ភ្នំពេញ៖ យោងទៅតាមការផ្សាយចេញពីទីភ្នាក់ងារសារព័ត៌មានចិន ស៊ិនហួរ នាព្រឹកថ្ងៃទី១៦ ខែមីនា ឆ្នាំ២០២០បានឱ្យដឹងថាតាមមជ្ឈមណ្ឌលគ្រប់គ្រងនិងបង្ការជំងឺកូរ៉េ(KCDC)បានឱ្យដឹងថាអ្នកឆ្លងវីរុសកូវីដ-១៩ នៅប្រទេសកូរ៉េខាងត្បូង កើនដល់៨.២៣៦ករណី និងស្លាប់៧៦នាក់។
ចំណែកឯអង្គការសុខភាពពិភពលោក ( WHO) បានបញ្ជាក់ដែរថា ត្រឹមតែមួយថ្ងៃកាលពីម្សិលមិញ មនុស្សចំនួន ១០.៩៥៥នាក់ បានឆ្លងវីរុសកូរ៉ូណាថ្មី នេះនៅទូទាំងពិភពលោកដោយមិនគិតចំនួននៅចិន ខណៈស្ថានការណ៍នៃការរីករាលដាល គឺកាន់តែអាក្រក់ខ្លាំងឡើងៗហើយ។
សូមបញ្ជាក់ផងដែរថា ចំនួនអ្នកឆ្លងទូទាំងសកលលោកក្រៅពីចិន កើនឡើងរហូតដល់ ៧២.៤៦៩នាក់ ។ប្រទេសដែលកំពុងរងគ្រោះធ្ងន់ធ្ងរបំផុតនាពេលនេះគឺ អ៊ីតាលីមានអ្នកឆ្លងជាង ២៤.០០០ករណី, អ៊ីរ៉ង់ជាង ១៣.០០០ករណី, កូរ៉េខាងត្បូងជាង ៨.០០០ករណី និងអេស្ប៉ាញជិត ៨.០០០ករណី។ ដោយឡែកសហរដ្ឋអាមេរិក,អាល្លឺម៉ង់,បារាំង,និងអង់គ្លេសក៏កំពុងបង្ហាញសញ្ញាឈានទៅរកភាពធ្ងន់ធ្ងរខ្លាំងផងដែរ។
បច្ចុប្បន្ននេះមនុស្សសរុប ១៥៣.៥១៧នាក់ហើយបានឆ្លង កូវីដ-១៩ នៅក្នុងបណ្តាប្រទេសចំនួន ១៤៤ នៅទូទាំងភពផែនដី ដែលមានប្រទេសផ្លូវការចំនួន ១៩៣ និងប្រជាជនសរុបជាង ៧ពាន់លាននាក់។
អង្គការសុខភាពពិភពលោក WHO បានអំពាវនាវឱ្យមនុស្សគ្រប់គ្នា ប្រយុទ្ធប្រឆាំងនឹងជំងឺរាតត្បាត កូវីដ-១៩ឱ្យបានខ្លាំងក្លាជាទីបំផុត។ខណៈអគ្គលេខាធិការUNបានប្រាប់ឱ្យគ្រប់ប្រទេសធ្វើសង្គ្រាមដើម្បីកម្ចាត់ កូវីដ-១៩ តែម្តង៕Skay news