មណ្ឌលគិរី៖បុរសខ្មែរអ៊ិស្លាមម្នាក់បានស្លាប់នៅក្នុងទឹកក្រោយមានអាការៈរវើរវាយដូចជាមនុស្សសតិមិនគ្រប់។សាកសពត្រូវគេប្រទះឃើញនៅព្រឹកថ្ងៃទី១៨មីនាឆ្នាំ២០២០ក្នុងទឹកត្រពាំងនាភូមិឆ្នែងឃុំស្រែខ្ទុមស្រុកកែវសីមាខេត្តមណ្ឌលគិរី។សាច់ញាតិរួមទាំងសមត្ថកិច្ចមូលដ្ឋានបានទៅដល់កន្លែងកើតហេតុ និងនាំគ្នាពិនិត្យទៅលើសាកសព និងបានសន្និដ្ឋាន ថាជាករណីលង់ទឹក។
លោកហេងអួងអធិការនគរបាលស្រុកកែវសីមាបានឱ្យដឹងថាលោកបានបញ្ជាដល់អធិការរងនិងប៉ុស្តិ៍រដ្ឋបាលឃុំស្រែខ្ទុមដោយសហការគ្នាជាមួយក្រុមគ្រួសារសពត្រួតពិនិត្យយ៉ាងល្អិតល្អន់។នៅវេលាម៉ោង៣ទាបភ្លឺថ្ងៃទី១៦មីនា២០២០មានករណីបាត់ខ្លួនមនុស្សឈ្មោះហៀតហ្វាស៊ីអាយុ២៨ឆ្នាំជាខ្មែរអ៊ិស្លាមមុខរបរកសិករ។
លោកអធិការបានបន្តថារហូតដល់ថ្ងៃទី១៨មីនាវេលាម៉ោង៧:១០នាទីព្រឹកក៏មានប្រជាពលរដ្ឋប្រទះឃើញសាកសពអណ្ដែតទឹកហើយបានទៅហៅសាច់ញាតិបងប្អូនថាបានឃើញសាកសពអណ្ដែតទឹក។
សពនៅចំណុចក្រោយផ្ទះប្រជាពលរដ្ឋមួយកន្លែងស្ថិតនៅក្នុងភូមិឆ្នែងឃុំស្រែខ្ទុមស្រុកកែវសីមាខេត្តមណ្ឌលគិរី។ក្រោយពីសាច់ញាតិបានទៅដល់ក៏បានពិនិត្យឃើញថាសាកសពពិតជាមនុស្សដែលបានបាត់ខ្លួនកាលពីថ្ងៃទី ១៦ ខែមីនា ខាងលើពិតប្រាកដមែនក៏បាន។
សូមបញ្ជាក់សាកសពនេះមុនពេលកើតហេតុមានអាការរវើរវាយដូចជាមនុស្សសតិមិនគ្រប់។បច្ចុប្បន្នសាកសពត្រូវបានប្រគល់ជូនក្រុមគ្រួសារនិងសាច់ញ្ញាតិដើម្បីយកទៅធ្វើបុណ្យតាមប្រពៃណី៕ចាន់បុត្រ