ភ្នំពេញ៖ក្រុមប្រឹក្សាជាតិប្រឆាំងអំពើពុករលួយនៅចុងត្រីមាសទី១ឆ្នាំ២០២០នឹងត្រូវបញ្ចប់អាណត្តិទី២របស់ខ្លួនហើយនឹងត្រូវបន្តអាណត្តិទី៣ទៀតដែលមានរយៈពេល៥ឆ្នាំគឺឆ្នាំ២០២០២០២៤។ជាមួយគ្នាដើម្បីទទួលបានជោគជ័យនៅអាណត្តិថ្មីនេះដែរក្រុមប្រឹក្សាមួយនេះបានប្តេជ្ញាប្រមូលផ្តុំលើ៨ចំណុចធំៗ។ក្នុងនេះបានផ្តោតសំខាន់ផងដែរក្នុងការត្រួតពិនិត្យគ្រប់ចំណុចនូវផែនការយុទ្ធសាស្ត្រនាអាណត្តិកន្លងមកដើម្បីបំពេញភារៈកិច្ចឱ្យបានទទួលជោគជ័យខ្ពស់នូវអាណត្តិថ្មីបន្តទៀត។
សេចក្តីប្រកាសរបស់ក្រុមប្រឹក្សាជាតិប្រឆាំងអំពើពុករលួយដែលបានបើកកិច្ចប្រជុំកាលពីរសៀលថ្ងៃទី២៧ខែធ្នូឆ្នាំ២០១៩បានបញ្ជាក់ថាក្រុមប្រឹក្សាជាតិប្រឆាំងអំពើពុករលួយបានបើកកិច្ចប្រជុំលើកទី៥៣អាណត្តិទី២ដោយមានវត្តមានសរុបចំនួន៨រូបលើ១១រូប។ជាមួយនោះបានដំណើរការក្រោមអធិបតីភាព លោក តុប សំ ប្រធានក្រុមប្រឹក្សាជាតិប្រឆាំងអំពើពុករលួយ។
បើតាមរបាយការណ៍របស់លោកទេសរដ្ឋមន្ត្រីឱមយិនទៀងប្រធានអង្គភាពប្រឆាំងអំពើពុករលួយអំពីសកម្មភាពការងាររបស់អង្គភាពប្រឆាំងអំពើពុករលួយ ក្នុងអំឡុងខែធ្នូ ឆ្នាំ២០១៩ ដែលមានជាអាទិ៍ ៖ការប្រកាសទ្រព្យសម្បត្តិនិងបំណុលក្នុងខែធ្នូឆ្នាំ២០១៩មាន៦៣១នាក់។ក្នុងនោះតែងតាំងថ្មីមាន៥១៣នាក់ប្រកាសទ្រព្យសម្បត្តិនិងបំណុលជាលើកចុងក្រោយដោយពីលាឈប់ពីការងារ។
ចប់អាណត្តិត្រូវបញ្ឈប់ពីការងារចូលនិវត្តន៍មាន១១៨នាក់។ក្នុងឆ្នាំ២០១៩ទាំងមូលមានការប្រកាសទ្រព្យសម្បត្តិនិងបំណុលតាមរបប២ឆ្នាំមាន២១.៩០២នាក់និងតែងតាំងថ្មីមាន៤.៨៩៥នាក់។ប្រកាសទ្រព្យសម្បត្តិនិងបំណុលជាលើកចុងក្រោយដោយពីលាឈប់ពីការងារ,ចប់អាណត្តិត្រូវបញ្ឈប់ពីការងារចូលនិវត្តន៍ មាន២.២៦១នាក់ ។
សម្រាប់ការប្រកាសទ្រព្យសម្បត្តិនិងបំណុលតាមរបប២ឆ្នាំអនុវត្តក្នុងខែមករាឆ្នាំ២០២០នេះមានមន្ត្រីចំនួន៤.៨៨៦រូបស្មើនឹង៣៨ភាគរយនៃចំនួនត្រូវប្រកាស។សរុបបានមកប្រកាសមុនពេលការចាប់ផ្តើមទទួលការប្រកាសបំណុលរបប២ឆ្នាំឆ្នាំ២០២០ ។
