កំពង់ឆ្នាំង៖អ្នកនេសាទម្នាក់បានស្ម័គ្រចិត្ត ដោះលែងត្រីកម្រមួយក្បាល ប្រភេទត្រីរាជ ទម្ងន់៧៥គីឡូក្រាមប្រវែង១,៦ម៉ែត្រ ចូលក្នុងទន្លេធម្មជាតិវិញ ក្រោយនេសាទបានកាលពីថ្ងៃទី០១ ខែធ្នូឆ្នាំ២០២៣។តាមការផ្សព្វផ្សាយពីរដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទបានបញ្ជាក់ថា ក្នុងការដោះលែងត្រីរាជនោះ លោក ពុំ សុថា ប្រតិភូរាជរដ្ឋាភិបាល ទទួលបន្ទុកជាប្រធានរដ្ឋបាលជលផល បានថ្លែងកោតសរសើរដ៏ស្មោះជូនចំពោះលោក ហ្វា លី នៅភូមិគៀនឃ្លាំង ឃុំអំពិលទឹក ស្រុកកំពង់ត្រឡាច ខេត្តកំពង់ឆ្នាំង។លោកហ្វា លីបានស្ម័គ្រចិត្ត ដោះលែងត្រីដ៏កម្រមួយក្បាល ប្រភេទត្រីរាជទម្ងន់៧៥គីឡូក្រាមដែលមានប្រវែង១,៦ម៉ែត្រចូលក្នុងទន្លេធម្មជាតិវិញ បន្ទាប់ពីនេសាទបានកាលពីថ្ងៃទី១ ខែធ្នូ។ពីព្រោះសកម្មភាពនេះគឺជាគំរូដ៏ល្អ ក្នុងការរួមចំណែកថែរក្សា ការពារ និងអភិរក្សប្រភេទត្រីដែលកម្រនេះ។ជាមួយគ្នានេះរដ្ឋបាលជលផល ក៏បានអំពាវនាវដល់ប្រជានេសាទទាងអស់ សូមចូលរួមថែរក្សា និងការពារប្រភេទត្រីដែលកម្រនេះ ដោយលែងចូលក្នុងដែនទឹកធម្មជាតិវិញពេលនេសាទបាន។ ដើម្បីថែរក្សាវត្តមានរបស់ប្រភេទត្រីទាំងនេះសម្រាប់កូនចៅជំនាន់ក្រោយបានដឹង និងបានស្គាល់ប្រភេទត្រីធំៗនិងកម្រដែលជិតផុតពូជនោះ៕
Related Articles
មិនទាន់ដឹងមូលហេតុជនជាតិឡាវម្នាក់ជាបុគ្គលិកក្រុមហ៊ុនស្លាប់នៅក្រុងបាវិត
ស្វាយរៀង៖រហូតមកដល់ពេលនេះ សមត្ថកិច្ចមិនទាន់ដឹងពីមូលហេតុពិត ដែលបុរសជនជាតិឡាវម្នាក់ជាបុគ្គលិកក្រុមហ៊ុនវិនណើសបានស្លាប់នៅក្រុងបាវិត នោះនៅឡើយទេ។ហេតុការណ៍នេះបានកើតឡើង ក្នុងបរិវេណវត្តបុព្វារាម ហៅវត្តព្រៃយាយ ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀងកាលពីថ្ងៃទី៦ ខែមិថុនាឆ្នាំ២០២៣។មន្ត្រីនគរបាលបានមូលដ្ឋានបានឱ្យដឹងថា បុរសដែលស្លាប់ឈ្មោះសូវ៉ាន់ខេម ខាមផេង អាយុ៤៦ឆ្នាំ ជនជាតិឡាវ ជាបុគ្គលិកក្រុមហ៊ុនវិនណើស កាន់លិខិតឆ្លងដែនលេខៈP2582792 នៅខេត្តហ៊ផេន ប្រទេសឡាវ។ មុនកើតហេតុនគរបាលប៉ុស្ដិ៍រដ្ឋបាលបាវិតបានទទួលព័ត៌មានពីប្រជាពលរដ្ឋបានប្រាប់ថា នៅបរិវេណវត្តបុព្វារាម មានរថយន្តដឹកសពមកតម្កល់។ភ្លាមនោះ កម្លាំងនគរបាលក្រុងបាវិតបានសហការជាមួយ ផ្នែកបច្ចេកទេស-វិទ្យាសាស្រ្តនិងគ្រូពេទ្យបានចុះទៅដល់ទីតាំងនោះ។តាមការពិនិត្យនិងមានសាក្សីបំភ្លឺ ក្រុមការងារបានបញ្ជាក់ថា សាកសពអាចស្លាប់ដោយសារជំងឺ។ តែទោះយ៉ាងណាការស្លាប់នេះគេនៅមិនទាន់ដឹងច្បាស់ពីមូលហេតុពិតប្រាកដនៅឡើយទេ សមត្ថកិច្ចកំពុងស៊ើបអង្កេត។បច្ចុប្បន្នសាកសពត្រូវបាននាយដ្ឋាននគរបាលបច្ចេកទេស និងវិទ្យាសាស្ត្រដំកល់នៅវត្តទឹកថ្លា រាជធានីភ្នំពេញដើម្បីស្ថានទូតបន្តនីតីវិធី៕
