ភ្នំពេញ៖កម្លាំងអាវុធហត្ថភ្នំពេញកាលពីរសៀលថ្ងៃទី២ ខែមិថុនាបានបញ្ជូនស្ត្រីអ្នកបកប្រែភាសាបរទេសម្នាក់ពាក់ព័ន្ធឆបោកលុយប្រហែលជាង២០ម៉ឺនដុល្លារទៅតុលាការ។សមត្ថកិច្ចបានឱ្យដឹងថា ស្រ្តីជាជនសង្ស័យត្រូវអាវុធហត្ថភ្នំពេញចាប់ខ្លួននៅថ្ងៃទី១ ខែមិថុនាឆ្នាំ២០២២ហើយបានបញ្ជូនទៅតុលាការផ្តើមចេញពីការអូសទាញម្ចាស់លុយឱ្យចូលភាគហ៊ុនរកស៊ីទិញ-លក់មាស។ ស្ត្រីរូបនោះ ឈ្មោះពេជ្រច័ន្ទវល័ក្ខ អាយុ៤០ ឆ្នាំជាអ្នករកស៊ីនិងបកប្រែភាសាបរទេសនៅផ្ទះជួលផ្លូវA សង្កាត់គោករកា ខណ្ឌព្រែកព្នៅ។ការចាប់ខ្លួននេះធ្វើឡើងតាមបណ្តឹងរបស់ជនរងគ្រោះ។ គួរបញ្ចាក់ថា កាលពីដើមឆ្នាំ២០២២ឈ្មោះ ពេជ្រ ច័ន្ទវល័ក្ខបានទៅលួងលោមអូសទាញជនរងគ្រោះថា មានក្រុមហ៊ុនមួយឈ្មោះសុខម៉ាល់ធីម៉ិច ឌីវីឡុបមិន អ៊ីអេនស៊ី ជាក្រុមហ៊ុនរកស៊ីទិញលក់-មាស និងទទួលបញ្ញើក្នុងនិងក្រៅប្រទេស។ក្រុមហ៊ុននោះមានទីតាំងផ្ទះលេខ៥២z ផ្លូវលេខ៤០២ សង្កាត់ទំនប់ទឹក ខណ្ឌចម្ការមន ហើយត្រូវការអ្នករកស៊ីចូលហ៊ុនជាមួយ។ ជនសង្ស័យបានលួងលោមស្ត្រីរងគ្រោះបានចំណាយប្រាក់អស់ប្រមាណជាង២០ម៉ឺនដុល្លារហើយបែកធ្លាយដល់កូនៗដឹងរឿងម្តាយចាញ់ល្បិចកលគេឆបោកក៏ប្តឹងអាវុធហត្ថឱ្យចាប់ស្ត្រីរូបនោះបញ្ជូនទៅតុលាការចាត់ការតាមច្បាប់៕
តាកែវ៖សមត្ថកិច្ចបានចាប់វ៉ៃខ្នោះបុរសម្នាក់ដែលផឹកស្រាស្រវឹងក៏ដុតផ្ទះម្ដាយរបស់ខ្លួនឱ្យឆេះខ្ទេចគ្មានសល់នៅភូមិថ្មី ឃុំកុមារាជា ស្រុកបាទី ខេត្តតាកែវកាលពីល្ងាចថ្ងៃទី១៧ ខែមករាឆ្នាំ២០២២។ សមត្ថកិច្ចបានឱ្យដឹងថា ជនសង្ស័យឈ្មោះមិន ទូច អាយុ៣៦ឆ្នាំ នៅភូមិ ឃុំកើតហេតុ។ជននេះ បានផឹកស្រាស្រវឹងរួចដុតផ្ទះបាយម្ដាយរបស់ខ្លួនឈ្មោះពុត ង៉ែត អាយុ៧៧ឆ្នាំ បណ្ដាលឱ្យឆេះអស់ទាំងស្រុង។ផ្ទះដែលកូនដុតចោលនោះមានទំហំ៥ម៉ែត្រគុណ៦ម៉ែត្រ សង់អំពីឈើប្រក់ស័ង្កសី ជញ្ជាំងស័ង្កសី។ សម្ភារខូចខាតមាន ធុងទឹកមួយ,ទូចានមួយ, ឆ្នាំងបាយមួយ, អង្ករមួយបាវ,និងសម្ភារប្រើប្រាស់មួយចំនួនទៀត។បច្ចុប្បន្នជនសង្ស័យត្រូវបានកម្លាំងនគរបាលស្រុកបាទីឃាត់ខ្លួនដើម្បីកសាងសំណុំរឿងបញ្ជូនតាមនីតិវិធី៕
