កណ្តាល៖ប្រភពពីសមត្ថកិច្ចនគរបាលស្រុកមុខកំពូលបានឱ្យដឹងនៅយប់ថ្ងៃទី២៨ខែមករាឆ្នាំ២០២០ថានារី២នាក់ដែលលិចទូកក្នុងទន្លេមេគង្គពេលដែលទៅលេងកោះស្នេហាជិះលើសចំណុះនោះបាន រកឃើញសាកសពហើយ។
សាកសពដែលរកឃើញមានឈ្មោះយឿងស្រីពេជ្រភេទស្រីអាយុ១៨ឆ្នាំជនជាតិខ្មែរមុខរបរក្រឡុកស្រាមានទីលំនៅភូមិឃ្លាំងសាំងសង្កាត់គីឡូម៉ែត្រលេខ៦ខណ្ឌឬស្សីកែវរាជធានីភ្នំពេញ។ម្នាក់ទៀតឈ្មោះស្រីណាភេទស្រីអាយុ១៨ឆ្នាំមានទីលំនៅខ័ណ្ឌឫស្សីកែវរាជធានីភ្នំពេញ។
សូមរំលឹកថាកាលពីថ្ងៃទី២៦ខែមករាឆ្នាំ២០២០នារីទាំង២នាក់ក្នុងចំណោមច្រើននាក់បានជិះទូកទៅលេងកោះស្នេហាចៃដន្យអាក្រក់លិចទូកក្នុងទឹកទន្លេបានស្លាប់តែម្តង។ហេតុការណ៍នេះបានកើតឡើងនៅក្នុងភូមិពាមឃុំរការកោង១ស្រុកមុខកំពូលខេត្តកណ្ដាល។
បើតាមសមត្ថកិច្ចបានឱ្យដឹងថានៅថ្ងៃកើតហេតុមានមនុស្សមួយក្រុមមានគ្នាជាង១០នាក់បានយកទូកមកជិះលេងបម្រុងឆ្លងទៅលេងកោះស្នេហា។ប៉ុន្តែជិះចេញបានប្រហែល១០ម៉ែត្រទូកក៏បានលិចទៅក្នុងទឹកបណ្ដាលឱ្យបាត់មនុស្ស២នាក់តែម្តង៕
