ភ្នំពេញ៖ ក្រោមគ្រោងការជំនួយឧបត្ថម្ភឥតសំណង សម្រាប់គម្រោងទ្រង់ទ្រាយតូច សន្ដិសុខមនុស្សជាតិឬហៅថាជំនួយ គូសាណូណិ រដ្ឋាភិបាលជប៉ុន បានឯកភាពផ្ដល់ថវិកាចំនួន ៣១២.៤១៧ដុល្លារសហរដ្ឋអាមេរិកដល់អង្គភាពចំនួន៤បន្ថែមទៀតនៅកម្ពុជា។
សម្រាប់សាងសង់និងបំពាក់បរិក្ខារសុខាភិបាលការស្តារប្រព័ន្ធធារាសាស្ត្រឡើងវិញនិងដំឡើងឧបករណ៍ជំនួយដើម្បីផ្តល់ភាពងាយស្រួល ដល់ជនមានពិការភាពរាងកាយនៅខេត្តបាត់ដំបង,រតនគីរី,ព្រៃវែង,និងភ្នំពេញ។
កិច្ចសន្យាផ្តល់ជំនួយ ត្រូវបានចុះហត្ថលេខាជាផ្លូវការ នៅស្ថានទូតជប៉ុនប្រចាំកម្ពុជា នាព្រឹកថ្ងៃទី២០ ខែមីនានេះដោយលោកមិកាមិម៉ាសាហ៊ីរ៉ូឯកអគ្គរាជទូតជប៉ុនប្រចាំកម្ពុជានិងតំណាងអង្គភាពទទួលជំនួយទាំង៤។ថវិកាជាង៣១ម៉ឺនដុល្លារ សហរដ្ឋអាមេរិកនេះ នឹងយកទៅប្រើប្រាស់ សំរាប់គំរោងចំនួន៤។
ក្នុងនោះគម្រោងទី១៖គម្រោងសាងសង់អាគារសម្ភពក្នុងមណ្ឌលសុខភាពកំពង់ល្ពៅ ខេត្តបាត់ដំបង ដើម្បីសម្រួលឱ្យស្ត្រីមានផ្ទៃពោះ ធានានូវបរិស្ថានក្នុងពេលសម្រាលកូនប្រកបដោយ សុខសុវត្ថិភាព និងសមស្របជាងមុន។ គម្រោង៨៥.៧៩៩ដុល្លារ សហរដ្ឋអាមេរិកនេះផ្តល់ជូនមន្ទីរសុខាភិបាលខេត្ត បាត់ដំបង ។
គម្រោងទី២គឺគម្រោងសាងសង់មណ្ឌលសុខភាពល្បាំងមួយចំនួន១ខ្នងរួមបញ្ចូលបន្ទប់សេវាសុខភាពចំនួន១០ ក្នុងខេត្តរតនគីរី ។អង្គភាពទទួលជំនួយ គឺមន្ទីរសុខាភិបាល ខេត្តរតនគីរី មានទឹកប្រាក់ប្រមាណ ៩០.៥១៨ដុល្លារ។
គំរោងទី៣ទឹកប្រាក់៨៨.៣៧០ដុល្លារផ្តល់ជូនមន្ទីរធនធានទឹកនិងឧតុនិយមខេត្តព្រៃវែង សម្រាប់គំរោងស្តារឡើងវិញ នូវប្រព័ន្ធធារាសាស្ត្រ ពញាលាង នៅក្នុងឃុំអង្គ ស្រុកព្រះស្តេច ខេត្តព្រៃវែង។គំរោងទី៤គឺគំរោងដំឡើងឧបករណ៍នៅសមាគមផ្តល់រទេះរុញដើម្បីសង្គ្រោះនិងអភិវឌ្ឍន៍ ដើម្បីផ្តល់ភាពងាយស្រួលដល់ជនមានពិការភាពរាងកាយនៅកម្ពុជា។គម្រោងនេះមានទឹកប្រាក់ប្រមាណ៤៧.៧៣០ដុល្លារអាមេរិក។
លោក មិកាមិ ម៉ាសាហ៊ីរ៉ូ ឯកអគ្គរាជទូតជប៉ុន ប្រចាំកម្ពុជា បានមានប្រសាសន៍ថា៖បើទោះបីជាកម្ពុជា មានការរីកចំរើនក៏ដោយប៉ុន្តែជប៉ុន ទទួលស្គាល់ថានៅកម្ពុជាក៏នៅមានបញ្ហាប្រឈមមួយចំនួន ដែលត្រូវរួមគ្នាដោះស្រាយ ដើម្បីលើកកម្ពស់គុណភាពជីវភាព របស់ប្រជាជន។ប្រទេសជប៉ុន នឹងបន្ដចូលរួមចំណែក ក្នុងការដោះស្រាយបញ្ហា ប្រឈមទាំងនោះតាមរយៈក្របខណ្ឌសហប្រតិបត្តិការ សេដ្ឋកិច្ច និងអភិវឌ្ឍន៍ផ្សេងៗ រួមទាំង ជំនួយគូសាណូណិ។
លោកឯកអគ្គរាជទូត បានឱ្យដឹងថា៖រដ្ឋាភិបាលជប៉ុន បាននិងកំពុងអនុវត្តកម្មវិធីគូសាណូណិនៅកម្ពុជា ចាប់ពីតាំងពី ឆ្នាំ១៩៩១ ហើយដែលរហូតដល់ពេលនេះស្ថានទូតជប៉ុនប្រចាំកម្ពុជាបានផ្ដល់ជំនួយច្រើន ជាង៦០០គម្រោង តាមរយៈជំនួយគូសាណូណិនេះ៕សុផល
