កណ្តាល៖ខាងប៉ូលិសបានសងប្រាក់ចំនួន១.២០០ដុល្លារជូនជនរងគ្រោះវិញហើយនៅថ្ងៃទី១៤ខែឧសភាឆ្នាំ២០២០នេះដើម្បីបញ្ចប់រឿងក្រោយផ្ទុះប្រតិកម្មយ៉ាងខ្លាំងខ្លាពីសំណាក់មហាជន។ចំពោះប៉ូលិសស្រុកអង្គស្នួលខេត្តកណ្តាលដែលរងការចោទប្រកាន់ថា«បានស៊ីគ្រឿងឡានជាវត្ថុតាងខ្ទេចខ្ទី» ។
ប៉ុន្តែទន្ទឹមនេះមហាជនចង់ដឹងថា«តើអ្នកណាជាអ្នកលួចស៊ីគ្រឿងឡាននេះជាប៉ូលិសឬចោរមកពីខាងក្រៅ»?ដែលពេលនេះប៉ូលិសមិនទាន់មានបកស្រាយទេក្រៅពីការសងសំណងទៅជនរងគ្រោះខណៈអង្គភាពអធិការដ្ឋាននគរបាលស្រុកអង្គស្នួល ក៏បានទទួលស្គាល់កំហុស លើកង្វះខាតនៃការគ្រប់គ្រង នេះរួចហើយ ។
សូមបញ្ជាក់ថាយោងតាមគណនីហ្វេសប៊ុកមួយឈ្មោះ«HokTanghong»បានបង្ហោះកាលពីព្រឹកថ្ងៃទី១៣ ខែឧសភាឆ្នាំ២០២០ថា«នេះហើយឡានខ្ញុំដែលបានរក្សាទុកនៅក្នុងអធិការដ្ឋាននគរបាលស្រុកអង្គស្នួលខេត្តកណ្ដាល។ពេលមកដល់គ្រឿងពេញដល់ពេលមកដកឡានវិញស៊ីគ្រឿងអស់សុំខ្លាចហើយលោកប៉ូលិសអើយធ្លាប់តែឮគេថាឥឡូវជួបផ្ទាល់ខ្លួនឯងបានដឹង»។
ទោះបីយ៉ាងណាជុំវិញបញ្ហានេះនៅរសៀលថ្ងៃទី១៣ខែឧសភាឆ្នាំ២០២០បានព្យាយាមទំនាក់ទំនងទៅកាន់លោកវរសេនីយ៍ឯកមានសំណាងអធិការនគរបាលស្រុកអង្គស្នួលដើម្បីបញ្ជាក់ករណីនេះតែលោកប្រាប់ថា «កំពុងជាប់ប្រជុំនៅស្នងការដ្ឋាននគរបាលខេត្តកណ្តាល»។
នាពេលថ្មីៗនេះ លោក គឹម សន្តិភាព រដ្ឋលេខាធិការនិងជាអ្នកនាំពាក្យក្រសួងយុត្តិធម៌ បានថ្លែងថា «មន្ត្រីអនុវត្តច្បាប់នឹងទទួលខុសត្រូវចំពោះមុខច្បាប់ផងដែរនូវសកម្មភាពបំពានច្បាប់ក្នុងពេលបំពេញមុខងាររបស់ខ្លួន យោងតាមមាត្រា៧៤ នៃច្បាប់ស្តីពីចរាចរណ៍ផ្លូវគោក»។
មាត្រា៧៤នៃច្បាប់ស្តីពីចរាចរណ៍ផ្លូវគោកចែងថា«មន្ត្រីនគរបាលចរាចរណ៍ផ្លូវគោកណាដែលនៅក្នុងក្របខណ្ឌមុខងារ ឬ ក្នុងឱកាសបំពេញមុខងាររបស់ខ្លួន ដែលបានដកហូតយកបណ្ណបើកបរស្លាកលេខ បណ្ណសម្គាល់យានជំនិះឬឃាត់ទុកយានជំនិះដោយបំពានច្បាប់ត្រូវផ្តន្ទាទោសដាក់ពន្ធនាគារពី៦ថ្ងៃទៅ១ខែ និង ពិន័យជាប្រាក់ពី១សែនរៀលទៅ៨សែនរៀល»។
ក្នុងករណីដែលមន្ត្រីនគរបាលចរាចរណ៍ផ្លូវគោកធ្វើឱ្យមានការខូចខាតឬបាត់បង់ផ្នែកណាមួយនៃយានជំនិះដែលបានឃាត់ទុក អង្គភាពសាមីត្រូវទទួលខុសត្រូវក្នុងការសងការខូចខាតឬបាត់បង់នោះ ៕
