ភ្នំពេញ៖កាលពីល្ងាចថ្ងៃទី១៦ខែតុលាឆ្នាំ២០២០ក្រសួងធនធានទឹកនិងឧតុនិយមបានជូងដំណឹងថា យោងតាមការវិវត្តនៃស្ថានភាពអាកាសធាតុមកដល់វេលានេះ ក្រសួងបានព្យាករថា ប្រព័ន្ធសម្ពាធទាប ដែលអូសបន្លាយលើកម្ពុជា កាន់តែបង្កើនឥទ្ធិពលជាលំដាប់។
ចំណែកវិសម្ពាធ ដែលបានកើតនៅលើសមុទ្រចិនខាងត្បូង ដែលក្រសួងបានជូនដំណឹងថាវានឹងក្លាយទៅជាព្យុះទី១៧កាលពីថ្ងៃទី១៥ ខែតុលាឆ្នាំ ២០២០ នោះ។ពេលនេះ វាស្ថិតនៅត្រឹមកម្រិតជាវិសម្ពាធ ដដែលដោយមានល្បឿនខ្យល់អតិបរមា ១៥ ម៉ែត្រក្នុងមួយវិនាទី ដែលទាបជាងល្បឿនរបស់ព្យុះ (Tropical Storm) តែ២ម៉ែត្រក្នុងមួយវិនាទីតែប៉ុណ្ណោះ។វិសម្ពាធនេះ នឹងធ្វើដំណើរឆ្ពោះចូលមកលើភាគកណ្តាលប្រទេសវៀតណាមនៅថ្ងៃ១៧ខែតុលាឆ្នាំ ២០២០ ។
ស្ថានភាពបែបនេះនឹងធ្វើឱ្យភ្លៀង នៅតែបន្តធ្លាក់ច្រើនពិសេសចាប់ពីថ្ងៃទី១៧ ដល់ថ្ងៃទី២១ ខែតុលាឆ្នាំ២០២០ នៅតាមបណ្តាខេត្តភាគពាយ័ព្យ បណ្តាខេត្តនៅភូមិសាស្ត្រជាប់ក្បែរជួរភ្នំដងរែក ខ្ពង់រាបភាគឦសាន និងតំបន់ជួរភ្នំក្រវាញ នឹងអាចមានភ្លៀងធ្លាក់ខ្លាំងជាប់បន្ត។
ក្រសួងបានបញ្ជាក់ថា តំបន់មាត់សមុទ្រ នឹងអាចមានភ្លៀងធ្លាក់ច្រើន និងនៅលើផ្ទៃសមុទ្រ មានភ្លៀងលាយឡំខ្យល់បក់បោកនិងរលកសមុទ្រខ្ពស់ៗ។ជាមួយគ្នានោះ ក្រសួងធនធានទឹក បានអំពាវនាវដល់ ក្រសួង ស្ថាប័នពាក់ព័ន្ធ អាជ្ញាធរដែនដីគ្រប់លំដាប់ថ្នាក់ និងសាធារណជន ។ពិសេសប្រជាពលរដ្ឋ ដែលនៅតំបន់ខាងលើ បង្កើនការយកចិត្តទុកដាក់ប្រុងប្រយ័ត្នខ្ពស់បន្ថែមទៀត ដើម្បីចៀសវាងនូវគ្រោះថ្នាក់ផ្សេងៗដែលអាចកើតមានឡើងជាយថាហេតុ៕សហការី