អន្តរជាតិ៖នាយករដ្ឋមន្ត្រីរុស្ស៊ីលោកមីខាអ៊ីលមីស៊ូទីនបានប្រាប់ប្រធានាធិបតីវ្ល៉ាឌីមៀពូទីនកាលពីថ្ងៃព្រហស្បតិ៍ទី៣០មេសាឆ្នាំ២០២០ថាលោកត្រូវបានពិនិត្យឃើញមានវីរុសកូរ៉ូណានិងបានសុំឈប់សម្រាកបណ្តោះអាសន្នដើម្បីព្យាបាលជំងឺ។លោកមីស៊ូទីន វ័យ៥៤ឆ្នាំ បានស្នើសុំឱ្យលោកឧបនាយករដ្ឋមន្ត្រីទី១ អង់ដ្រេ បេឡូសូវធ្វើជានាយករដ្ឋមន្ត្រីស្តីទី ក្នុងពេលអវត្តមានរបស់លោក។
លោកពូទីន ដែលបានស្តាប់សំណើតាមវីដេអូខនហ្វើរិន បានយល់ព្រម និងបានជូនពរលោកមីស៊ូទីន ឱ្យឆាប់ជា។លោកមីស៊ូទីន ដែលចូលរួមក្នុងកិច្ចការឆ្លើយតបនឹងជំងឺកូវីដ១៩ក្នុងប្រទេស ជាមន្ត្រីជាន់ខ្ពស់រុស្ស៊ីដំបូងដែលប្រកាសថាលោកឆ្លងកូវីដ១៩។ការប្រកាសរបស់លោកកើតឡើងនៅពេលតែប៉ុន្មានម៉ោងបន្ទាប់ពីអាជ្ញាធររុស្ស៊ីបានប្រកាសថា ការឆ្លងជំងឺនេះឡើងហួស១០០.០០០នាក់។
មីស៊ូទីន នឹងចំណាយពេលនៅដោយឡែកពីគេនៅមន្ទីរពេទ្យមួយក្រោមការមើលថែពីវេជ្ជបណ្ឌិតជាច្រើននាក់។ រីឯអ្នកដែលធ្លាប់ទាក់ទងជាមួយលោកកាលពីពេលថ្មីៗក៏នឹងត្រូវដាក់នៅដោយឡែកនិងធ្វើតេស្តរកវីរុស។រុស្ស៊ី បានវ៉ាហួសចិននិងអ៊ីរ៉ង់ ខាងចំនួនអ្នកឆ្លងវីរុសកូរ៉ូណា នៅពេលប្រទេសនេះមានអ្នកឆ្លងឡើងដល់១០៦.៤៩៨នាក់កាលពីថ្ងៃព្រហស្បតិ៍ បន្ទាប់ពីការឆ្លងប្រចាំថ្ងៃបានកើនជាប់។
រុស្ស៊ីមានអ្នកស្លាប់ដោយជំងឺកូវីដ១៩នេះចំនួន ១.០៧៣ នាក់ ដោយទាបជាងចំនួនស្លាប់នៅក្នុងប្រទេសរងគ្រោះខ្លាំងជាច្រើន។វាស្ថិតក្រោមការបិទខ្ទប់ចរាចរណ៍និងអាជីវកម្មដល់សប្តាហ៍ទី៥មកទល់ឥឡូវ ជាហេតុនាំឱ្យមានការព្យាករណ៍ថា សេដ្ឋកិច្ចរុស្ស៊ីនឹងថយក្រោយ៤ទៅ៦ភាគរយ ដោយសារតែបញ្ហាប្រេងធ្លាក់ថ្លៃគួបផ្សំផង៕Rasmei news