បង្ក្រាបមធ្យោបាយដឹកឈើខុសច្បាប់ និងដកហូតឈើប្រណីតជិត១០០ដុំ
បាត់ដំបង៖កម្លាំងអាវុធហត្ថខេត្តជាមួយមន្ត្រីរដ្ឋបាលព្រៃឈើ បានសហការចុះបង្ក្រាបករណីដឹកឈើខុសច្បាប់ និងចាប់បានឈើប្រណីតចំនួន៩៩ដុំ។ករណីនេះធ្វើឡើងនៅភូមិអង់ សង្កាត់អូរចារ ក្រុងបាត់ដំបង កាលពីល្ងាចថ្ងៃទី១៨ ខែកញ្ញាឆ្នាំ២០២៣។មន្ត្រីរដ្ឋបាលព្រៃឈើបានឱ្យដឹងថា បន្ទាប់ពីទទួលព័ត៌មានសម្ងាត់ថា ក្រុមឈ្មួញដឹកជញ្ជូនឈើតាមគោយន្តកន្រៃ្ត និងរថយន្តកាមរីមានដឹកឈើប្រណីត។ក្រោយមកកម្លាំងសមត្ថកិច្ចបានចេញប្រតិបត្តិការចាប់បានគោយន្តកន្រៃ្តនិងរថយន្តកាមរីនោះ។ក្នុងនោះរកឃើញឈើប្រភេទបេង៤២ដុំ-ឈើកកោះ-គគីរ៣០ដុំ-ឈើមៀនព្រៃ២៧ដុំ សរុបចំនួន៩៩ដុំ-រថយន្តកាមរី១គ្រឿងនិងគោយន្តកន្ត្រៃ១គ្រឿង ។ម្ចាស់ឈ្មោះ ចយ សុខា អាយុ៤៥ឆ្នាំ ទីលំនៅភូមិអក្សរតេ ឃុំកំពង់ល្ពៅ ស្រុកសំឡូត ខេត្តបាត់ដំបង។ បន្ទាប់ពីចាប់បទល្មើសព្រៃឈើ កម្លាំងអាវុធហត្ថបានប្រគល់រថយន្ត-គោយន្តកន្ត្រៃ និងឈើខាងលើឱ្យជំនាញរដ្ឋបាលព្រៃឈើខេត្តបាត់ដំបងដើម្បីបន្តនីតិវិធី៕
អភិបាលខេត្តកំពង់ចាមជួបសំណេះសំណាលជាមួយពលរដ្ឋនិងពិនិត្យព្យាបាលជំងឺដោយឥតគិតថ្លៃ
កំពង់ចាម៖ ឯកឧត្តម អ៊ុនចាន់ដា អភិបាលខេត្តកំពង់ចាម និងជាប្រធានកិត្តិយសសាខាសមាគមសិស្ស និស្សិត បញ្ញវន្តក្មេងវត្ត ខេត្តកំពង់ចាមព្រឹកថ្ងៃទី១០ ខែឧសភាឆ្នាំ២០២៣នេះ បានអញ្ជើញជាអធិបតីក្នុងពិធីជួបសំណេះសំណាលប្រជាពលរដ្ឋក្នុងសង្កាត់វាលវង់ ក្រុងកំពង់ចាមនិងពិនិត្យព្យាបាលជំងឺដោយឥតគិតថ្លៃ។ក្នុងឱកាសនោះ ឯកឧត្តម អ៊ុន ចាន់ដាបានថ្លែងថា សុខភាពគឺជាកត្តាសំខាន់បំផុតសម្រាប់ប្រជាពលរដ្ឋគ្រប់ៗគ្នា។ ពិតមែនតែប្រទេសជាតិយើងបច្ចុប្បន្នមានមន្ទីរពេទ្យកាន់តែច្រើនទាំងរដ្ឋនិងឯកជន។ ប៉ុន្តែក៏មានប្រជាពលរដ្ឋមួយចំនួនតូច នៅខ្វះលទ្ធភាពទៅពិនិត្យ ប្រឹក្សានិងព្យាបាលជំងឺដល់មន្ទីរពេទ្យ។ ដូច្នេះថ្ងៃនេះក្រុមគ្រូពេទ្យស្ម័គ្រចិត្តរបស់បញ្ញវ័ន្តក្មេងវត្ត បានចុះមកដល់មូលដ្ឋានសង្កាត់ វាលវង់ ក្រុងកំពង់ចាម ដើម្បីផ្តល់សេវាលើការពិនិត្យ ប្រឹក្សា និងព្យាបាលជំងឺប្រគេនព្រះសង្ឃ និងជូនប្រជាពលរដ្ឋដោយឥតគិតថ្លៃ។ឯកឧត្តមថ្លែងបន្តថា ការជួបជុំប្រកបដោយភាពស្និទ្ធស្នាល និងកក់ក្តៅនាថ្ងៃនេះ ក៏ដោយសារកត្តាប្រទេសជាតិមានសុខសុខភាពពេញលេញ ក្រោមការដឹកនាំដ៏ឈ្លាសវៃ ប្រកបដោយគតិបណ្ឌិតរបស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា៕ញ៉ែម សុផល