កំពង់ស្ពឺៈរថយន្តធុនធំបានបើកបុកអ្នកជិះម៉ូតូពីក្រោយបណ្តាលឱ្យបុរសម្នាក់បានស្លាប់នៅនឹងកន្លែង។ហេតុការណ៍នេះបានកើតឡើងនៅតាមបណ្តោយផ្លូវជាតិលេខ៤ចន្លោះគីឡូម៉ែត្រលេខ៣៤នឹង៣៥ក្នុងភូមិសង្គ្រោះជាតិឃុំត្រពាំងគង ស្រុកសំរោងទងខេត្តកំពង់ស្ពឺកាលពីយប់ថ្ងៃទី២០ខែធ្នូឆ្នាំ២០១៩។
មន្ត្រីនគរបាលបានឱ្យដឹងថាមុនពេលកើតហេតុគេឃើញរថយន្តម៉ាកAmericanស្លាកលេខព្រះសីហនុ3A1990។អ្នកបើកបរមិនស្គាល់មិនស្គាល់អត្តសញ្ញាណព្រោះក្រោយពេលកើតហេតុចុះរត់គេចខ្លួនបាត់។រថយន្តបានទៅបុកម៉ូតូស្លាកលេខភ្នំពេញ1HY-7426 អ្នកបើកបរឈ្មោះ ឆេង មករា ភេទប្រុស អាយុ២៣ ឆ្នាំ រស់នៅភូមិស្វាយស្រណោះទី២ ឃុំរកាអារ ស្រុកកងមាស ខេត្តកំពង់ចាម។
ប្រភពបានបន្តថារថយន្តបុកម៉ូតូពីក្រោយពេញទំហឹងបណ្តាលឱ្យម៉ូតូជនរងគ្រោះជិះម្នាក់ឯងដួលហើយត្រូវរថយន្តកិនអូសបណ្តាលឱ្យជនរងគ្រោះស្លាប់ភ្លាមៗ។ក្រោយកើតហេតុមន្ត្រីនគរបាលជំនាញបានយកមធ្យាបាយទាំងពីរគ្រឿងទៅរក្សាទុកនៅអធិការដ្ឋាននគរបាលស្រុកសំរោងទងរង់ចាំដោះស្រាយនៅពេលក្រោយ៕