រតនគិរី៖ស្ត្រីម្នាក់បានដួលនៅក្នុងបន្ទប់ទឹកក្នុងពន្ធនាគារភ្នំស្វាយហើយបានស្លាប់ពេលបញ្ជូនទៅមន្ទីរពេទ្យបង្អែកខេត្ដរតនគិរី។ហេតុការណ៍នេះ បានកើតឡើង កាលពីវេលារំលងអធ្រាត្រឈានចូលថ្ងៃទី២០ខែឧសភា ឆ្នាំ២០២០។
ប្រភពពីមន្ត្រីពន្ធនាគារ ភ្នំស្វាយ បានឱ្យដឹងថា កាលពីវេលារំលងអធ្រាត្រ ឈានចូលថ្ងៃទី២០ ខែឧសភា ឆ្នាំ២០២០ ស្ត្រីអ្នកទោសម្នាក់ ឈ្មោះ បិន យាង អាយុ៥៥ឆ្នាំ ជនជាតិខ្មែរ ជាកសិករ មានទីលំនៅ ភូមិកែងសាន់ ឃុំសេដា ស្រុកលំផាត់ ខេត្ដរតនគិរី បានដួលនៅបន្ទប់ទឹក ខណ:ពេលគាត់ ចូលទៅបត់ជើង នៅទីនោះ។
បន្ទាប់ពីស្ត្រីនោះដួល នៅក្នុងបន្ទប់ទឹក អ្នកទោសផ្សេងទៀតបានស្រែកប្រាប់ឱ្យគេជួយអន្ដរាគមន៍។ភ្លាមៗនោះ គ្រូពេទ្យប្រចាំការ នៅពន្ធនាគារ ក៏បានពិនិត្យ និងសង្គ្រោះ រួចបញ្ជូនទៅកាន់មន្ទីរពេទ្យខេត្ដ ដើម្បីសង្គ្រោះបន្ដ។
លោក អ៊ុក គឹមជន ប្រធានពន្ធនាគារ ខេត្តរតនគិរី កាលពីរសៀល ថ្ងៃទី២០ ខែឧសភា បានឱ្យដឹងតាមទូរស័ព្ទថា ស្ត្រីម្នាក់នោះ គឺជាជនសង្ស័យពាក់ព័ន្ធការចូលកាន់កាប់ដីមួយកន្លែងក្នុងដែលជម្រកសត្វព្រៃ លំផាត់។ប្រធានពន្ធនាគារ បានបញ្ជាក់ថា ស្ត្រីនោះ ត្រូវឃុំខ្លួនជាបណ្ដោះអាសន្ន កាលពីខែកុម្ភៈ ឆ្នាំ២០២០ ហើយមកដល់ពេលនេះ នៅមិនទាន់កាត់ទោស នៅឡើយទេ។ ពិរុទ្ធជនរូបនេះ មានជំងឺប្រចាំកាយ គឺលើសឈាម និងជំងឺទឹកនោមផ្អែម។
នៅយប់ថ្ងៃទី១៩ ឈានចូលថ្ងៃទី២០ ខែឧសភា គាត់មានអាការធម្មតា តែពេលចូលបន្ទប់ទឹក ឮថា គាត់ដួល ហើយគ្រូពេទ្យប្រចាំការ នៅទីនោះ ក៏បានជួយពិនិត្យ និងបញ្ជូនទៅមន្ទីរពេទ្យបង្អែកខេត្ដរតនគិរី រួចក៏ស្លាប់ទៅ។
លោក ហ៊ីង ផានសគន្ធា ប្រធានមន្ទីរពេទ្យ បង្អែកខេត្ដរតនគិរី នៅរសៀលថ្ងៃទី២០ ខែឧសភា នេះ បានប្រាប់តាមទូរស័ព្ទថា ស្ត្រី ដែលស្លាប់នោះ សាច់ញាតិរបស់គាត់ បានប្រាប់ថា គាត់មានជំងឺលើសឈាម និងទឹកនោមផ្អែម ជាយូរឆ្នាំមកហើយ។
ជំងឺនេះ មានហានិភ័យខ្ពស់ណាស់ គេត្រូវការពារ មិនឱ្យដួលទេ ព្រោះថា បើដួលហើយ ត្រូវតែពិការ ឬក៏ស្លាប់។ប្រធានមន្ទីរពេទ្យបង្អែក បាននិយាយថា សពស្ដ្រីនោះ បានត្រូវប្រគល់ឱ្យសាច់ញាតិ នៅព្រឹកថ្ងៃទី២០ ខែឧសភា នេះ។ សាច់ញាតិ បានដឹកសព ទៅតម្កល់នៅវត្ដបីស្រុក ដើម្បីធ្វើបុណ្យតាមប្រពៃណី។
គួររំលឹកថា កាលពីថ្ងៃទី២៧ ខែកុម្ភ: ឆ្នាំ២០២០ មន្ត្រីបរិស្ថានខេត្ដមួយក្រុម បានទៅចាប់ខ្លួនមនុស្ស ពីរនាក់ គឺស្ត្រីឈ្មោះ បិន យាង អាយុ៥៥ឆ្នាំ ជនជាតិខ្មែរ និងលោក អ៊ុ ធា ភេទប្រុស អាយុ៥២ឆ្នាំ ជនជាតិខ្មែរលើទំពួន ជាកសិករ។ ពួកគេមានទីលំនៅ ភូមិកែងសាន់ ឃុំសេដា ស្រុកលំផាត់ ខេត្ដរតនគិរី។ មន្ដ្រីបរិស្ថាន បានចោទថា បានពាក់ព័ន្ធករណីកាន់កាប់ដី ដែនជម្រកសត្វព្រៃ លំផាត់ ដោយខុសច្បាប់ នៅត្រង់ចំណុចអូរជីប ឃុំសេដា ស្រុកលំផាត់៕សុវណ្ណ