កំពង់ចាម៖ទន្លេមេគង្គក្រុងកំពង់ចាមបានក្លាយជាគោលដៅសម្រាប់ភ្ញៀវទេសចរបរទេសតាមកប៉ាល់មកឈប់សំចតដើម្បីធ្វើដំណើរបន្តតាមរថយន្តឆ្ពោះទៅកាន់ទស្សនាតំបន់កម្សាន្តជារមណីយដ្ឋានទេសចរណ៍ប្រវត្តិសាស្ត្រ,តំបន់ទេសចរណ៍វប្បធម៌និងសាសនា។
ពេលរាត្រីភ្ញៀវវិលត្រឡប់មកសម្រាកនៅតាមកប៉ាល់ចតនៅកំពង់ផែ ឬបោះយុទ្ធការនៅកណ្តាលទន្លេគ្រប់រដូវ។នេះជាការលើកឡើងរបស់លោកអ៊ុនចាន់ដាអភិបាលខេត្តកំពង់ចាមថ្លែងនៅក្នុងជំនួបសវនាការជាមួយសេនានុព័ន្ធយោធាបរទេសមកពីបណ្តាប្រទេសចំនួន១៤នៅក្នុងសាលាខេត្តនេះកាលពីរសៀលថ្ងៃទី១១ខែកុម្ភ:ឆ្នាំ២០២០។
លោកអភិបាលខេត្តបានមានប្រសាសន៍ថាពាក់ព័ន្ធវិស័យទេសចរណ៍ខេត្តកំពង់ចាមមិនទាន់ប្រែក្លាយជាគោលដៅទេសចរណ៍។ដើម្បីប្រកួតប្រជែងជាមួយបណ្តាខេត្តផ្សេងទៀតដែលមានប្រាំង្គប្រាសាទបុរាណល្បីៗដែលជាប់ចំណាត់ថ្នាក់ជាបេតិកភ័ណ្ឌពិភពលោកយ៉ាងណាក៏ដោយ។ប៉ុន្តែយើងកំពុងរៀបចំតំបន់រមណីយដ្ឋានទេសចរណ៍មួយចំនួនបន្ថែមទៀត។
លោកអ៊ុនចាន់ដាបានមានប្រសាសន៍ទៀតថាទោះយ៉ាងណាយើងមានគោលដៅទេសចរណ៍សម្រាប់ក្រុងកំពង់ចាមនេះ។ដែលបាននិងកំពុងស្រូបបាននូវភ្ញៀវនូវភ្ញៀវទេសចរណ៍ធ្វើដំណើរតាមកប៉ាល់មកពីបណ្តាប្រទេសហ្វីពិន ប្រទេសឥណ្ឌូនេស៊ីឆ្លងកាត់ប្រទេសវៀតណាមមកលេងក្រុងកំពង់ចាមតែម្តង។
លោកបានមានប្រសាសន៍បន្តថាភ្ញៀវទាំងនោះបានឈប់សំចតកប៉ាល់នៅកំពង់ផែក្រុងនេះហើយបានធ្វើដំណើរឆ្ពោះទៅកាន់តំបន់ទេសចរណ៍ប្រវត្តិសាស្ត្រ សាសនាវប្បធម៌ដូចជារមណីយដ្ឋានភ្នំហាន់ជ័យ រមណីយដ្ឋានប្រាសាទនគរបាជ័យ និងរមណីយដ្ឋានភ្នំប្រុសភ្នំស្រី ក្នុងស្រុកកំពង់សៀម។
លោកស៊ានសុគុនប្រធានមន្ទីរទេសចរណ៍ខេត្តកំពង់ចាមបានប្រាប់ឱ្យដឹងនៅថ្ងៃទី១២កុម្ភ:ថាពិតជាមានភ្ញៀវទេសចរបរទេសធ្វើដំណើរតាមផ្លូវទឹកដោយកប៉ាល់មកឈប់សំចតនៅកំពង់ផែក្នុងក្រុងកំពង់ចាមពិតប្រាកដមែន។ដោយភ្ញៀវបរទេសធ្វើដំណើរតាមកប៉ាល់គឺមកជាកញ្ចប់របស់ក្រុមហ៊ុន។
លោកប្រធានមន្ទីរបានឱ្យដឹងទៀតថាកប៉ាល់បានមកឈប់នៅកំពង់ផែគឺភ្ញៀវបានធ្វើដំណើរតាមរថយន្តរបស់ក្រុមហ៊ុនដដែលទៅកាន់ទីកម្សាន្តជាតំបន់ទេសចរណ៍របស់ខេត្តកំពង់ចាមនិងមួយចំនួនទៅកាន់រមណីយដ្ឋានខេត្តដទៃឬក៏ទៅកាន់ខេត្តសៀមរាប។លុះដល់ពេលល្ងាចភ្ញៀវទាំងនោះបានវិញត្រឡប់មកស្នាក់នៅលើកប៉ាល់វិញ។ដោយខ្លះចតនៅកំពង់ផែជាប់ច្រាំងនិងខ្លះទៀតចេញទៅបោះយុទ្ធការនៅកណ្តាលទន្លេ។
លោកសុគុនបានបន្តថាយើងលោកពុំបានដឹងពីតួលេខភ្ញៀវបរទេសតាមកប៉ាល់ប្រចាំថ្ងៃតែបើក្នុងមួយខែក្នុងចន្លោះប្រមាណពី៦០០ទៅ១.០០០នាក់។ដោយភ្ញៀវបរទេសតាមកប៉ាល់ឆ្លងកាត់ទន្លេមេគង្គខេត្តកំពង់ចាមគឺបានធ្វើដំណើរមកឈប់សំចតនៅក្រុងកំពង់ចាមនេះពេញមួយឆ្នាំទាំងរដូវប្រាំងនិងរដូវវស្សាតែម្តង៕សម្បត្តិ