ព្រះវិហារ៖កម្លាំងកងរាជអាវុធហត្ថស្រុកជាំក្សាន្តដឹកនាំលោកវរសេនីយ៍ត្រីពេជ្រសុភីមេបញ្ជាការស្នាក់ការមូលដ្ឋានបានចុះធ្វើការឃាត់ខ្លួនជនសង្ស័យប្រុសស្រីចំនួន៤នាក់ជាមួយនឹងវត្ថុតាងថ្នាំញៀនមួយចំនួននៅក្នុងពីរទីតាំងផ្សេងគ្នា។ហេតុការណ៍ចុះឃាត់ជនសង្ស័យបានធ្វើឡើងនៅក្នុងស្រុកជាំក្សាន្តខេត្តព្រះវិហារកាលពីថ្ងៃទី១ខែមេសាឆ្នាំ២០២០។ លោកអនុសេនីយ៍ឯកជុនបូរ៉ាមេបញ្ជាការរងទទួលបន្ទុកការងារព្រហ្មទណ្ឌបានឱ្យដឹងថានៅក្នុងហេតុការណ៍ចុះបង្ក្រាបនេះកម្លាំងបានឃាត់ខ្លួនជនសង្ស័យសរុបចំនួន៤នាក់នៅក្នុងពីទីតាំងផ្សេងគ្នា។ដោយទីតាំងទី១នៅក្នុងភូមិឈើទាលគងឃុំជាំក្សាន្តស្រុកជាំក្សាន្តឃាត់ខ្លួនបានជនសង្ស័យពីរនាក់៖ទី១,ឈ្មោះស្វាយ ណុប ភេទប្រុសអាយុ៤៥ឆ្នាំ។ ទី២ឈ្មោះខៀវស្រឹមភេទស្រីអាយុ៤២ឆ្នាំអ្នកទាំងពីររស់នៅភូមិឃុំកើតហេតុដោយចាប់យកវត្ថុតាងបានរួមមាន៖ថ្នាំញៀនម៉ាទឹកកកចំនួន១កញ្ចប់តូច=០,៧៨g,ទូរស័ព្ទដៃចំនួន៣គ្រឿង,កាំភ្លើងខ្យល់ចំនួន១ដើម,កាំភ្លើងកាបិនច្នៃចំនួន១ដើម,លុយខ្មែរចំនួន១០ម៉ឺនរៀល,ម៉ូតូម៉ាកវេវពណ៍ខ្មៅគ្មានស្លាកលេខចំនួន១គ្រឿង, សាច់ជួរចំនួន១ដុំ, រំសេវ គ្រាប់កង់, សំណ និងសម្ភារសម្រាប់ជក់មួយចំនួនទៀត។ ទីតាំងទី២នៅភូមិពាក់ស្បែកឃុំរំដោះស្រែស្រុកជាំក្សាន្តកម្លាំងបានចុះឃាត់ខ្លួនជនសង្ស័យចំនួន២នាក់បន្ថែមទៀតដោយទី១,ឈ្មោះធឿនរតនាភេទប្រុសអាយុ២០ឆ្នាំទី២,ឈ្មោះសុកកុសល់ភេទប្រុសអាយុ២២ឆ្នាំទាំងពីរនាក់រស់នៅភូមិឃុំកើតហេតុ។ចាប់យកវត្ថុតាងបានរួមមាន៖ថ្នាំញៀនម៉ាទឹកកកចំនួន៨កញ្ចប់=២,៤០g,ទូរស័ព្ទដៃចំនួន១គ្រឿង,លុយខ្មែរចំនួន១២ម៉ឺនរៀល,កាបូបដាក់លុយចំនួន១,កាបូបស្ពាយចំនួន១,ម៉ូតូយ៉ាវមាហាពណ៌ខៀវគ្មានស្លាកលេខចំនួន១គ្រឿង ។ បច្ចុប្បន្នជនសង្ស័យប្រុសស្រីទាំង៤នាក់និងវត្ថុតាងខាងលើត្រូវបានកម្លាំងជំនាញកងរាជអាវុធហត្ថស្រុកកសាងសំណុំរឿងដើម្បីធ្វើការបញ្ជួនបន្តទៅកងរាជអាវុធហត្ថខេត្តព្រះវិហារចាត់ការបន្តតាមនីតិវិធីនៅព្រឹកថ្ងៃទី២ ខែមេសា ឆ្នាំ២០២០នេះ៕វ៉ាន់ឌី
