ព្រៃវែង៖ប្រជាពលរដ្ឋរាប់រយនាក់បាននាំគ្នាផ្អើលចេញមករារាំងមិនឱ្យក្រុមគ្រូពេទ្យ និងអាជ្ញាធរយកសពបុរសជនជាតិអីស្លាមម្នាក់ដែលស្លាប់ដោយជំងឺកូវីដ១៩មកបញ្ចុះនៅលើទួលកប់សព ក្បែរភូមិដោយពួកគាត់បារម្ភខ្លាចឆ្លងជំងឺកូវីដ១៩។ហេតុការណ៍នេះ បានកើតឡើង នៅតំបន់ភូមិល្ហើយស្ថិតក្នុងភូមិឧត្តម ឃុំព្រែកខ្សាយ(ក) ស្រុកពាមរក៍ ខេត្តព្រៃវែងកាលពីរសៀល ថ្ងៃទី១ សីហាឆ្នាំ២០២១។
ប្រភពបានឱ្យដឹងថា សាកសពដែលត្រូវបានគេដឹកបំណងយកមកបញ្ចុះនៅទីតាំងខាងលើ គឺ មានទីលំនៅក្នុងភូមិចាក់ខ្លាញ់ ឃុំពាមរក៍ ស្រុកពាមរក៍ ខេត្តព្រៃវែង។ គេឃើញមានអេស្កាវ៉ាទ័រ១គ្រឿង បានបើកចូលមកក្នុងភូមិ ហើយបានប្រាប់អ្នកភូមិថា គេចូលមកជីកធ្វើផ្លូវ ។ប៉ុន្តែពេលចូលទៅដល់ទួលកប់ខ្មោច ស្រាប់តែជីករណ្តៅពីលើផ្នូរចាស់របស់អ្នកភូមិ ក្រោយមក ក៏ស្រាប់តែមានខាងអាជ្ញាធរ មកដើរប្រាប់អ្នកភូមិឱ្យចូលផ្ទះកុំចេញឆ្វេចឆ្វាច ព្រោះបន្តិចទៀតគេយកសពកូវីដមកបញ្ចុះ ។
លោកស្រី ស្រេង ទៀង អភិបាលស្រុកពាមរក៍ បានឱ្យដឹងថា បុរសជនជាតិអីស្លាមនេះ គាត់មានប្រវត្តិកើតជំងឺលើសឈាម និងទឹកនោមផ្អែម ហើយគេបានប្រទះឃើញគាត់ដេកស្លាប់នៅក្នុងផ្ទះ កាលពីថ្ងៃទី៣១ កក្កដាកន្លងទៅ។ ប៉ុន្តែដើម្បីការពារតាមវិធានការសុខាភិបាល ទើបលោកស្រីបានទាក់ទងហៅក្រុមគ្រូពេទ្យ មកយកសំណាកសពជាមុនសិន បើគាត់អវិជ្ជមានជំងឺកូវីដ១៩ទើបប្រគល់ឱ្យសាច់ញាតិ រៀបចំយកទៅធ្វើបុណ្យ។
ប៉ុន្តែក្រោយពីពិនិត្យរួចលទ្ធផល បែរជាវិជ្ជមានជំងឺកូវីដ១៩ ទើបគណៈកម្មការទប់ស្កាត់ជំងឺកូវីដ១៩ថ្នាក់ស្រុក ត្រូវចាត់ចែងរតាំងសុវត្ថិភាព ដើម្បីបញ្ចុះសព ។លោកស្រីអភិបាលស្រុកបានបញ្ជាក់ទៀតថា ដោយសារយើងពុំមានទីតាំងដីទំនេរអាចបញ្ចុះសពបាន ទើបអាជ្ញាធរសម្រេចចយកសពទៅបញ្ចុះនៅទីទួល ខាងក្រោយតំបន់ភូមិល្ហើយនោះ ដោយសារទីតាំងនោះ គឺជាដីសាធារណៈ និងស្ថិតក្នុងការគ្រប់គ្រងរបស់រដ្ឋផង។មុនហ្នឹងយកសពចេញទៅ គ្រូពេទ្យជំនាញបានរុំខ្ចប់យ៉ាងជិតដាក់ក្នុងម្ឈូស និងបានបាញ់ថ្នាំសម្លាប់មេរោគយ៉ាងត្រឹមត្រូវផងដែរ ។
ប៉ុន្តែដោយសារអ្នកភូមិមិនយល់ ហើយមានការភ័យខ្លាច ទើបនាំគ្នាចេញមករារាំងបែបនេះ ហើយអាជ្ញាធរក៏មិនប្រឆាំងនិងពលរដ្ឋដែរ គឺក្រោយមានការរារាំងពីប្រជាពលរដ្ឋ និងមានការស្នើសុំពីសាច់ញាតិនៃសព អាជ្ញាធរក៏អនុញ្ញាតឱ្យយកសពទៅបញ្ចុះនៅស្រុកកំណើត ឯខេត្តត្បូងឃ្មុំនៅល្ងាចថ្ងៃដដែលនោះវិញ៕