ប្រភពដដែលបានបញ្ជាក់ដែរថាបន្ទាប់ពីបានពិនិត្យពិភាក្សានិងអនុម័តកំណត់ហេតុកិច្ចប្រជុំទាំង២របស់ក្រុមប្រឹក្សាជាតិប្រឆាំងអំពើពុករលួយលើកទី៥២។កំណត់ហេតុសំយោគនិងកំណត់ហេតុពិស្តារក្រុមប្រឹក្សាជាតិប្រឆាំងអំពើពុករលួយបានពិនិត្យពិភាក្សានិងអនុម័តរបាយការណ៍ប្រចាំឆ្នាំ២០១៩ស្តីពីដំណើរការរបស់អង្គភាពប្រឆាំងអំពើពុករលួយ។
ក្នុងនោះក្រុមប្រឹក្សាជាតិប្រឆាំងអំពើពុករលួយបានពិនិត្យពិភាក្សាអំពីការងាររបស់អង្គភាពប្រឆាំងអំពើពុករលួយ តាមផ្នែកនីមួយៗ ១ការងារអប់រំផ្សព្វផ្សាយច្បាប់ស្តីពីការប្រឆាំងអំពើពុករលួយ។២ ការងារបង្ការ ទប់ស្កាត់អំពើពុករលួយ,៣ការងារប្រកាសទ្រព្យសម្បត្តិនិងបំណុល,៤ការងារពាក្យប្តឹង, ៥ការងារប្រឆាំងការសម្អាតប្រាក់ និងហិរញ្ញប្បទានភេរវកម្ម,៦ការងារក្នុងនិងក្រៅប្រទេស។
វាយតម្លៃខ្ពស់លើការខិតខំប្រឹងប្រែងអនុវត្តការងារប្រយុទ្ធប្រឆាំងអំពើពុករលួយរបស់អង្គភាពប្រឆាំងអំពើពុករលួយលើគ្រប់រូបភាពទាំងវិស័យសាធារណៈនិងឯកជនផ្តោតលើវិស័យអាទិភាពសំខាន់ៗ។ពង្រឹងកិច្ចសហការអន្តរជាតិពិសេសការអនុវត្តបាននូវអភិក្រមទាំង៥របស់សម្តេចតេជោនាយករដ្ឋមន្ត្រីនៅតាមក្រសួងស្ថាប័ននានាដែលបានរួមចំណែកកាត់បន្ថយអំពើពុករលួយ។
បង្កើនប្រាក់ចំណូលជាតិនិងជំនឿទុកចិត្តពីប្រជាជនយុវជនមហាជនមកលើភាពស្អាតស្អំរបស់រាជរដ្ឋាភិបាលដែលដឹកនាំដោយសម្តេចតេជោហ៊ុនសែន។សម្រាប់ទិសដៅឆ្នាំ២០២០ក្រុមប្រឹក្សាជាតិប្រឆាំងអំពើពុករលួយបានប្រមូលផ្តុំលើ៨ចំណុចធំៗ។ជាមួយការរំលឹកថាផែនការយុទ្ធសាស្ត្រប្រឆាំងអំពើពុករលួយ៥ឆ្នាំអាណត្តិទី២របស់ក្រុមប្រឹក្សាជាតិប្រឆាំងអំពើពុករលួយនឹងត្រូវបញ្ចប់នៅចុងឆមាសទី១ឆ្នាំ២០២០។
ទាមទារឱ្យអង្គភាពប្រឆាំងអំពើពុករលួយត្រូវពិនិត្យគ្រប់ចំណុចនៃផែនការយុទ្ធសាស្ត្រនេះដើម្បីបំពេញគ្រប់ភារកិច្ចឱ្យបានជោគជ័យយ៉ាងខ្ពស់ដើម្បីជាមូលដ្ឋានសម្រាប់ក្រុមប្រឹក្សាជាតិប្រឆាំងអំពើពុករលួយអាណត្តិថ្មី អាណត្តិទី៣ ឆ្នាំ២០២០-២០ ២៤ ៕