ភ្នំពេញ៖អគារទីស្តីការក្រសួងរៀបចំដែនដី នគរូបនីយកម្ម និងសំណង់ថ្មីកម្ពស់៥ជាន់ ដែលមានទីតាំងស្ថិតនៅភូមិអន្លង់ក្ងានសង្កាត់ឃ្មួញខណ្ឌសែនសុខរាជធានីភ្នំពេញបានចាប់ផ្តើមការសាសង់កាលពីព្រឹកថ្ងៃទី២៨ខែមករាឆ្នា២០២០។លោកឧបនាយករដ្ឋមន្ត្រីជាសុផារ៉ារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់បានអញ្ជើញដឹកនាំពិធីបញ្ចុះបឋមសិលាបើកការដ្ឋានសាងសង់ ។
អគារទីស្តីការក្រសួងរៀបចំដែនដីនគរូបនីយកម្មនិងសំណង់ថ្មីនឹងសាងសង់ក្នុងកម្ពស់៥ជាន់នៅលើផ្ទៃដីទំហំ៣ហិកតាមានផ្ទៃក្រឡាសំណង់សរុប៤៩.៣៨៩ម៉ែត្រក្រឡា។ក្រឡាផ្ទៃប្រើប្រាស់សរុបប្រមាណ ២៦.៥៦៧ម៉ែត្រក្រឡាមានផលធៀបក្រឡាផ្ទៃបាតសំណង់៣២.៥៣ភាគរយ។
ក្រសួងរៀបចំដែនដី នគរូបនីយកម្មនិងសំណង់បញ្ជាក់ថាអគារថ្មីនេះនឹងរៀបចំឱ្យមានចំណតរថយន្តប្រមាណ៥០កន្លែងដោយសារអគារក្រសួងរៀបចំដែនដីសព្វថៃ្ងខ្វះចំណតបង្កការលំបាកដល់ការធើ្វដំណើរ។
អគារទីស្តីការថ្មីនេះនឹងមានសាលបដិសណ្ឋារកិច្ច,អាហារដ្ឋានសម្រាប់មន្ត្រីបុគ្គលិកនិងលម្ហសួនកណ្តាលអគារ សាលប្រជុំតូចៗ មាន៣០០នាក់ ១៥០នាក់និងសាលសន្និបាតចំណុះ ១៥៨៤ នាក់។ ក្នុងនោះមានកន្លែងតម្កល់ឯកសារសុរិយោដី និងរដ្ឋបាល សាលបច្ចេកវិទ្យាមន្ទីរពិសោធន៍ជាតិសំណង់ បន្ទប់សិក្សាបណ្តុះបណា្តលវិជា្ជជីវៈបណ្ណាល័យ កន្លែងកីឡា។
ប្រភពក្រសួងរៀបចំដែនដីបានឱ្យដឹងថាអគារទីស្តីការក្រសួងថ្មីនេះគ្រោងនឹងសាងសង់ឡើងតាមរចនាបថខ្មែររចនាលម្អដោយបុស្បុកប្រាំពីរថ្នាក់ដំបូលហោជាងមុខដាច់ប្រកបដោយក្បូរក្បាច់ពិពិតវិចិត្ររចនាដែលក្រុមការងារប្រមូលផ្តុំសិក្សាចង់លើកស្ទួយនូវសា្នដៃលម្អស្ថាបត្យកម្មបុរាណខ្មែរ។ដោយឡែកប្លង់បាតមានលម្ហសួនក្នុងអគារ។
ក្រសួងរៀបចំដែនដីនគរូបនីយកម្មនិងសំណង់បានចាត់ទុកថាសំណង់នេះជាផ្នែកមួយដ៏សំខាន់ក្នុងការបង្ហាញអត្តសញ្ញាណខ្មែរនិងទម្រង់ស្ថាបត្យកម្មខ្មែរក្នុងសម័យតេជោដែលបងា្ហញពីសន្តិភាពស្ថិរភាពការវិវឌ្ឍនិងសង្គ្រោះសំណង់ប្រភេទនេះឱ្យរស់ឡើងវិញជាសំណង់របស់រដ្ឋទុកតជំនាន់។
សូមជម្រាបថាអគារទីស្តីការក្រសួងរៀបចំដែនដីនគរូបនីយកម្មនិងសំណង់សព្វថៃ្ងមិនមានការដោះដូរឬលក់ទេគឺនឹងត្រូវរាជរដ្ឋាភិបាលប្រគល់ឱ្យមន្ទីរក្រសួងរៀបចំដែនដីនគរូបនីយកម្មសំណង់និងសុរិយោដីរាជធានីវិញ៕សុផល
