ភ្នំពេញ៖នៅវិមានសន្តិភាពព្រឹកថ្ងៃទី១០ខែធ្នូឆ្នាំ២០១៩សម្តេចតេជោហ៊ុនសែននាយករដ្ឋមន្ត្រីនៃប្រទេសកម្ពុជានិងជាប្រធានសមាគមអតីតយុទ្ធជនកម្ពុជាបានអញ្ជើញជាអធិបតីភាពដ៏ខ្ពង់ខ្ពស់បើកមហាសន្និបាតសហព័ន្ធអតីតយុទ្ធជនអាស៊ានលើកទី១៩ ។
សូមបញ្ជាក់ថានៅឆ្នាំ២០១៩នេះកម្ពុជាត្រូវបានទទួលធ្វើជាម្ចាស់ផ្ទះនិងជាប្រធានបន្តវេនពីប្រទេសឡាវក្នុងការរៀបចំកិច្ចប្រជុំគណៈកម្មាធិការប្រតិបត្តិលើកទី៣២ និងមហាសន្និបាតសហព័ន្ធអតីតយុទ្ធ ជនអាស៊ានលើកទី១៩ ដែលបានគ្រោងទុកទៅតាមខ្លឹមសាររបៀបវារៈនៃកិច្ចប្រជុំមានរយៈពេល៥ថ្ងៃ គឺចាប់ពីថ្ងៃទី៨ ដល់ថ្ងៃទី១២ ខែធ្នូ ឆ្នាំ២០១៩។
សហព័ន្ធអតីតយុទ្ធជនអាស៊ានត្រូវបានបង្កើតឡើងនៅឆ្នាំ១៩៨០ហើយបច្ចុប្បន្នមានសមាជិកចំនួន ១០ប្រទេស ដូចជាព្រុយណេដារ៉ូសាឡឹម, កម្ពុជា, ឥណ្ឌូនេស៊ី, ឡាវ, ម៉ាឡេស៊ី, មីយ៉ាន់ម៉ា, ហ្វីលីពីន, សឹង្ហបុរី, ថៃ, និងវៀតណាម។
សហព័ន្ធនេះបង្កើតឡើងដើម្បីធ្វើសកម្មភាពផ្សព្វផ្សាយលើកកម្ពស់ប្រណិតភាពជីវិតផលប៉ះពាល់នៃអាយុកាល និងផលប៉ះពាល់ដោយសារសង្គ្រាមមកលើសុខភាព និងសង្គមកិច្ចចំពោះជនរងគ្រោះដោ យសារសង្គ្រាមនិងផ្សព្វផ្សាយឲ្យបានយល់ដឹងស៊ី ជម្រៅដល់បណ្ដាប្រជាជន ដើម្បីសម្រេចកិច្ចសហ ប្រតិបត្តិការឈានទៅរកភាពសុខដុមរមនាយុត្តិធម៌សង្គម និងសន្ដិភាព។
សហព័ន្ធនេះក៏មានបេសកកម្មផ្សព្វផ្សាយឲ្យបានយល់ដឹងស៊ីជម្រៅជាសកលនូវ ទស្សនៈស្មារតី ការលើកសរសើរនិងអត្ថប្រយោជន៍នៃបណ្ដាប្រទេសក្នុងតំបន់និងជំរុញការពារភាពស្របច្បាប់នៃអត្ថប្រយោជន៍អតីតយុទ្ធជនដោយសារសង្គ្រាម និងជនរគ្រោះដោយសារសង្គ្រាម ជាមួយនឹងការទទួល ស្គាល់ផ្លូវច្បាប់ នៃសមាគមអតីតយុទ្ធជនបណ្ដាប្រទេសជាសមាជិកសហព័ន្ធ។
ជាមួយគ្នានេះសមាជិកសហព័ន្ធអតីតយុទ្ធជនអាស៊ានតែងតែអនុវត្តជាប្រចាំនូវគោលបំណងរបស់សហព័ន្ធមានដូចជា៖ការផ្លាស់ប្តូទស្សនកិច្ចប្រតិភូបណ្តាប្រទេសជាសមាជិកដើម្បីស្វែងយល់និងដកស្រង់បទពិសោធន៍អំពីការផ្តល់សេវានិងការលើកកម្ពស់ដល់អតីតយុទ្ធជន។ប្រទេសជាសមាជិកតែងតែសហការនិងផ្តល់ការហ្វឹកហ្វឺនបំប៉នជំនាញទៅវិញទៅមកដល់អតីតយុទ្ធជន។
ប្រទេសជាសមាជិកតែងតែសហការនិងផ្តល់ការហ្វឹកហ្វឺនបំប៉នជំនាញទៅវិញទៅមកដល់អតីតយុទ្ធជនដោយយោងតាមពិធីសារនៃការយោគយល់រវាងប្រទេសនិងប្រទេសជាសមាជិកនិងការផ្តល់ជំនួយឧបត្ថម្ភដោយផ្ទាល់ដល់អតីតយុទ្ធជនរវាងប្រទេសសមាជិក៕
