាមសេចក្ដីជូនដំណឹងនៅថ្ងៃទី១៦ ខែតុលា ឆ្នាំ២០២០នេះ បានបញ្ជាក់ថា ការផ្អាកធ្វើការចរាចរណ៍ រថយន្តដឹកទំនិញធុនធំគ្រប់ប្រភេទនេះ ដោយសារស្ថានភាព គ្រោះទឹកជំនន់ទឹកភ្លៀង បាននឹងកំពុងជន់ឡើងយ៉ាងខ្លាំង។ បណ្តាលឱ្យទឹកលិចកំណាត់ផ្លូវខេត្ត និងផ្លូវជាតិមួយចំនួន នៅក្នុងភូមិសាស្ត្រខេត្តព្រះវិហារ។ក្នុងស្ថានភាពបែបនេះធ្វើឱ្យផ្លូវស្ពានមិនអាចទ្រាំទ្រនឹងទម្ងន់រថយន្តដឹកជញ្ជូនធុនធំបាននោះទេ។នៅថ្ងៃទី១៦ខែតុលាឆ្នាំ២០២០នេះស្ថានភាពទឹកដងស្ទឹងសែនខេត្តព្រះវិហារបន្តហក់ឡើងខ្លាំងរហូតលើសកម្រិតត្រូវប្រកាសអាសន្ន គឺត្រឹម១១,៥០ម៉ែត្រ។
ជាមួយនឹងការហក់ឡើងខ្លាំង នៃកម្ពស់ទឹកដងស្ទឹងសែនលើសកម្រិតប្រកាសអាសន្ន នៅព្រឹកថ្ងៃទី១៦តុលានេះលោកប្រាក់សុវណ្ណអភិបាលខេត្តព្រះវិហារបានដឹកនាំក្រុមការងារចុះពិនិត្យជាក់ស្តែងដល់ទីតាំងមួយចំនួនតាមឃុំស្រុកដែលកំពុងប្រឈមនិងដាក់បទបញ្ជាឱ្សសមត្ថកិច្ចគ្រប់លំដាប់ថ្នាក់ ត្រៀមមធ្យោបាយជួយអន្តរាគមន៍សង្គ្រោះប្រជាពលរដ្ឋឱ្យទាន់ពេលវេលា។
លោកអភិបាលខេត្តក៏បានអំពាវនាវដល់អាជ្ញាធរដែនដី និងសមត្ថកិច្ចនៅតាមមូលដ្ឋាន ត្រូវតាមដានឃ្លាំមើលស្ថានភាពទឹកនៅតាមតំបន់របស់ខ្លួនគ្រប់ពេលវេលានិងរាយការណ៍ឱ្យបានឆាប់បំផុត។ពិសេសត្រូវផ្សព្វផ្សាយដល់ប្រជាពលរដ្ឋដែលរស់នៅតាមដងស្ទឹងសែនឱ្យមានការប្រុងប្រយ័ត្ននិងត្រៀមលក្ខណៈបង្ការទុកជាមុនកុំឱ្យមានការបាត់បង់ខូចខាតទ្រព្យសម្បត្តិនិងរងគ្រោះថ្នាក់ផ្សេងៗទៀតដោយទឹកជំនន់៕វ៉ាន់ឌី