ភ្នំពេញ៖ទុស្សេខ្សែចរន្តអគ្គិសបង្កជាភ្លើងឆេះបានឆាបឆេះបន្ទប់ឡៅតឿក្នុងផ្ទះល្វែងមួយកន្លែងដែលម្ចាស់មិននៅភ្ញាក់ផ្អើលដល់អ្នកជិតខាងនិងសមត្ថកិច្ចមូលដ្ឋានចុះធ្វើអន្តរាគមន៍បាញ់ទឹកពន្លត់។ហេតុការណ៍នេះបានកើតឡើងនៅក្នុងភូមិឫស្សី៣សង្កាត់ស្ទឹងមានជ័យ២ ខណ្ឌមានជ័យ កាលពីរសៀល ថ្ងៃទី២៥ ខែឧសភា ឆ្នាំ២០២១។
ប្រជាពលរដ្ឋបានឱ្យដឹងថា៖ មុនកើតហេតុគេឃើញមានផ្សែងហុយចេញពីក្នុងផ្ទះល្វែងដែលម្ចាស់ចាក់សោចេញទៅក្រៅបាត់។ ប្រជាពលរដ្ឋបានរាយការណ៍ទៅអាជ្ញាធរមូលដ្ឋានភ្លាមៗដើម្បីចុះមកជួយធ្វើអន្តរាគមន៍បាញ់ទឹកពន្លត់ខណៈដែលពួកគាត់ក៏បានវាយបំបែកសោដើម្បីបាញ់ទឹកចូលជាបណ្ដើរៗ។
ក្រោយមក ភ្នាក់ងារពន្លត់អគ្គិភ័យជាច្រើនអង្គភាពបានចេញរថយន្តពន្លត់អគ្គិភ័យមកបាញ់ទឹកពន្លត់អស់៤គ្រឿង និងប្រើពេលជាង១ម៉ោងក៏រលត់ទៅវិញជាស្ថាពរ ។ ករណីនេះបានបង្កការខូចខាតសម្ភារជាច្រើនក្នុងបន្ទប់ឡៅតឿ តែមិនខូចខាតសម្ភារទាំងស្រុងក្នុងផ្ទះល្វែងនេះនោះទេ និងមិនបង្កគ្រោះថ្នាក់ដល់មនុស្សដែរ។ ចំពោះមូលហេតុ សមត្ថកិច្ចបានប្រាប់ថា បណ្ដាលមកពីទុស្សេខ្សែភ្លើង ៕ដោយ៖ចំប៉ី
