ភ្នំពេញៈ សំណង់អគារ ធ្វើការងារថ្មី កម្ពស់៩ជាន់នៃស្នងការដ្ឋាននគរបាល រាជធានីភ្នំពេញ ដំណើរការសាងសង់មកដល់ពេលនេះ សម្រេចបានលទ្ធផល ៥០ ភាគរយហើយ ។ ក្រុមវិស្វករ និងជាងសំណង់ នៅតែបន្តសម្រុក សាងសង់យ៉ាងមមាញឹក ដើម្បីអនុវត្តសម្រេចឱ្យបាន រួចរាល់តាមផែនការគ្រោងទុក សម្រាប់ឱ្យមន្ត្រីនគរបាល រាជធានីភ្នំពេញ បំពេញភារកិច្ច ផ្តល់សេវាសន្តិសុខ និងសេវារដ្ឋបាល ជូនប្រជាពលរដ្ឋ ឱ្យកាន់ល្អតែប្រសើរ។
លោកឧត្តមសេនីយ៍ឯក ស ថេត អគ្គស្នងការរង នគរបាលជាតិ និងជាស្នងការនគរបាល រាជធានីភ្នំពេញ និងសហការី កាលពីព្រឹក ថ្ងៃទី១៤ ខែកញ្ញា ឆ្នាំ២០២០ បានអញ្ជើញចុះត្រួតពិនិត្យ សំណង់អគារថ្មីនេះ ដែលបានចាក់ប្លង់សេ ដល់ជាន់ទី៩ ។
លោកឧត្តមសេនីយ៍ឯក ស ថេត ក៏បានណែនាំដល់ម្ចាស់ក្រុមហ៊ុន ម៉ៅការសំណង់ និងក្រុមវិស្វករ ដែលទទួលម៉ៅការ សាងសង់អគារថ្មី បង្កើនការកសាង ឱ្យបានលឿន ឆាប់រហ័ស រឹងមាំ ជាពិសេសត្រូវកសាង ឱ្យបានត្រឹមត្រូវ តាមបទដ្ឋានបច្ចេកទេសសំណង់ ដោយធានាឱ្យបានគុណភាព សុវត្ថិភាពខ្ពស់។
សូមបញ្ជាក់ថា សំណង់ការដ្ឋានអគារថ្មី កម្ពស់៩ជាន់នៃស្នងការដ្ឋាននគរបាល រាជធានីភ្នំពេញ កសាងឡើង ជំនួសអគារចាស់ ដែលមានសភាព ចាស់ទ្រុឌទ្រោម។ អគារថ្មីនេះ ចាប់ផ្តើមកសាង ក្នុងអំឡុងដើមខែធ្នូ ឆ្នាំ២០១៩ មានទំហំ ៤០ ម៉ែត្រគុណ ៥០ម៉ែត្រ។
បច្ចុប្បន្ន កសាងដល់ដំណាក់កាល ចាក់ប្លង់សេជាន់ទី៩ នៃសំណង់អគារ។ អគារថ្មី ស្នងការដ្ឋាននគរបាល រាជធានីភ្នំពេញ គ្រោងនឹងកសាងឱ្យរួចរាល់ នៅចុងឆ្នាំ២០២១ ខាងមុខ ដែលដឹកនាំកសាងផ្ទាល់ ពីលោកឧត្តមសេនីយ៍ឯក ស ថេត ក្រោមការជួយឧបត្ថម្ភគាំទ្រ ពីសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងនាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ។
ក្នុងនោះក៏មានការចូលរួម ពីសប្បុរសជននានា ក្នុងរាជធានីភ្នំពេញ ដើម្បីកែប្រែកន្លែងធ្វើការងារ របស់នគរបាលជាតិ នៃស្នងការដ្ឋាននគរបាល រាជធានីភ្នំពេញ ឱ្យមានកន្លែងការងារទំនើប តាមស្តង់ដា ស្របតាមភាពរីកចម្រើន នៃប្រទេសជាតិ៕សុភាព
