ភ្នំពេញ៖អនុរដ្ឋលេខាធិការ ក្រសួងសាធារណការ និងដឹកជញ្ជូនលោក គង់ វិមានបានបង្ហោះរូបភាពផ្លាករថយន្ត នៅលើហ្វេសប៊ុកកាលពីថ្ងៃទី២៣ មេសា ២០២១ដោបានបញ្ជាក់ច្បាស់ថា៖ “ក្រសួងសាធារណការ និងដឹកជញ្ជូន មិនមានគោលការណ៍ ឬច្បាប់ណា ដែលអនុញ្ញាតឱ្យប្រើប្រាស់ប្រភេទផ្លាកលេខរថយន្តពិសេសផ្ទាល់ខ្លួនរបៀបនេះទេ” ។
នាយខុទ្ទកាល័យ ក្រសួងសាធារណការ និងដឹកជញ្ជូន បានបញ្ជាក់ថា៖ នេះជាផ្លាកលេខក្លែងក្លាយ ដែលអ្នកប្រើប្រាស់ ធ្វើឱ្យប៉ះពាល់យ៉ាងធ្ងន់ធ្ងរដល់ស្ថាប័នរដ្ឋ និងគណបក្ស លោក បានស្នើឱ្យសមត្ថកិច្ចចាត់វិធានការតាមផ្លូវច្បាប់ជាបន្ទាន់ ។
សូមជម្រាបថា៖កាលពីថ្ងៃទី២៥ មីនា ២០២០ កន្លងទៅ ក្រសួងសាធារណការ និងដឹកជញ្ជូន ធ្លាប់បានប្រកាសហើយថា៖ផ្លាកសម្គាល់រថយន្ត “កម្ពុជា-ឯកឧត្តម អ្នកឧកញ៉ា ប៉ែន លឹម” ។គឺខុសច្បាប់ ផ្ទុយពីស្មារតីអនុក្រឹត្យ លេខ៧៣ អនក្រ.បក ស្តីពី ការចុះបញ្ជីផ្តល់បណ្ណសម្គាល់យានជំនិះ និងបំពាក់ផ្លាកលេខសម្គាល់យានជំនិះ ចុះថ្ងៃទី៣ ខែមិថុនា ឆ្នាំ២០១៩ ។
ម្ចាស់រថយន្តដែលមានភិនភាគ ខាងលើ ត្រូវដកផ្លាកលេខនេះចេញជាបន្ទាន់រួចចុះបញ្ជីបំពាក់ផ្លាកលេខស្របច្បាប់ឱ្យបានត្រឹមត្រូវ ។បើមិនដូច្នោះទេក្រសួងមានសមត្ថកិច្ចពាក់ព័ន្ធ នឹងចាត់វិធានការតាមផ្លូវច្បាប់។ ប៉ុន្តែតាំងពីពេលនោះមកជាង១ឆ្នាំហើយរហូតមកដល់ពេលថ្មីៗនេះ បែរជារថយន្តផ្លាកលេខខុសច្បាប់នេះ បន្តធ្វើចរាចរតាមដងផ្លូវយ៉ាងរំភើយ ៕ដើមរាំង
