បាត់ដំបង៖រថយន្តថៃបានដឹកអ្នកទេសចរខ្មែរប្រមាណ១៥នាក់ ក្នុងដំណើរកម្សាន្តនៅទឹកដីប្រទេសថៃ ត្រូវរថយន្តនោះបានបុកកុងតឺន័រពីក្រោយ ធ្វើឱ្យស្លាប់៣នាក់និងរបួសជាង១០នាក់។ប្រភពព័ត៌មានបានឱ្យដឹងថា គ្រោះថ្នាក់ចរាចរណ៍ខាងលើបានកើតឡើងនៅតាម ផ្លូវល្បឿនលឿនក្នុងឃុំណងឆាងខក ស្រុកមឿង ខេត្តឈុនបុរី ប្រទេសថៃ កាលពីវេលាទៀបភ្លឺថ្ងៃទី៨ ខែមេសា។ប្រភពដដែលបានបន្តថា មុនគ្រោះថ្នាក់កើតឡើងមានរថយន្តសាំយ៉ុង ផ្លាកលេខ បាងកក ៣៤-២៤៧៨ ដឹកអ្នកទេសចរខ្មែរបើកក្នុងលឿនលឿន។ពេលនោះរថយន្តទំនងតៃកុងងោកមួយភាំងក៏ជ្រុលបុករថយន្តសណ្តោងកុងទីន័រ ពាក់ផ្លាកលេខ បាងកក៧៩-១៧៧២ ពីក្រោយពេញទំហឹង បណ្តាលឱ្យរថយន្តខូចខ្ទេចផ្នែកខាងមុខហើយគាបតៃកុងស្លាប់ភ្លាម។ចំណែកភ្ញៀវទេសចរខ្មែរបានស្លាប់៣នាក់និង១២នាក់ទៀតរងរបួសធ្ងន់និងស្រាល។ករណីនេះសមត្ថកិច្ចថៃបានអះអាងថា អាចកើតឡើងពីអ្នកបើកបរងងុយដេក។រីឯមន្ត្រីច្រកទ្វារព្រំដែនកម្ពុជាបាននិយាយថា ភ្ញៀវទេសចរកម្ពុជាចូលទៅដើរលេងកម្សាន្តនៅលើទឹកដីទើបឆ្លងកាត់ច្រកទ្វារអន្តរជាតិដូង ខេត្តបាត់ដំបង ក្រោយមកបន្តិចក៏ជួបគ្រោះថ្នាក់តែម្តង៕
Related Articles
ទាហានដែលស្លាប់ក្នុងនាវាចម្បាំងនៅស្រុកស្រីសន្ធរអាចមានចំនួនពី៥ទៅ៨នាក់
កំពង់ចាម៖សាកសពជាទាហានរបស់លោកសេនាប្រមុខលន់ណុលដែលបានស្លាប់ដោយសារការបាញ់ពន្លិចនាវាចម្បាំងនៅក្នុងទន្លេមេគង្គ ក្នុងស្រុកស្រីសន្ធរ ពីសំណាក់ទាហានខ្មែរកំឡុងឆ្នាំ១៩៧០-១៩៧៥នោះគឺអាចមានពីចំនួន៥ទៅ៨នាក់។ដោយបច្ចុប្បន្នមានសាច់ញាតិមកទំនាក់ទំនងដើម្បីទទួលយកធាតុជាបណ្តើរៗហើយ។ នេះបើតាមការថ្លែងឱ្យដឹងពីលោកឧត្តមសេនីយ៍ម៉ីសុភាមេបញ្ជាការកងបោសសម្អាតគ្រាប់យុទ្ធភណ្ឌមិនទាន់ផ្ទុះក្រោមទឹកក្នុងពិធីស្រង់នាវានិងបិទបញ្ចប់ការដ្ឋានទី១នៅភូមិវាលឃុំមានជ័យស្រុកស្រីសន្ធរនៅព្រឹកថ្ងៃទី៧មេសានេះ។លោកថ្លែងថាប្រតិបត្តិការស្រាវជ្រាវរុករករហូតស្រង់នាវាមួយគ្រឿងនេះមកដាក់សាឡង់ថ្ងៃនេះ យើងបានចំណាយរយ:ពេល ៦ខែ។ ជាសរុបនៃការស្រង់ក្រៅពីតួនាវាដែលលិចក្នុងទឹកជម្រៅប្រហែល២៧ម៉ែត្រនិងកប់ក្នុងខ្សាច់ជម្រៅប្រមាណ១០ម៉ែត្របន្ថែមទៀតនោះគឺស្រង់បានគ្រាប់យុទ្ធភណ្ឌសរុបជាង១៦តោន។ក្នុងនោះគ្រាប់ផុយមិនទាន់ផ្ទុះត្រូវបានដុតកម្ទិចចោលប្រហែល១០ភាគរយនិងនៅសល់៩០ភាគរយផ្សេងទៀតបានពុះជ្រៀក ដោះបន្សាបយកទៅរក្សាទុកក្នុងសារមន្ទីរ។ លោកឧត្តមសេនីយ៍មេបញ្ជាការបានបន្តថា៖ ក្នុងនោះយើងបានរកឃើញលលាដក្បាលមនុស្សចំនួន មួយឆ្អឹងបំណែកសាកសពជាច្រើនព្រមទាំងសម្ភារប្រើប្រាស់របស់សាកសពមួយចំនួន។តាមការប៉ាន់ស្មានអាចមានទាហានសម័យសង្រ្គាមលន់ណុលស្លាប់ក្នុងនាវាមួយគ្រឿងនេះពី៥ទៅ៨នាក់។បច្ចុប្បន្នមានសាច់ញាតិបាននៃសពមកទំនាក់ទំនងទទួលយកធាតុជាបណ្តើៗហើយ។ប៉ុន្តែខាងយើងមិនអាចកំណត់ជាឆ្អឹងសពអ្នកណាជាណាបានទេ។ លោកបានបន្ថែមថាជុំវិញប្រតិបត្តិការស្រាវជ្រាវរុករកយុទ្ធភណ្ឌមិនទាន់ផ្ទុះក្រោមទឹកនេះយើងបានកំណត់ក្នុងផែនការចំនួន៤ទីតាំងបន្ថែមទៀតក្នុងទន្លេមេគង្គនេះ។ដោយការដ្ឋានទី២បាននិងកំពុងបន្តគឺនៅស្រុកល្វាឯមខេត្តកណ្តាលនិងនៅចំនួន៣ការដ្ឋានទៀតគ្រោងនឹងបើកការដ្ឋានបន្តបន្ទាប់ទៀតដែលប្រតិបត្តិការនេះនឹងបញ្ចប់រយ:ពេល១២ ខែ៕សម្បតិ្ត
មហាជនរិះគន់ករណីយករថយន្តលេខយោធាដឹកថ្ម,ខ្សាច់លក់បម្រើប្រយោជន៍ឯកជន
បាត់ដំបង៖មហាជនក្នុងក្រុងបាត់ដំបងបានសម្តែងការរិះគន់ចំពោះបុគ្គលមួយចំនួនតូចដែលយករថយន្តអង្គភាពខេមរភូមិន្ទ(ខ.ម)មកធ្វើអាជីវកម្មដឹកថ្មនិងខ្សាច់លក់ឱ្យម៉ូយបម្រើប្រយោជន៍ផ្ទាល់ខ្លួន។ការរិះគន់ពីមាត់មួយទៅមាត់មួយរបស់ប្រជាពលរដ្ឋនៅក្នុងក្រុងបាត់ដំបងពិសេសបណ្តាញព័ត៌មានសង្គមជាច្រើនបានលើកឡើងសម្តែងការងឿងឆ្ងល់និងមិនពេញចិត្ត។ បន្ទាប់ពីប្រទះឃើញបុគ្គលមួយចំនួនតូចបានឆ្លៀតឱកាសទាញយកផលប្រយោជន៍ពីរដ្ឋក្រោមរូបភាពយកមធ្យោបាយដឹកជញ្ជួនរបស់អង្គភាពកងទ័ពដែលមានពណ៌ត្រេអីជាពណ៌សម្គាល់កងកម្លាំងនិងមានបំពាក់ស្លាកលេខខេមរភូមិន្ទ(ខ.