ស្ទឹងត្រែង៖ទឹកទន្លេមេគង្គដែលហូរកាត់ខេត្តស្ទឹងត្រែងប្រទេសកម្ពុជាមានការប្រែប្រួលខ្លាំងនៅឆ្នាំនេះ ។ដោយនៅក្នុងខែវស្សាទឹកនៅបាតទន្លេនៅឡើយជាហេតុធ្វើឱ្យមន្ត្រីជំនាញមានការព្រួយបារម្ភជាខ្លាំងពីការបន្តពូជរបស់មច្ឆជាតិនៅក្នុងខេត្តស្ទឹងត្រែង។
លោកទុំនីរ៉ូ នាយខណ្ឌជលផលខេត្តស្ទឹងត្រែង បានប្រាប់អ្នកសារព័ត៌មានដឹងថាស្ថានភាពទឹកទន្លេទាំង ៤ដែលហូរកាត់លើទឹកដីខេត្តស្ទឹងត្រែងមានការប្រែប្រួលទៅតាមធម្មជាតិ។នៅឆ្នាំនេះទឹកទន្លេមិនពេញប្រៀបជ្រាំងចូលតាមដងអូរវាលទំនាបដូចរាល់ឆ្នាំឡើយ។លោកនាយខណ្ឌបានបន្តថាទឹកទន្លេមេគង្គក្នុងរយៈពេល១០០ឆ្នាំកន្លងមកនេះទើបតែនឹងមានការប្រែប្រួលខុសពីប្រក្រតីនៅឆ្នាំ២០២០នេះតែប៉ុនណោះ។
តាមការកត់សម្គាល់ឃើញថាជារៀងរាល់ឆ្នាំនៅកំឡុងខែមិថុនា-ខែកក្កដាទឹកទន្លេក្នុងខេត្តនេះចាប់ផ្ដើមជន់ឡើងពេញប្រៀបហូរចូលតាមប្រឡាយអូរថ្លុកត្រពាំងវាលទំនាបជាដើម។ល។ក៏ប៉ុន្តែនៅក្នុងឆ្នាំនេះគេសង្កេតឃើញថាទឹកទន្លេមេគង្គមានកម្ពស់ពី៥ទៅ៧ម៉ែត្រតែប៉ុណ្ណោះគឺស្ទើរតែនៅបាតទន្លេនេះបើធៀបក្នុងរដូវប្រាំង និងរដូវវស្សា។
មន្ត្រីជំនាញខាងលើបានរៀបរាប់បន្ថែមទៀតថាគិតត្រឹមចុងខែកញ្ញានេះត្រីមេពូជគ្រប់ប្រភេទនៅក្នុងខេត្តស្ទឹងត្រែងមិនតិចជាង៩៩ភាគរយនោះទេបានទម្លាក់ពងរួចនៅក្នុងដែនធម្មជាតិ។ប៉ុន្តែលោកបារម្មណ៍យ៉ាងខ្លាំងថាពងត្រីទាំងនោះ មិនដឹងថាអាចញាស់ចេញជាកូនត្រី ឬមួយក៏អត់?
