ដោយ៖គ្រញូង/បាត់ដំបង៖រូបសំណាកលោកតាដំបងគ្រញូងនៅតែមានបារមីល្បីល្បាញរហូតមកដល់បច្ចុប្បន្ននិងជាគោលដៅទេសចរណ៍ដ៏មានសក្តានុពលសម្រាប់ទាក់ទាញភ្ញៀវជាតិនិងអន្តរជាតិឱ្យចូលមកទស្សនាខេត្តបាត់ដំបងកាន់តែកើនឡើងច្រើនថែមទៀត។
ជួបជាមួយអ្នករកស៊ីលក់គ្រឿងសក្ការៈបូជានៅពីមុខរូបសំណាកលោកតាដំបងគ្រញូងបានបញ្ជាក់ថាតាំងពីពេលសាងសង់រូបសំណាកលោកតាដំបងគ្រញូងដែលមានរូបលោកគ្រួក្មេងនៅសំរោងតាកុក។ស្ថិតក្នុងស្រុកឯកភ្នំរួមជាមួយលោកទេសរដ្ឋមន្ត្រីសេរីកោសល្យរួចមករហូតដល់បច្ចុប្បន្ននេះរូបសំណាកលោកតាដំបងគ្រញូងនៅតែមានឈ្មោះល្បីល្បាញ។
មានគេមកគោរពបូជាមិនដែលដាច់ទាំងនេះដោយសារតែប្រជាពលរដ្ឋនៅក្នុងក្រុងនិងស្រុកឆ្ងាយៗគេមានជំនឿលើបារមីរបស់លោកតានៅតែសក្តិសិទ្ធិពេលមានអាសន្នអន់ក្រឬមានជំងីមានទំនាស់ឬបាត់សម្ភារៈផ្សេងៗតែងតែមកបន់លោកតាឲ្យជួយជានិច្ច។មិនមែនតែអ្នករស់នៅក្នុងស្រុកទោះបីជាភ្ញៀវទេសចរណ៍ជាតិធ្វើដំណើរតាមរថយន្តតូចធុំពេលមកដល់ទីនេះតែងតែឈប់រថយន្តចុះទិញសម្ភារៈសក្ការៈបូជាដូចជាចេកផ្កាឈូកទៀនធូបជាដើម។
មកអុចបួងសួងបន់ស្រន់សុំសេចក្តីសុខក្នុងពេលធ្វើដំណើរកុំឱ្យជួបគ្រោះថ្នាក់តាមដងផ្លូវនិងសុំសេចក្តីសុខសប្បាយ។អ្នកលក់ដដែលបានបញ្ជាក់ថាជារៀងរាល់ឆ្នាំឱ្យតែដល់រដូវប្រឡងបាក់ឌុបម្តងៗគេតែងសង្កេតឃើញមានសិស្សប្រុសស្រីនាំគ្នាយកវត្ថុសក្ការៈមានមាន់ស្ងោទាខ្វៃចេកផ្កាភ្ញីគ្រឿងភេសជ្ជះនាំយកមកសែនថ្វាយលោកតាដំបងគ្រញូងឱ្យជួយកុំឱ្យភ័យជាពិសេសជួយឱ្យប្រឡងជាប់។ពេលប្រឡងជាប់ពួកគេមិនភ្លេចយកសំណែនមកសែនលាបំណន់ទេ។
ចំពោះលោកងួនរតនៈអភិបាលខេត្តធ្លាប់បានប្រាប់ថារូបលោកតាដំបងគ្រញូងមិនត្រឹមតែល្បីល្បាញខាជំនឿអរូបិយតែប៉ុណ្ណោះទេប៉ុន្តែនៅជាគោលដៅទេសចរណ៍សម្រាប់ទាក់ទាញភ្ញៀវវទេសចរណ៍ជាតិនិងអន្តរជាតិឲ្យចូលមកទស្សនាក្នុងខេត្តបាត់ដំបងកាន់តែមានចំនួនច្រើនថែមទៀត។
លោកអ៊ុកអ៊ំភីនីហ្សារ៉ាប្រធានមន្ទីរទេសចរណ៍ខេត្តបានឱ្យដឹងថានៅក្នុងឆ្នាំ២០១៩កន្លងមកមានភ្ញៀវទេសចរណ៍ជាតិនិងអន្តរជាតិចូលមកលេងកម្សាន្តនៅក្នុងខេត្តបាត់ដំបងមានចំនួន៧៤.៥៤១នាក់។ក្នុងនោះភ្ញៀវជាតិមាន៥៤.៨៩៧នាក់និងភ្ញៀវអន្តរជាតិមាន៤.៩៦៤នាក់បើប្រៀបធៀបនឹងឆ្នាំ២០១៨មានភ្ញៀវទេសចរណ៍៦២.៩៧០នាក់។ចំណែកនៅក្នុងឆ្នាំ២០២០នេះមន្ទីរមិនបានធ្វើការបូកសរុបនៅឡើយទេ៕