ពោធិសាត់៖អ្នកស្រុករួមទាំងកងទ័ពរស់នៅឃុំអន្លង់រាបស្រុកវាលវែងក៏ដូចអ្នកស្រុកវាលវែងអ្នកខេត្តពោធិសាត់ទាំងមូលនិងភ្នាក់ងារទេសចររំលឹកថាតំបន់ទេសចរណ៍ពេញនិយមភ្នំ១៥០០ មិនមែន១០០៥ ទេ ។គឺភ្នំរយៈកម្ពស់១៥០០ម៉ែត្រ មិនមែនរយៈកម្ពស់១០០៥ ម៉ែត្រទេ ។
ប្រតិកម្មដូច្នេះបានកើតឡើងនៅពេលដែលអ្នកចំណូលថ្មីៗនិងភ្ញៀវទេសចរបានប្រើភាសានិយាយកាត់ថាទៅលេងភ្នំ១០០៥ដែលវាខុសទាំងស្រុងនឹងភាសាសរសេរដាក់ថាភ្នំ១៥០០។វាខុសនឹងអត្ថន័យដើម ហើយការបារម្ភជាងនេះ អាចយូរៗហៅរត់មាត់ ហើយយកការហៅខុសសោះ ថាទៅជាត្រូវ ។ នេះជាកំហុសដែលត្រូវតែកែតម្រូងបន្ទាន់ដើម្បីកុំឱ្យទៅជាទម្លាប់ ឬកុំឱ្យអង្ករក្លាយជាបាយ ។
មន្ត្រីទេសចរណ៍និងមន្ត្រីរដ្ឋបាលស្រុកវាលវែងបានឱ្យដឹងកាលពីថ្ងៃទី៩ខែកក្កដាថា៖តាំងពីផ្លូវជាតិលេខ៥៥បំបែកពីផ្លូវជាតិលេខ៥ត្រង់ជិតបូជនីដ្ឋានអ្នកតាឃ្លាំងមឿងសង្កាត់ស្វាយអាត់ក្រុងពោធិសាត់ទៅច្រកព្រំដែនថ្នដាកម្ពុជាថៃប្រវែងជាង១៧០គមបានស្ថាបនាជិតរួច។
ជាពិសេសក្រោយការសម្ពោធដាក់ឱ្យប្រើប្រាស់ផ្លូវការដោយសម្តេចតេជោហ៊ុនសែននាយករដ្ឋមន្ត្រីនិងលោកឯកអគ្គដ្ឋទូតចិនកាលពីខែមីនាឆ្នាំ២០២០តំបន់ទេសចរណ៍ភ្នំ១៥០០នៃជួរភ្នំក្រវាញខាងលិចនិងកន្លែងទាក់ទាញដទៃទៀតបានទទួលភ្ញៀវទេសចរក្នុងស្រុក(ភ្ញៀវជាតិ)ច្រើនឡើងៗបានទៅទស្សនា ។
អ្វីដែលចាប់អារម្មណ៍បំផុតនោះគឺផ្លូវអន្ទង់អាំងនៅត្រង់ចង្កេះភ្នំ១៥០០ មិនដល់កំពូលភ្នំនៅឡើយទេ ។ទីនោះមានទេសភាពទស្សនីយភាពនិងទិដ្ឋភពគួរអោយគយគន់យ៉ាងខ្លាំង។គឺបើមិនបានទៅដល់និងឃើញផ្ទាល់ ពិតជាគួរឱ្យសោកស្តាយមែនទែន ។
ប្រភពបានបន្តថា ៖រាល់ថ្ងៃនេះទោះជារដូវវស្សាហើយស្ថិតក្នុងអំឡុងនៃការរីករាលដាលនៃជំងឺកូវីដ១៩ ក៏ដោយចុះក៏ភ្ញៀវជាតិរាប់រយពាន់នាក់ក្នុង១ថ្ងៃៗពិសេសចុងសប្តាហ៍បានទៅទស្សនាគោលដៅទេសចរណ៍នៅស្រុកវាលវែងនោះ ។
ក្នុងនោះក៏មានក្រុមហ៊ុនភ្នាក់ងារទេសចរណ៍មួយចំនួនក៏បានដាក់ការចុះឈ្មោះកម្មវិធីកម្សាន្តទៅកាន់តំបន់ជួរភ្នំក្រវាញ (cardamom mountain) នោះ ។គោលដៅត្រូវកម្សាន្តរួមមានកោះសំពៅមាស បូជនីយដ្ឋានអ្នកតាឃ្លាំងមឿង តំបន់ឆ្លាក់ថ្មកែវទីប្រជុំជនខេត្តអូរសោម,ទំនប់វារីអគ្គិសនីអាតៃ ផ្ទះសំណាក់គ្រែគ្រញូង, ប្រមោយ, បាលវែង, ភ្នំ១៥០០, ទឹកធ្លាក់ថ្មដាតូច, ជ្រលងភ្នំ, ចម្ការម្រេច ចម្ការកៅស៊ូ, ច្រកព្រំដែនថ្មដានិងតំបន់ច្រក ជាដើម ៕
