ព័ត៌មានអន្តរជាតិ៖មេធាវីមួយក្រុមនៅអាមេរិកបានចាប់ផ្តើប្តឹងតាងនាមក្រុមប្រឆាំងរដ្ឋចិនដើម្បីទាមទារប្រាក់រាប់រយពាន់លានដុល្លារដោយសារតែការផ្ទុះជំងឺកូវីដ១៩ ដោយពួកគេចោទប្រកាន់ក្រុមមេដឹកនាំចិនថាធ្វេសប្រហែសដោយអនុញ្ញាតឱ្យផ្ទុះជំងឺនិងបន្ទាប់មកខិតខំបិទបាំង។
បណ្តឹងតាងនាមក្រុមដែលពាក់ព័ន្ធបណ្តឹងរាប់ពាន់មកពី៤០ប្រទេស រួមមានអាមេរិកនិងអង់គ្លេស ត្រូវបានប្តឹងនៅរដ្ឋផ្លរីដា កាលពីខែមុន។បណ្តឹងទី២ ដែលធ្វើឡើងនៅខែនេះតាងនាមឱ្យបុគ្គលិកវេជ្ជសាស្ត្រ ដែលចោទប្រកាន់ចិនថា លក់ដំឡើងថ្លៃគ្រឿងបរិក្ខាវេជ្ជសាស្ត្រសម្រាប់សង្គ្រោះជីវិតក្នុងពេលពិភពលោកជួបវិបត្តិសុខភាព។នេះបើតាមការផ្សាយរបស់សារព័ត៌មានដេល្លីមេលកាលពីថ្ងៃអាទិត្យទី១៩ខែមេសាឆ្នាំ២០២០។
បណ្តឹងប្រឆាំងចិនមួយទៀតក៏ទំនងជាចេញពីក្រុមមេធាវីសិទ្ធិមនុស្សអ៊ីស្រាអែល ដែលមានឯកទេសប្តឹងរដ្ឋពីបទបង្កភេរវកម្ម។សារព័ត៌មានដដែលក៏បាននិយាយថាក្នុងពេលជាមួយគ្នាមានការអំពាវនាវឱ្យអង្គការសហប្រជាជាតិបើកធ្វើការស៊ើបអង្កេតមួយ អំពីថាតើវីរុសនេះផ្ទុះឡើងដោយរបៀបណានៅក្រុងវូហានរបស់ចិនមុនវារីកសាយទៅកាន់ផ្នែកផ្សេងៗនៃពិភពលោក។
ក្រុមមេដឹកនាំចិនកំពុងរងសម្ពាធឱ្យមានតម្លាភាពរឿងដោះស្រាយវិបត្តិកូវីដ១៩។មើលទៅ បន្ទាប់ពីចប់ជំងឺឆ្លងកូវីដ១៩ ពិភពលោកប្រឈមរឿងប្តឹងផ្តល់គ្នាបន្តទៀត។សូមបញ្ជាក់ថា រដ្ឋាភិបាលក្រុងប៉េកាំងកំពុងស្ថិតក្រោមសម្ពាធកាន់តែខ្លាំងឡើងអំពីតម្លាភាពនៅក្នុងការដោះស្រាយជំងឺឆ្លងកូវីដ១៩។រដ្ឋាភិបាលអាមេរិកក៏បានបញ្ជាទៅទីភ្នាក់ងារស៊ើបការណ៍របស់ខ្លួនឱឱ្យស៊ើបអង្កេតថាតើវីរុសនេះពិតជាមានប្រភពចេញពីមន្ទីរពិសោធន៍មួយនៅក្រុងវូហានមែនឬអត់។
រដ្ឋមន្ត្រីការបរទេសអាមេរិក បាននិយាយថា ការស៊ើបអង្កេតមួយកំពុងប្រព្រឹត្តទៅអំពីថាតើវីរុសនេះផ្ទុះចេញទៅកាន់ពិភពលោកដោយវិធីណា។តែនាយកវិទ្យាស្ថានវីរុសវិទ្យានៅវូហាន បានច្រានចោលការអះអាងកាលពីថ្ងៃសៅរ៍ ដោយលោកថា«វាមិនអាចទៅរួចទេ» ដែលជំងឺកូវីដ១៩ចេញពីមន្ទីរពិសោធន៍របស់លោក។
ប្រធានាធិបតីត្រាំរបស់អាមេរិកកាលពីថ្ងៃសៅរ៍ក៏បានព្រមានថា«ចិននឹងជួបផលវិបាក»បើការស៊ើបអង្កេតបង្ហាញថា ប្រទេសនេះទទួលខុសត្រូវចំពោះការផ្ទុះជំងឺឆ្លងកូវីដ១៩។លោកត្រាំកាលពីថ្ងៃសៅរ៍ក៏បានបង្ហាញការមន្ទិលសារជាថ្មីអំពីចំនួនមនុស្សស្លាប់ដោយវីរុសកូរូណានៅចិន ដោយកាលពីថ្ងៃសុក្រលោកថា ចំនួនមនុស្សស្លាប់ដោយជំងឺនេះនៅចិនអាចខ្ពស់ជាងនៅអាមេរិក៕Rasmi news