ម)របស់អង្គភាពរដ្ឋមកបម្រើផលប្រយោជន៍ផ្ទាល់ខ្លួនដោយមិនកោតក្រែង។ ពលរដ្ឋបានលើកឡើងបន្តថា៖ការកេងចំណេញលើស្ថាប័នរដ្ឋដោយបុគ្គលប្រព្រឹត្តខុសឆ្លងមួយក្តាប់តូចនេះបានធ្វើឱ្យប៉ះពាល់ដល់កិត្តិយសកងកម្លាំងយ៉ាងខ្លាំងពិសេសជាគំរូមិនល្អដល់កងកម្លាំងឯទៀតក៏ដូចជាប្រជាពលរដ្ឋផងដែរ។ ប្រភពដាច់ដោយឡែកមួយទៀតបានបញ្ជាក់ថា៖ពួកគាត់បានដឹងថារថយន្តពាក់ស្លាកលេខខេមរភូមិន្ទដឹកខ្សាច់ដឹកថ្មលក់នេះខ្លះមានបិទស្លាកសម្គាល់អង្គភាពនៅត្រង់ទ្វារថយន្ត។ខ្លះទៀតមិនមានបិទរថយន្តទាំងនោះបានដឹកជញ្ជូនខ្សាច់ពីទិសដៅខេត្តពោធិសាត់មកខេត្តបាត់ដំបងនិងត្រូវដឹកជញ្ជូនគ្រួសថ្មត្រឡប់ពីខេត្តបាត់ដំបងទៅខេត្តពោធិសាត់វិញ។ ការដឹកជញ្ជូនខ្សាច់មកដាក់លក់ឱ្យម៉ូយតាមដេប៉ូនៅក្នុងខេត្តបាត់ដំបងចន្លោះពីម៉ោង១២:០០នាទីរំលងអាធ្រាត្រទៅម៉ោង២:០០នាទីយប់និងដឹកជញ្ជូនថ្មពីខេត្តបាត់ដំបងទៅលក់ឱ្យម៉ូយតាមដេប៉ូនៅឯខេត្តពោធិសាត់វិញនោះចន្លោះពីម៉ោង៤:០០នាទីទាបភ្លឺដល់ម៉ោង៦:០០នាទីព្រឹក។ ករណីដដែលនេះក៏បានធ្វើប្រជាពលរដ្ឋនៅក្នុងបណ្តាញព័ត៌មានសង្គមលើកឡើងដោយទទូចសុំឱ្យមន្ត្រីជំនាញជួយពិនិត្យមើលលើបញ្ហសខាងលើនេះផងក្រែងមិនមែនជារថយន្តរបស់អង្គភាពទាហានពិតប្រាកដ ឬអាចជាការក្លែងបន្លំរបស់ឈ្មួញដើម្បីទាញយកផលប្រយោជន៍។ ជុំវិញបញ្ហានេះអ្នកព័ត៌មានយើងមិនមានមធ្យោបាយក្នុងការសុំសេចក្តីបញ្ជាក់ពីអង្គភាពគ្រប់គ្រងរថយន្តខ.មដឹកខ្សាច់ថ្មនោះបានទេ។ប៉ុន្តែទោះជាយ៉ាងណាយើងរង់ចាំការបកស្រាយពីម្ចាស់រថយន្តពាក់ព័ន្ធខាងលើនៅពេលក្រោយ។ មន្ត្រីយោធាយោធភូមិភាគទី៥ម្នាក់បានឱ្យដឹងថា៖រថយន្តដែលតែងដឹកខ្សាច់មកពីខេត្តពោធិ៍សាត់នោះមិនមែនជារថយន្តនៅក្នុងយោធភូមិភាគទី៥នោះទេ។ខាងភូមិភាគទី៥ក៏មិនមានបញ្ហានេះកើតឡើងដែរព្រោះមានវិន័យតឹងតែងបំផុតរឿងយករថយន្តអង្គភាពទៅបម្រើផលប្រយោជន៍បុគ្គលណាមួយ។ ចំណែកលោកសូប៉ុណ្ណារ៉ុងអនុប្រធានមន្ទីរសាធារណ:ការនិងដឹកជញ្ជូនខេត្តបាត់ដំបងបានប្រាប់ឱ្យដឹងកាលពីថ្ងៃទី៣១ខែឧសភាឆ្នាំ២០២០ថា៖លោកមិនហ៊ានបញ្ជាក់ច្រើនដែរ។តាមពិតទៅឡានរបស់កងទ័ពគឺសម្រាប់បម្រើតែការងារកងទ័ពប៉ុណ្ណោះ។សម្រាប់ការដឹកខ្សាច់ដឹកអីលក់នេះប្រហែលជាថៅកុងឡានគាត់ឆ្លៀតឱកាសខ្លះៗក៏មិនដឹងដែរ។ លោកបន្តថា៖ជាធម្មតាសម្រាប់ឡានស៊ីវិលកាលណាប្រកបអាជីវកម្មគឺត្រូវតែមានច្បាប់ធ្វើអាជីវកម្មដឹកជញ្ជូនពីក្រសួងសាធារណ:ការនិងដឹកជញ្ជូនតែសម្រាប់កងទ័ពស្ថាប័នផ្សេងៗគឺក្រសួងមិនមានសិទ្ធទេ៕
ចាប់នេន៣អង្គស្លៀកពាក់ស៊ីវិលចេញប្លន់ទូរសព្ទiphone និងលុយ
កំពង់ស្ពឺ៖កម្លាំងនគរបាលស្រុកបសេដ្ឋបានចាប់នេន៣អង្គបន្ទាប់ពីស្លៀកពាក់ជាពរដ្ឋរួចចេញប្លន់យកទូរសព្ទម៉ាក iphone និងលុយខ្មែរ២ម៉ឺនរៀលពីសង្ឃមួយអង្គបានសម្រេច។ករណីនេះបានកើតឡើងនៅវត្តស្វាយចារ្យ ឃុំស្តុក ស្រុកគងពិសីខេត្តកំពង់ស្ពឺកាលពីថ្ងៃទី១ ខែតុលាឆ្នាំ២០២២។លោក ចន សុភិត អធិការ នគរបាលស្រុកបសេដ្ឋបានឱ្យដឹងថា មានសង្ឃមួយអង្គព្រះនាម វ៉ាត សុខវៀត ព្រះជន្ម២០ព្រះវស្សា គង់នៅវត្តធម្មមង្គល ស្ថិតក្នុងភូមិត្រពាំងផ្លុង ឃុំភារីមានជ័យស្រុកបសេដ្ឋ ខេត្តកំពង់ស្ពឺបានមកដាក់ពាក្យបណ្តឹងថា កាលពីយប់ថ្ងៃទី៣០ ខែកញ្ញាមានជនសង្ស័យមួយក្រុមស្ទាក់ប្លន់យកទូរសព្ទម៉ាក iphone និងលុយខ្មែរ២ម៉ឺនរៀល ពេលដែលព្រះអង្គនិមន្តចេញពីវត្តទៅរកទិញបារី។ព្រះអង្គត្រូវបានគេវាយបណ្តាលឱ្យប៉ោងមុខ និងជាំភ្នែក។ក្រោយទទួលបានបណ្តឹងភ្លាមៗ កម្លាំងជំនាញក៏បានស្រាវជ្រាវឈានដល់ចាប់ខ្លួនគឺមាននេន៣អង្គយកទៅសាកសួរ។ក្នុងនោះ១-នាម ផុន មករា ព្រះជន្ម១៦ព្រះវស្សា-នាម ឌឿន វណ្ណដេតព្រះជន្ម១៦វស្សានិង-នាម រឿន ធារ៉ា ព្រះជន្ម១៤ព្រះវស្សាគង់បួសរៀននៅវត្តខាងលើ។លោកអធិការបានបន្តថា ក្រោយការសាកសួររបស់សមត្ថកិច្ចជំនាញនេនទាំង៣អង្គនេះបានសារភាពថា ពិតជាបានក្លែងខ្លួនស្លៀកពាក់ជាពលរដ្ឋប្លន់ព្រះសង្ឃ វ៉ាត សុខវៀត នោះមែន ហើយក៏វិលចូលវត្តវិញគ្រងស្បង់ធម្មតា។ កម្លាំងជំនាញក៏បានបញ្ជូនទៅមន្ទីរធម្មការ និងសាសនា ដើម្បីផ្សឹក ហើយបន្តនីតិវិធី៕