ភ្នំពេញ៖អ្នកឆ្លងជំងឺCovid19នៅកម្ពុជាបានឡើងដល់៣៥នាក់ហើយបន្ទាប់ពីរកឃើញលើជនជាតិម៉ាឡេស៊ី ២នាក់បន្ថែមទៀតកាលពីយប់ថ្ងៃទី១៧ មីនាឆ្នាំ២០២០។នេះបើតាមលោកស្រី ឱ វណ្ណឌីន រដ្ឋលេខាធិការនិងជាអ្នកនាំពាក្យក្រសួងសុខាភិបាល។
នៅក្នុងសន្និសីទកាសែតស្តីពីកូវីដ-១៩ដែលរៀបចំដោយអង្គភាពអ្នកនាំពាក្យរាជរដ្ឋាភិបាលនៅទីស្ដីការគណៈរដ្ឋមន្ត្រីលោកស្រីបានឱ្យដឹងថាកម្ពុជាបានរកឃើញនូវករណីឆ្លងចំនួន២ករណីថែមទៀតនៅលើខ្លួនជនជាតិម៉ាឡេស៊ី២នាក់។ដែលធ្វើឱ្យករណីឆ្លងសរុបនៅក្នុងប្រទេសកម្ពុជាបានកើនដល់៣៥នាក់ គិតត្រឹមព្រឹកថ្ងៃទី១៨ ខែមីនា ឆ្នាំ២០២០នេះ។
លោកស្រីឱវណ្ណឌីនបានបញ្ជាក់ថាចំនួនអ្នកផ្ទុកវីរុសកូវីដ-១៩ទាំងអស់នេះគឺជាករណីនាំចូល។បច្ចុប្បន្នអ្នកទាំងអស់នោះ ត្រូវបានដាក់ឱ្យនៅដាច់ដោយឡែកដើម្បីតាមដានព្យាបាល៕សុផល