ព្រះវិហារ៖កាលពីរសៀលថ្ងៃទី១១ខែឧសភាឆ្នាំ២០២០កម្លាំងនគរបាលស្រុករវៀងសហការណ៍ជាមួយប៉ុស្តិ៍នគរបាលរដ្ឋបាលឃុំរមណីយបានចុះអនុវត្តតាមដីកាបង្គាប់ឱ្យចាប់ខ្លួនរបស់តុលាការខេត្តព្រះវិហារហើយបានរកឃើញមួយចំនួនទៀត។
លោកវរសេនីយ៍ឯកសាយដេតអធិការនគរបាលស្រុករវៀងបានឱ្យដឹងថាការចុះអនុវត្តតាមដីកាបង្គាប់ឱ្យចាប់ខ្លួនលេខ៤៥គព្រចុះថ្ងៃទី៨ខែមេសាឆ្នាំ២០២០ដោយលោកជៀនស្រស់ចៅក្រមស៊ើបសួរនៃសាលាដំបូងខេត្តព្រះវិហារបង្គាប់ឱ្យចាប់ខ្លួនជនត្រូវចោទឈ្មោះផានសង់ភេទប្រុសអាយុ២៨ឆ្នាំមានទីលំនៅភូមិរំចេក ឃុំរមណីយ ស្រុករវៀងខេត្តព្រះវិហារ ។
លោកវរសេនីយ៍ឯកសាយដេតបានបន្តថាជនត្រូវចោទឈ្មោះផានសង់ត្រូវបានចោទពីបទរក្សាទុកជួញដូរនិងប្រើប្រាស់ដោយខុសច្បាប់នូវសារធាតុញៀនដោយប្រព្រឹត្តឡើងនៅភូមិគោកបេងសង្កាត់កំពង់ប្រណាកក្រុង/ខេត្តព្រះវិហារកាលពីថ្ងៃទី១ខែវិច្ឆិឆ្នាំ២០១៩កន្លងទៅ។លោកបានបន្តថានៅពេលចាប់ខ្លួនបានរកឃើញគ្រឿងញៀនចំនួន៣កញ្ចប់(២កញ្ចប់ធំនិង១កញ្ចប់តូច)បន្ថែមទៀត។ជនត្រូវចោទនិងវត្ថុតាងត្រូវបានបញ្ជូនទៅតុលាការដើម្បីការតាមផ្លូវច្បាប់៕ញ៉ែម.សុផល