ភ្នំពេញ៖សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជានៅក្នុងសន្និសីទសារព័ត៌មាននៅព្រឹកថ្ងៃទី៣០ខែមករាឆ្នាំ២០២០ នេះបានលើក ឡើងថាជំងឺពិតប្រាកដដែលបានកើតក្នុងរយៈពេលកន្លងមកនៅកម្ពុជាគឺជំងឺភ័យខ្លាចហួសហេតុ បន្ថែមដោយការផ្សាយព័ត៌មានបំភ្លៃការពិតមួយចំនួនដែលគ្មានវិជ្ជា ជីវៈ។
សម្តេចតេជោនាយករដ្ឋមន្ត្រីបានមានប្រសាសន៍ថា៖”បញ្ហាដែលចោទឡើងប៉ុន្មានថ្ងៃនេះតើអ្វីទៅដែលជាបញ្ហាពិតប្រាកដ តើប្រទេសយើងកំពុងមានជំងឺអ្វីទៅខ្ញុំព្រះករុណាខ្ញុំគួរតែយកឱកាសនេះបញ្ជាក់ថាជំងឺពិតប្រាកដដែលបាននិងកំពុងកើតនៅក្នុងប្រទេសរបស់យើងគឺជំងឺភ័យខ្លាចមិនមែនជាជំងឺចេញពីវីរុសកូរ៉ូណាថ្មី។ដែល បានកើតចេញពីប្រទេសចិន ចេញពីទីក្រុងវូហាន នៃប្រទេសចិននោះទេ”។
សម្តេចតេជោបានបន្តថានេះជាការជាក់ស្ដែងយើងអាចចោទចេញជាសំណួរថាតើមកដល់ពេលនេះមានជនជាតិ កម្ពុជាណាម្នាក់ឬជនជាតិបរទេសណាម្នាក់ដែលនៅលើទឹកដីកម្ពុជាបានស្លាប់ដោយសារជំងឺនេះហើយឬនៅ? វាមិនទាន់មានទាល់តែសោះក្រៅតែពីមួយករណីដែល បានកើតឡើងនៅខេត្តព្រះសីហនុ”។
សម្តេចតេជោបានបន្តថា៖ មូលហេតុអ្វីបានជាសម្ពាធផ្លូវអារម្មណ៍សម្រាប់ប្រជាជនយើងខ្លាំងម្ល៉េះ ដូច្នេះជំងឺពិតប្រាកដដែលបានកើតក្នុងរយៈពេលកន្លងទៅ រហូតមកដល់ពេលនេះគឺជំងឺភ័យខ្លាចហួសហេតុ ដែលវាហួសពីការពិត បន្ថែមទៅដោយការបំពុលដោយព័ត៌មានមួយចំនួនដែលខ្វះការទទួលខុសត្រូវនិងជាប្រភេទ នៃការបំពុលសង្គម។
សម្ដេចតេជោបានស្នើឱ្យអ្នកសារព័ត៌មានមួយចំនួនពិនិត្យឡើងវិញនូវឥរិយាបថរបស់ខ្លួននៅក្នុងពេលផ្សព្វផ្សាយ ។ ដោយថ្លែងសំដៅទៅអ្នកយកព័ត៌មានដែលមាន រហ័សនាម KO1 សម្តេចតេជោបានថ្លែងថាកុំធ្វើបែបដូចគ្រាប់បែកប៉ារម៉ាណូធ្លាក់ត្រូវក្បាលរបស់ខ្លួននៅក្នុងមន្ទីរពេទ្យរុស្ស៊ី។
ចឹងស្ថានភាពអស់ទាំងនេះវាបង្កឱ្យមានការ ភ័យខ្លាចសម្រាប់ប្រជាពលរដ្ឋរបស់យើងក្នុងពេលដែលគាត់មិនយល់ ។ប៉ុន្តែអ្វីដែលសំខាន់ខ្ញុំគួរតែនិយាយថាការភ័យខ្លាចដែលបណ្ដាលមកពីការបំពុលជំនឿទៅលើ ការមិនទទួលខុសត្រូវរបស់ផ្នែកព័ត៌មានមួយចំនួន៕រិទ្ធ
