ព្រះវិហារ៖រដ្ឋបាលខេត្តបានរៀបចំកម្មវិធីអនុវត្តគម្រោងឧបត្ថម្ភសាច់ប្រាក់ជូនស្ត្រីមានផ្ទៃពោះនិងកុមារតូចអាយុក្រោម២ឆ្នាំក្នុងគ្រួសារក្រីក្រ។កម្មវិធីនេះក្រោមអធិបតីភាពលោកប្រាក់សុវណ្ណអភិបាលខេត្តព្រះវិហារដោយមានការចូលរួមពីមន្ត្រីក្រោមឱវាទខេត្តជាច្រើនរូបកាលពីថ្ងៃ៣០ខែធ្នូឆ្នាំ២០១៩។
លោករស់ស៊ីផាប្រធានមន្ទីរសង្គមកិច្ចអតីតយុទ្ធជននិងយុវនីតិសម្បទារខេត្តបានជម្រាបជូននូវគោលបំណងនៃកម្មវិធីនេះគឺដើម្បីអនុវត្តគម្រោងកម្មវិធីឧបត្ថម្ភសាច់ប្រាក់ជូនស្រីមានផ្ទៃពោះនិងកុមារអាយុក្រោម២ឆ្នាំ។ការកំណត់អត្តសញ្ញាណកម្មគ្រួសារក្រីក្រទទួលបានប្រសិទ្ធភាពតម្លាភាពនិងនិរន្តភាពដែលនឹងត្រូវចាប់ផ្តើមអនុវត្តនៅដើមខែកុម្ភៈឆ្នាំ២០២០ខាងមុខនេះ។
តាប្លែតដែលបានប្រគល់ជូននេះគឺជូនដល់ឃុំសង្កាត់ទាំង៥១ឃុំទូទាំងខេត្តដែលជាប្រតិបត្តិករផ្ទាល់ក្នុងការអនុវត្តកម្មវិធីនេះ។លោកប្រាក់សុវណ្ណអភិបាលខេត្តបានថ្លែងថាការយកចិត្តទុកដាក់របស់ប្រមុខរាជរដ្ឋាភិបាលលើសុខមាលភាពប្រជាពលរដ្ឋតាមរយៈការដាក់ចេញនូវគោលនយោបាយគាំពារសង្គម(២០១៦-២០២៥ )ដែលផ្តោតលើសសរស្តម្ភទាំងពីរគឺប្រព័ន្ធជំនួយនិងប្រព័ន្ធសន្តិសុខសង្គម។
ទាំងនេះពិតជាអាចឈានដល់ការកាត់បន្ថយភាពក្រីក្រប្រកបដោយប្រសិទ្ធភាពខ្ពស់និងការអភិវឌ្ឍជាតិប្រកបដោយនិរន្តរភាព។លោកបានបញ្ជាក់បន្ថែមថាកម្មវិធីសាច់ប្រាក់ឧបត្ថម្ភជូនដល់ស្ត្រីមានផ្ទៃពោះនិងកុមារអាយុក្រោម២ឆ្នាំនេះត្រូវបានអនុវត្តជាបីដំណាក់កាលដែលសរុបទឹកប្រាក់ក្នុងកុមារមា្នក់ទទួលបានប្រាក់ឧបត្ថម្ភ ៧៦០.០០០ រៀល៕សៅវ៉ាន់ឌី