ភ្នំពេញៈ អភិបាលខេត្តបាត់ដំបង បានបញ្ជាក់ថាៈព្រះសង្ឃចំនួន ៤៦អង្គ ដែលមានអាការៈក្តៅខ្លួន ក្អក ហៀរសំបោរ រយៈពេល ៦ថ្ងៃ គឺមកដល់ពេលនេះ បានធូរស្រាលហើយ ដោយមន្ត្រីសុខាភិបាល បានយកសំណាក របស់ព្រះសង្ឃ បញ្ជូនមកមន្ទីរពិសោធន៍ នៅរាជធានីភ្នំពេញហើយ។ ប៉ុន្តែលទ្ធផលយ៉ាងនោះ នៅមិនទាន់ដឹងនៅឡើយទេ ដោយរង់ចាំលទ្ធផល ចេញមកសិន ទើបបានដឹងច្បាស់។
លោក ងួន រតនៈ អភិបាលខេត្តបាត់ដំបង បានឱ្យដឹងកាលពីព្រឹកថ្ងៃទី១៤ ខែកញ្ញាឆ្នាំ២០២០ថាៈ មកដល់ពេលនេះ ព្រះសង្ឃទាំង៤៦អង្គ បានធូរស្រាលហើយ។ចំពោះមុខ មន្ត្រីសុខាភិបាល បានយកសំណាករបស់ ព្រះសង្ឃ ដើម្បីបញ្ជូនទៅរាជធានីភ្នំពេញ ដាក់ចូលឡាបូ ហើយនៅល្ងាចថ្ងៃទី១៤ ខែកញ្ញា នៅមិនទាន់ទទួលបាន លទ្ធផលនៅឡើយទេ។ព្រះសង្ឃទាំង៤៦អង្គ បានដាក់នៅដាច់ដោយ នៅក្នុងវត្តស្វាយដង្គំ។
ប្រធានមន្ទីរសុខាភិបាលខេត្តបាត់ដំបង បានឱ្យដឹងថាៈ មានករណីក្តៅខ្លួនជាង ៣៧អង្សា ក្អក ហៀរសំបោរ រយៈពេល ៦ថ្ងៃហើយ កើតមានចំពោះព្រះសង្ឃ ចំនួន ៤៦ អង្គ មានព្រះជន្មពី ១១-១៩ ព្រះវស្សា គង់នៅវត្តស្វាយដង្គំ ស្រុកឯកភ្នំ ខេត្តបាត់ដំបង ដែលនិមន្តមកពី តាមខេត្តនានា ដើម្បីសិក្សានៅសាលាពុទ្ធិក បឋមសិក្សា ក្នុងវត្តស្វាយដង្គំ ហើយទទួលការព្យាបាល បានធូរស្រាលខ្លះៗហើយ។
បន្ទាប់ពីទទួលបានព័ត៌មាន និងការណែនាំរបស់លោក ងួន រតនៈ អភិបាលខេត្តបាត់ដំបង កាលពីយប់ថ្ងៃទី១៣ ខែកញ្ញា ឆ្នាំ២០២០ ក្រុមការងារ មន្ទីរសុខាភិបាលខេត្ត ដឹកនាំដោយលោកវេជ្ជបណ្ឌិត អ៊ុក វិទ្យា អនុប្រធានមន្ទីរ លោកប្រធានស្រុកប្រតិបត្តិសង្កែ និងសហការី បានចុះពិនិត្យ និងយកសំណាកព្រះសង្ឃ ទាំង៤៦អង្គ បញ្ជូនមករាជធានីភ្នំពេញ។
ក្រុមការងារ បានណែនាំ លោកអាចារ្យ គណៈគ្រប់គ្រងសាលាពុទ្ធិកៈ ឱ្យចេះអនុវត្តនូវ វិធានអនាម័យ ការពារខ្លួន ពាក់ម៉ាស់ ឆាន់ទឹកក្តៅ។ ការកំណត់ស្ថានភាពរួម ជាបឋម មិនមានភាពធ្ងន់ធ្ងរទេ ប៉ុន្តែត្រូវបន្តតាមដាន ដោយយកចិត្តទុកដាក់ ជាបន្តទៀត។ចំណែកលោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យ ក្រសួងសុខាភិបាល បានបញ្ជាក់ថាៈ ព្រះសង្ឃ ប្រហែលជាងពាក់កណ្តាល នៃចំនួនខាងលើ បានជាសះស្បើយ បន្ទាប់ពីបានទទួល ការព្យាបាល ពីក្រុមគ្រូពេទ្យ ខេត្តបាត់ដំបង។
ព្រះសង្ឃដែលនៅមាន រោគសញ្ញាសង្ស័យ ក្រុមគ្រូពេទ្យ ខេត្តបាត់ដំបង បានយកវត្ថុសំណាកព្រះសង្ឍ ចំនួន ២១អង្គ ផ្ញើទៅធ្វើវិភាគ នៅវិទ្យាស្ថានប៉ាស្ទ័រកម្ពុជា កាលពីព្រឹកថ្ងៃទី១៤ ខែកញ្ញា រួចហើយៗ កំពុងតែរង់ចាំលទ្ធផល ហើយមន្ទីរសុខាភិបាល ខេត្តបាត់ដំបង ក៏បានធ្វើការអប់រំណែនាំព្រះសង្ឃ លោកតាអាចារ្យវត្ត និងគណៈគ្រប់គ្រង សាលាពុទ្ធិកៈនៅទីនោះ រួចហើយ ។
បច្ចុប្បន្ននេះ ស្ថានភាពសុខភាព ព្រះសង្ឃដែលឈឺនោះ មានការវិវត្តទៅរក ភាពល្អប្រសើរហើយ ដោយការសន្និដ្ឋានបឋម ពីក្រុមគ្រូពេទ្យ គឺសង្ស័យជំងឺគ្រុនផ្តាសាយធំ ៕សុភាព