កំពង់ចាម: លោកនាយឧត្តមសេនីយ៍ មាស វិរិទ្ធ អគ្គលេខាធិការអាជ្ញាធរជាតិ ប្រយុទ្ធប្រឆាំងគ្រឿងញៀនបានអះអាងថារយ:ពេល២៦៤ថ្ងៃឆ្នាំនេះក្នុងប្រតិបត្តិការប្រយុទ្ធប្រឆាំងគ្រឿងញៀនខុសច្បាប់ទូទាំងប្រទេសបង្ក្រាបបានចំនួន ៧.៥២៨ ករណី និងចាប់បានជនសង្ស័យ ១៥.១៤៨ នាក់។
លោកនាយឧត្តមសេនីយ៍បានថ្លែងយ៉ាងដូច្នេះនៅក្នុងឱកាសដែលលោកចូលរួមក្នុងកិច្ចប្រជុំផ្សព្វផ្សាយរបាយការស្តីពីលទ្ធផលការងារត្រួតពិនិត្យគ្រឿងញៀន ឆមាសទី១ និងលើកទិសដៅឆមាសទី២ ឆ្នាំ២០២០របស់គណ:កម្មាធិការត្រួតពិនិត្យគ្រឿងញៀន ខេត្តកំពង់ចាម នៅសាលាខេត្តនេះនាព្រឹកថ្ងៃទី ២២ ខែកញ្ញា ឆ្នាំ២០២០។
លោកអគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀនបានបន្តថា បង្ក្រាបបានចំនួន ៧.៥២៨ ករណី រយ:ពេល ២៦៤ ថ្ងៃនេះ គឺមានន័យថា ក្នុងមួយថ្ងៃបង្ក្រាបបានចំនួន ២៩ ករណី ។ ចាប់ខ្លួនជនល្មើសសរុបចំនួន ១៥.១៤៨ នាក់ គឺក្នុងមួយថ្ងៃចាប់បានចំនួន ៥៧ នាក់។
លោក មាស វិរិទ្ធ បញ្ជាក់ទៀតថា ក្នុងចំនួនជាង ៧.០០០ករណីនេះ មានចំនួន ៤.៨០៤ ករណីជាករណីជួញដូរគ្រឿងញៀន ដែលក្នុងមួយថ្ងៃបង្ក្រាបបានចំនួន ១៨ ករណី និងចាប់ឃាត់ខ្លួនមនុស្សជាជនសង្ស័យសរុបចំនួន៩.០០៨នាក់គឺមួយថ្ងៃបង្ក្រាបបានបញ្ជូនទៅកាន់ស្ថាបនតុលាការចំនួន ៣៤ នាក់។
លោក អ៊ុន ចាន់ដា អភិបាលខេត្តកំពង់ចាមបានមានប្រសាសន៍ថា ឆមាសទី១ ឆ្នាំ២០២០នេះខេត្តកំពង់ចាមបានប្រយុទ្ធប្រឆាំងគ្រឿងញៀនខុសច្បាប់ បង្ក្រាបបានចំនួន ១៩៩ ករណី និងចាប់ឃាត់ខ្លួនជនសង្ស័យបញ្ជួនទៅកាន់តុលាការឃុំខ្លួនចំនួន ៧០៣ នាក់។ ចំនួននេះបើប្រៀបធៀបទៅរយ:ពេលដូចគ្នាកាលពីឆ្នាំ២០១៩ គឺបង្ក្រាបបានចំនួន ១០០ ករណី និងឃាត់ខ្លួនបានចំនួន ២៩៨ នាក់ប៉ុណ្ណោះ។
លោកអភិបាលខេត្តកំពង់ចាមបន្តទៀតថានេះបង្ហាញពីការខិតខំប្រឹងប្រែងរបស់សមត្ថកិច្ចយើងដែលនាំឱ្យការបង្ក្រាបមានការកើនឡើង។មួយវិញទៀតក៏បង្ហាញពីការប្តេជ្ញាចិត្តរួមគ្នាបើទោះជាភូមិសាស្ត្រខេត្តកំពង់ចាមមិនជាកន្លែងផលិតគ្រឿងញៀនរបស់ក្រុមឧក្រិដ្ឋជនក៏ដោយ ប៉ុន្តែវាបានចរាចរណ៍ និងត្រូវបានប្រើប្រាស់ធ្វើជាកន្លែងជួញដូរនិងចែកចាយបណ្តាលឱ្យប៉ះពាល់ដល់ប្រជាពលរដ្ឋក្នុងសហគមន៍៕សម្បត្តិ
