ភ្នំពេញ៖បន្ទាប់ពីបិទសង្វៀន មួយរយៈខ្លី ដោយសារតែការរាតត្បាត នៃជំងឺកូវីដ១៩នោះនៅថ្ងៃទី២ឧសភាខាងមុខនេះ ទូរទស្សន៍ប៉ុស្តិ៍លេខ៥ នឹងបើកឱ្យមានការប្រកួតឡើងវិញ តែប្រកួតដោយមិនអនុញ្ញាតឱ្យមានអ្នកចូលទស្សនាឡើយ គឺគ្រាន់តែផ្សាយផ្ទាល់ តាមទូរទស្សន៍ ដូចស្ថានីយ៍នានាដែរ ។
សម្រាប់ការបើកសង្វៀនវិញនេះ អ្នកប្រដាល់ជើងចាស់ ២ រូប ត្រូវបានដាក់ឱ្យប្រកួតគ្នា។ នន់ ជំនិត ក្លិបស្វាយរលំឬទ្ធិជ័យ ប្រកួតជាមួយ ចៅ ផលឌឿ ក្លិបសំរោងកោងកីឡា ខេត្តបាត់ដំបង ដោយប្រកួតគ្នា ក្នុងប្រភេទទម្ងន់ ៧១ គីឡូក្រាម ។
អតីតកាល របស់អ្នកប្រដាល់ វ័យចំណាស់ ទាំង ២ រូបនេះ អស្ចារ្យណាស់ ។ គេជាអ្នកប្រដាល់ ដែលមានកណ្ដាប់ដៃធ្ងន់រហ័សកម្លាំងអស្ចារ្យ។មិនតែប៉ុណ្ណោះស្នៀតជង្គង់ កែងនិងស្នៀតទាត់របស់គេ ក៏មិនអាចមើលស្រាល បានដែរ។នន់ ជំនិត និង ចៅ ផលឌឿ
ពួកគេមានវ័យច្រើនហើយ តែកលល្បិច នៃការប្រកួតរបស់គេ នៅតែល្អដដែល គ្រាន់តែកម្លាំងរបស់គេ មិនដូចដើមតែប៉ុណ្ណោះ ។ ការដាក់អ្នកប្រដាល់ជើងខ្លាំង វ័យចំណាស់ឱ្យប្រកួតគ្នាបែបនេះ ក្នុងបំណងឱ្យអ្នកប្រដាល់ ស្រករក្រោយ រៀនវ៉ៃ ដោយប្រើកលល្បិចឱ្យបានច្រើន ជាជាងវ៉ៃ ដោយប្រើកម្លាំងបាយ។ ជំនួបរវាងអ្នកប្រដាល់ វ័យចំណាស់ទាំង ២ រូបនេះ គេលំបាកស្មាន មុនពីជ័យជំនះណាស់ ។
សោម ពិសិដ្ឋ ក្លិបអេភូថងកីឡា ប្រកួតជាមួយអ្នកប្រដាល់ ច្រឹក កុសល ក្លិបខ្លារខិនមានរិទ្ធ ដោយប្រកួតគ្នាក្នុងប្រភេទទម្ងន់៦៥គីឡូក្រាម។អ្នកប្រដាល់ទាំង២រូបនេះមិនសូវមាននរណាស្គាល់ក៏ពិតមែន តែគេវ៉ៃបានល្អ និងមានកម្លាំងគ្រប់គ្រាន់ សម្រាប់វ៉ៃ ៥ ទឹក ។
កែវ សំរិទ្ធ ក្លិបខេត្តរតនគីរី ដែលទើបតែប្រកួតចាញ់ពិន្ទុ អ្នកប្រដាល់ អ៊ុង កំសត់ ក្លិបព្រៃទទឹងកីឡា ខេត្តបាត់ដំបងនោះ ត្រូវបានដាក់ឲ្យប្រកួតជាមួយ អ្នកប្រដាល់ជើងកន្ត្រៃហោះ ធា នុរាជ ក្លិបម្កុដរាជសីហ៍ ។អ្នកប្រដាល់ទាំង ២ រូបនេះ ប្រកួតគ្នា ក្នុងប្រភេទទម្ងន់ ៦៥ គីឡូក្រាម ។
តាមពិត អ្នកប្រដាល់ទាំង ២ រូបនេះ ធ្លាប់ជួបប្រកួតគ្នា កន្លងមក ដោយមានឈ្នះ ចាញ់ទៅវិញទៅមក ដោយគ្រាន់តែភាគច្រើន ធា នុរាជ ជាអ្នកឈ្នះតែប៉ុណ្ណោះ ។សំរិទ្ធ ខ្លាំងដៃ តែអន់ជើងក្រោម សម្រាប់ ធា នុរាជ ទោះបីគេមានអំណួត ខាងស្នៀតនាគវ័ធកន្ទុយ លោតទាត់ផ្កាប់ចាន ក៏ពិតមែន តែកែង ជង្គង់ កណ្ដាប់ដៃ របស់គេ មិនអាចមើលរំលងបានឡើយ។ លើកនេះ នរណា ជាអ្នកខ្លាំង ពិតប្រាកដ ?។
សេក គឹមសាន្ដ ក្លិបអង្គរមានជ័យ ខេត្តសៀមរាប ប្រកួតជាមួយ អ្នកប្រដាល់ លន់ សៀកឡេង ក្លិបថ្នល់ទទឹងគុនខ្មែរ ដោយប្រកួតគ្នា ក្នុងប្រភេទទម្ងន់ ៥៧ គីឡូក្រាម ។ អ្នកប្រដាល់ទាំង ២ រូបនេះ ក៏សុទ្ធតែខ្លាំងដូចគ្នា តែសៀកឡេង ខ្សោយ ក្នុងការការពារបន្តិច ព្រមទាំងឆាប់មាន អំណួតណាស់ ។ នរណា ជាអ្នកឈ្នះ ?សាន់ វាសនា ក្លិបនាគរាជចតុមុខ ត្រូវបានដាក់ឲ្យប្រកួត ជាមួយអ្នកប្រដាល់ ឡុង សុឃា ក្លិបសាលវ័ន្ដកីឡា ដោយប្រកួតគ្នា ក្នុងប្រភេទទម្ងន់ ៥៤ គីឡូក្រាម ៕រ៉ូហ្សា