សូមជម្រាបជូនសាធារណៈជនទាំងអស់ឱ្យបានជ្រាបថាប្រភពទឹកទន្លេមេគង្គមានដើមនៅប្រទេសចិនហូរកាត់ប្រទេសចំនួន ៦គឺប្រទេសចិន, ភូមា,ថៃ,ឡាវ,កម្ពុជា,និងវៀតណាមដែលមានប្រវែងជាង ៤.២០០គីឡូម៉ែត្រ។ទឹកបានហូរកាត់ខេត្តស្ទឹងត្រែងប្រវែងប្រមាណ១២០គីឡូម៉ែត្រ។នៅខេត្តស្ទឹងត្រែងមានទន្លេចំនួន៤ហូរកាត់គឺទន្លេមេគង្គ,ទន្លេសេកុង,ទន្លេសេសាន,និងទន្លេស្រែពក,ដែលទន្លេទាំងបួនហូរកាត់ខេត្តស្ទឹងត្រែងមានប្រវែងប្រមាណ៤៤៧គីឡូម៉ែត្រ។
ខេត្តស្ទឹងត្រែងមានភូមិសរុបចំនួន១២៨ភូមិប្រជាពលរដ្ឋប្រមាណ៧០ទៅ៨០ភាគរយរស់នៅតាមដងទន្លេដែលប្រភពទឹកទន្លេទាំងនេះមានសារសំខាន់សម្រាប់ផ្គត់ផ្គង់ដល់ការរស់នៅការប្រើប្រាស់សម្រាប់ជីវភាពប្រចាំថ្ងៃដល់ប្រជាពលរដ្ឋក្នុងខេត្តស្ទឹងត្រែង។ក្រៅពីនេះធនធានត្រីគឺជាប្រភពមានផលប្រយោជន៍ខ្លាំងសម្រាប់ការទទួលទានរបស់ប្រជាពលរដ្ឋ។
មន្ត្រីជលផលបានលើកឡើងថាៈទិន្នផលត្រីចាប់បានពីធម្មជាតិប្រមាណពី៣ទៅ៧តោនដោយត្រីខ្លះដូចជាត្រីប៉ាស៊ីអ៊ីមានតម្លៃថ្លៃរហូតដល់ទៅ៥០ម៉ឺនរៀលក្នុងមួយគីឡូក្រាម។ជាថ្មីម្តងទៀតលោកទុំនីរ៉ូបានក្រើនរំលឹកថាវិស័យជលផលនៅខេត្តស្ទឹងត្រែងគឺបានមកដល់ចំណុចភ្លើងលឿងទៅហើយ ។នេះមានន័យថាការចាប់ត្រីពីធម្មជាតិទាំងស្របច្បាប់ទាំងល្មើសច្បាប់គឺហួសកម្រិតដែលអាចស្តុកធម្មជាតិអាចផ្គត់ផ្គង់បាន។
លោកក៏បានបញ្ជាក់ផងដែរថាៈក្នុងរយៈពេល១០ឆ្នាំចុងក្រោយនេះការផ្គត់ផ្គង់ត្រីមិនត្រឹមតែក្នុងខេត្តស្ទឹងត្រែងប៉ុណ្ណោះទេគឺបាននាំចេញស្ទើរតែ២៥ខេត្តក្រុងនៅក្នុងប្រទេសកម្ពុជា។ដោយសារតម្រូវការត្រីសាច់នេះហើយបានជាមានការប្រឹងចាប់ត្រីពីដែនធម្មជាតិយ៉ាងគគ្រឹកគគ្រេងដែលជាកត្តាអាចនាំឱ្យមហន្តរាយណ៍ដល់ដល់ធនធានជលផលនៅខេត្តនេះ។
នៅខេត្តស្ទឹងត្រែងមន្ត្រីជលផលដែលមានការចូលរួមគាំទ្រពីអាជ្ញាធរគ្រប់លំដាប់ថ្នាក់កងកម្លាំងប្រដាប់អាវុធនិងសហគមន៍មូលដ្ឋានបានខិតខំការពារនិងអភិរក្សត្រីមេពូជក្នុងរដូវបិទនេសាទរៀងរាល់ឆ្នាំ បានយ៉ាងល្អនិងមានប្រសិទ្ធភាពខ្ពស់។ជាមួយនោះជំនាញជលផលសូមអំពាវនាវដល់អាជ្ញាធរសមត្ថកិច្ចពាក់ព័ន្ធចូលរួមទប់ស្កាត់បទល្មើសដើម្បីរក្សាផលត្រីឱ្យនៅគង់វង្សសម្រាប់បន្តនិរន្តភាពដល់កូនចៅជំនាន់ក្រោយៗទៀត៕សុខុម
(រូបថត:ជលផល)
