ដោយៈចាន់តូ/ភ្នំពេញ:យុវជនម្នាក់បានស្លាប់និងរងរបួសធ្ងន់២នាក់បន្ទាប់ពីជិះម៉ូតូឌុបគ្នា៣នាក់បញ្ច្រាស់ទិសយ៉ាងលឿនទៅបុករថយន្តឡិចស៊ីសកាលពីយប់ទៀបភ្លឺចូលថ្ងៃទី៥ខែកញ្ញាឆ្នាំ២០២០ត្រង់ចំណុចស្តុបផ្លូវជាតិលេខ៤កែងនិងផ្លូវវិមានឈ្នះឈ្នះ ក្នុងភូមិអង្គកែវ សង្កាត់ចោមចៅទី៣ ខណ្ឌពោធិ៏សែនជ័យ។
អ្នកស្លាប់មានឈ្មោះ ម៉ៃ មីត ភេទប្រុស អាយុ១៩ឆ្នាំ ជនជាតិខ្មែរ មានស្រុកកំណើតនៅភូមិបុសតាឯក ឃុំទ្រា ស្រុកស្ទោង ខេត្តកំពង់ធំ ចំពោះអ្នករងរបួសមិនត្រូវបានស្គាល់អត្តសញ្ញាណនៅឡើយ ដោយជិះម៉ូតូឌុបគ្នា៣នាក់ ម៉ាកនិច ពណ៌ក្រហមលាយស ពាក់ស្លាកលេខកណ្តាល1Y.2802 ។ ចំណែកឯរថយន្តម៉ាកឡិចស៊ីសRX300ពណ៌សពាក់ស្លាកលេខភ្នំពេញ2T.7858បើកបរដោយបុរសម្នាក់។
ក្រោយពីកើតហេតុសមត្ថកិច្ចបានចុះមកដល់កន្លែងកើតហេតុហើយក៏ទាក់ទងទៅជំនាញផ្នែកចរាចរណ៍ឱ្យមកវាស់វែងយកម៉ូតូនិងរថយន្តទៅរក្សាទុករង់ចាំដោះស្រាយគ្នានៅពេលក្រោយ។ដោយឡែកសពសមត្ថកិច្ចធ្វើកំណត់ហេតុរួចដឹកយកទៅវត្តទឹកថ្លារង់ចាំសាច់ញាតិមកយកទៅធ្វើបុណ្យតាមប្រពៃណី៕