ព្រះវិហារ៖កម្លាំងកងរាជអាវុធហត្ថខេត្តព្រះវិហារ ព្រឹកថ្ងៃទី២៣ ខែមករាឆ្នាំ២០២៤ បានបញ្ជូនឧក្រិដ្ឋជន២នាក់ ជាមួយគ្រឿងញៀនជាង១ពាន់គីឡូក្រាម និងរថយន្តទំនើប១គ្រឿងទៅតុលាការ ដែលកម្លាំងជំនាញបានបង្ក្រាបកាលពីល្ងាចថ្ងៃទី២០ ខែមករាកន្លងទៅ។លោកឩត្តមសេនីយ៍ត្រីកង សៅគុណ មេបញ្ជាការកងរាជអាវុធហត្ថខេត្តព្រះវិហារបានបញ្ជាក់ប្រាប់អ្នកសារព័ត៌មាន នៅព្រឹកថ្ងៃទី២៣ ខែមករាថា គ្រឿងញៀនដែលកម្លាំងអាវុធហត្ថខេត្តដឹកបញ្ជូននឹងប្រគល់ឱ្យតុលាការ រួមមានម្សៅថ្លាម៉ាទឹកកកចំនួន២៥ធុងស្មើរ១.០៨២.៥គីឡូក្រាមជាទម្ងន់បូកជាមួយសម្ភារវិចខ្ចប់។រីឯទម្ងន់គ្រឿងញៀនសុទ្ធគឺមានចំនួន១.០២១គីឡូក្រាម នឹងជនសង្ស័យដែលពាក់ព័ន្ធចំនួន២នាក់ រួមនឹងសម្ភារមួយចំនួនទៀត។លោកមេបញ្ជាការបានបន្តថា ក្នុងករណីនេះកម្លាំងអាវុធហត្ថខេត្ត បានសហការណ៍ជាមួយសមត្ថកិច្ចជំនាញគ្រប់ស្ថាប័ន ដើម្បីស្វែងរកចាប់មេខ្លោង និងបក្ខពួកយកមកផ្តន្ទាទោសតាមច្បាប់។ លោកមេបញ្ជាការអាវុធហត្ថខេត្តព្រះវិហារ បានអំពាវនាវដល់ស្រទាប់យុវវ័យ ទាំងអស់សូមនៅឱ្យឆ្ងាយពីគ្រឿងញៀន ហើយត្រូវឆ្លើយថាទេចំពោះគ្រឿងញៀន ព្រោះគ្រឿងញៀនវាបំផ្លាញអនាគតខ្លួនឯង-ក្រុមគ្រួសារនិងសង្គមជាតិ៕ដោយ៖សៅវ៉ាន់ឌី
Related Articles
បញ្ជូនជនសង្ស័យពីរនាក់ទៅតុលាការនិងគ្រឿងញៀនជិត២៦ក្រាម
បាត់ដំបងៈកាលពីរសៀលថ្ងៃទី១១ខែមករាឆ្នាំ២០២០កម្លាំងនគរបាលប្រឆាំងគ្រឿងញៀនខេត្តបានបញ្ជូនជនសង្ស័យពីរនាក់និងថ្នាំញៀនជិត២៦ក្រាមទៅតុលាការ។ជនសង្ស័យទាំងនេះត្រូវបានកម្លាំងចាប់ខ្លួនបាននៅចំណុចភូមិអូរត្រែងឃុំផ្លូវមាសស្រុករតនៈមណ្ឌលកាលពីថ្ងៃទី១០ខែមករាឆ្នាំ២០២០។ មន្ត្រីនគរបាលបានឱ្យដឹងថាជនសង្ស័យទាំងពីរនាក់មានឈ្មោះពៅសោភ័ណភេទប្រុសអាយុ៣៣ឆ្នាំនៅភូមិទឹកសាមឃុំផ្លូវមាសស្រុករតនមណ្ឌល។ឈ្មោះសៀងភិនហៅភក្តីភេទប្រុសអាយុ២០ឆ្នាំ។ចំណែកវត្ថុយាងដែលដកហូតបានរួមមានថ្នាំញៀនប្រភេទមេតំហ្វេតាមីន(ម៉ាទឹកកកICE)ចំនួន១ថង់ទម្ងន់២៥,៨៧ក្រាមទូស័ព្ទដៃ១គ្រឿងនិងម៉ុតូហុងដាឌ្រីម១គ្រឿងពណ៌ខ្មៅស៊េរី២០០៤គ្មានស្លាកលេខ៕
ស្ពានអាកាសបត់ឆ្វេងមួយខ្សែថ្មីនៅជាប់ស្ពានអាកាសក្បាលថ្នល់ចាស់បញ្ចប់ជាស្ថាពរ
ភ្នំពេញ៖ការដ្ឋានស្ថាបនាស្ពានអាកាសបត់ឆ្វេងមួយខ្សែថ្មីនៅជាប់នឹងស្ពានអាកាសក្បាលថ្នល់ចាស់បានបញ្ចប់ការស្ថាបនា១០០ភាគរយហើយគឺនៅរង់ចាំតែពេលវេលាដើម្បីបើកឱ្យធ្វើដំណើរឆ្លងកាត់តែប៉ុណ្ណោះ ។ លោកសាំពិសិដ្ឋប្រធានមន្ទីរសាធារណការនិងដឹកជញ្ជូនរាជធានីភ្នំពេញបានឱ្យដឹងកាលពីព្រឹកថ្ងៃទី១១មេសាឆ្នាំ២០២០នេះថា៖មកដល់ពេលនេះការដ្ឋានស្ថាបនាស្ពានអាកាសបត់ឆ្វេងមួយខ្សែថ្មីនៅជាប់នឹងស្ពានអាកាសក្បាលថ្នល់ចាស់បានបញ្ចប់ការស្ថាបនា១០០ភាគរយហើយ។ ដោយនៅរង់ចាំតែពេលវេលាដើម្បីបើកឱ្យធ្វើដំណើរឆ្លងកាត់តែប៉ុណ្ណោះ។លោកសាំពិសិដ្ឋបានបញ្ជាក់ទៀតថា៖បើតាមគម្រោងស្ពានអាកាសបត់ឆ្វេងមួយខ្សែថ្មីនៅជាប់នឹងស្ពានអាកាសក្បាលថ្នល់ចាស់នេះគ្រោងនឹងដាក់ឱ្យដំណើរការជូនប្រជាពលរដ្ឋបានឆ្លងកាត់នៅថ្ងៃ១២ខែមេសានេះហើយ ។ គួរបញ្ជាក់ថា៖កាលពីល្ងាចថ្ងៃ៩មេសាលោកឃួងស្រេងអភិបាលរាជធានីភ្នំពេញក្នុងឱកាសចុះពិនិត្យមើលដោយផ្ទាល់មហាវិថីសម្តេចតេជោហ៊ុនសែន(ផ្លូវ៦០ម៉ែត្រ)លោកក៏បានបន្តដំណើរមកពិនិត្យការដ្ឋានស្ថាបនាស្ពានអាកាសបត់ឆ្វេងមួយខ្សែថ្មីនៅជាប់នឹងស្ពានអាកាសក្បាលថ្នល់ចាស់នេះផងដែរ។តែក្នុងពេលចុះពិនិត្យនោះលោកអភិបាលមិនបានបញ្ជាក់ថា៖ស្ពាននេះត្រូវដាក់ឱ្យប្រើប្រាស់នៅថ្ងៃណានោះទេ។ គួររំលឹកថា៖ស្ពានអាកាសក្បាលថ្នល់ពីមហាវិថីព្រះមុនីវង្សទៅវិថីព្រះនរោត្តមមានប្រវែង៧៧ម៉ែត្រពីផ្លូវដីដល់គល់ស្ពានក្បាលថ្នល់និងពីគល់ស្ពានដល់ស្ពានអាកាសចាស់១២៣ម៉ែត្រសរុប២០០ម៉ែត្រ។ស្ពាននេះមានទទឹង ៧,៥ម៉ែត្រពីមហាវិថីព្រះមុនីវង្សបត់ឆ្វេងឡើងស្ពានឆ្ពោះទៅមហាវិថីព្រះនរោត្តម។ បច្ចុប្បន្ននេះនៅក្នុងរាជធានីភ្នំពេញមានស្ពានអាកាសចំនួន៦ កន្លែងហើយ គឺស្ពានអាកកាសក្បាលថ្នល់ ស្ពានអាកាសស្ទឹងមានជ័យ ស្ពានអាកាស៧មករា ស្ពានអាកាស៥មករា ស្ពានអាកាសស្តុបផ្សារដីហុយ និងស្ពានអាកាសចោមចៅដែលស្ពាននេះក្រុមការងារបាននឹងកំពុងបើកការដ្ឋានស្ថាបនាយ៉ាងញាប់ដៃញាប់ជើង ដូចស្ពានអាកកាសក្បាលថ្នល់នេះដែរ ៕វណ្ណា
ម៉ូតូបុកម៉ូតូពេញទំហឹងបណ្ដាលឱ្យស្លាប់ម្នាក់និងរបួសធ្ងន់២នាក់
កណ្ដាល៖គ្រោះថ្នាក់ចរាចរណ៍រវាងម៉ូតូនិងម៉ូតូបានបុកគ្នាពេញទំហឹង បណ្ដាលឱ្យបុរសម្នាក់ស្លាប់និង២នាក់ទៀតរងរបួសធ្ងន់។ហេតុការណ៍នេះបានកើតឡើងនៅផ្លូវ៣៤ ក្នុងភូមិបាង ឃុំដើមឬស ស្រុកកណ្ដាលស្ទឹង ខេត្ត កណ្ដាលកាលពីយប់ថ្ងៃទី២ ខែមីនា។ នគរបាលមូលដ្ឋានបានឱ្យដឹងថា ជនរងគ្រោះដែលស្លាប់ឈ្មោះ ទូច សុខធិក អាយុ១៨ឆ្នាំនៅភូមិឃុំខាងលើបានស្លាប់នៅពេលបញ្ជូនទៅមន្ទីរពេទ្យ។ជនរងគ្រោះជិះម៉ូតូម៉ាកហុងដាឌ្រីមផ្លាកលេខភ្នំពេញ 1AN-4034អ្នករួមដំណើរឈ្មោះ បូរ សំនៀង អាយុ១៥ឆ្នាំនៅភូមិឃុំជាមួយគ្នារងរបួសធ្ងន់។ចំណែកភាគីម៉ូតូម្ខាងទៀតម៉ូតូម៉ាកសង់កូរ៉េផ្លាកលេខ-គ 5982 បើកបរដោយឈ្មោះ អង ទូច អាយុ៣៨ ឆ្នាំនៅភូមិឃុំជាមួយគ្នារងរបួសធ្ងន់។ក្រោយកើតហេតុសមត្ថកិច្ចបានយកម៉ូតូទាំង២គ្រឿងទៅទុកនៅអធិការដ្ឋាននគរបាលស្រុកកណ្ដាលស្ទឹងជាបណ្ដោះអាសន្នដើម្បីរង់ចាំភាគីសងខាងចូលខ្លួនដោះស្រាយពេលក្រោយ៕