ព័ត៌មានអន្តរជាតិ៖ក្រសួងការបរទេសចិននិយាយថាខ្លួនបានតវ៉ាយ៉ាងខ្លាំងក្លានៅក្នុងការឆ្លើយតបរបស់ខ្លួនទៅនឹងអ្វីដែលខ្លួនហៅថាការអះអាងកម្មសិទ្ធិដោយខុសច្បាប់ពីភាគីវៀតណាមនៅក្នុងសមុទ្រចិនខាងត្បូងនិងថា«ការប៉ុនប៉ងណាមួយដើម្បីបដិសេធចោលអធិបតេយ្យភាពចិន នឹងត្រូវបរាជ័យ»។
អ្នកនាំពាក្យក្រសួងការបរទេសចិនលោកហ្គេងសួងបាននិយាយដូច្នេះនៅក្នុងសន្និសីទសារព័ត៌មានប្រចាំថ្ងៃកាលពីថ្ងៃអង្គារទី២១មេសា បន្ទាប់ពីវៀតណាមបានស្រែកតវ៉ានិងថ្កោលទោសកិច្ចខិតខំវាតទីរបស់ចិននៅក្នុងដែនទឹកមានជម្លោះ រួមទាំងបានដាក់លិខិតតវ៉ាមួយទៅកាន់អង្គការសហប្រជាជាតិផង។
កាលពីសប្តាហ៍មុន វៀតណាមបានធ្វើការប្រឆាំងតវ៉ាជាខ្លាំងចំពោះអ្វីដែលខ្លះអះអាងថា ការមិនគោរពច្បាប់អន្តរជាតិនិងការរំលោភអធិបតេយ្យភាពរបស់វៀតណាមពីសំណាក់ចិន ដោយសារតែរដ្ឋាភិបាលក្រុងប៉េកាំងប្រកាសបង្កើតស្រុក២នៅលើប្រជុំកោះក្នុងសមុទ្រចិនខាងត្បូង ដែលវៀតណាមហៅថាសមុទ្រខាងកើត។យោងតាមសារព័ត៌មាន ចិនបង្កើតស្រុក«ស៊ីសា» និង«ណាន់សា»នៅលើប្រជុំកោះប៉ារ៉ាសែល និង ស្ព្រាតលី។
អ្នកនាំពាក្យក្រសួងការបរទេសវៀតណាមកាលពីថ្ងៃអាទិត្យ បាននិយាយថា«វៀតណាមមានមូលដ្ឋានច្បាប់ពេញលេញនិងភស្តុងតាងប្រវត្តិសាស្ត្រដើម្បីបញ្ជាក់អះអាងអធិបតេយ្យភាពរបស់ខ្លួនលើប្រជុំកោះទាំងនេះ។វៀតណាមសូមប្រឆាំងដាច់ខាត ការបង្កើត”ទីក្រុងសាន់សា” និងសកម្មភាពពាក់ព័ន្ធ ដោយសារវារំលោភអធិបតេយ្យភាពវៀតណាម …វាមិនមានតម្លៃនិងមិនមានប្រយោជន៍ចំពោះទំនាក់ទំនងមិត្តភាពរវាងប្រទេសទាំងពីរ ។
តែធ្វើឱ្យសភាពការណ៍នៅសមុទ្រខាងកើត តំបន់និងពិភពលោកកាន់តែស្មុគស្មាញឡើង»។រូបភាពកោះវូតឌី នៅប្រជុំកោះប៉ារ៉ាសែលដែលចិនបង្កើតទីក្រុងសាន់សា។ចិនកាលពីថ្ងៃសៅរ៍បានប្រកាសបង្កើស្រុក២នៅប្រជុំកោះប៉ារ៉ាសែលនិងស្ត្រាតលី ជាហេតុនាំឱ្យវៀតណាមផ្ទុះកំហឹង។
សូមរំលឹកថា ចិនបានវាយដណ្តើមយកប្រជុំកោះប៉ារ៉ាសែលពីវៀតណាមខាងត្បូងនៅឆ្នាំ១៩៧៤ និងបានកាន់កាប់ចាប់តាំងពីគ្រានោះមក។ចិនក៏បានប្រកាសបង្កើតទីក្រុងសាន់សានៅលើកោះវូតឌីចាប់តាំងពីឆ្នាំ២០១២ និងសាងសង់កោះសិប្បនិម្មិតជាច្រើននៅក្នុងដែនទឹកនៃតំបន់នោះ៕Rasmi news
