ឧត្តរមានជ័យ៖កម្លាំងព្រះសង្ឃនិងមន្ត្រីអភិរក្សដែនជម្រកសត្វព្រៃសង្ឃរុក្ខវ័ន នៅខេត្តឧត្តរមានជ័យបានស្វែងរកសត្វទន្សោងមួយក្បាលសង្ស័យជនល្មើសលបលួចចូលបរបាញ់និងជាប់អន្ទាក់បានរងរបួស។ខណ:មន្ត្រីដើរល្បាតប្រទះឃើញស្នាមជើងមានឈាមស្រក់។
ព្រះសង្ឃប៊ុនសាលួតប្រធានសហគមន៍ព្រៃឈើសង្ឃរុក្ខវ័នមានសង្ឃដីកាថាសត្វទន្សោងមួយក្បាលសង្ស័យជនល្មើសលបលួចចូលបរបាញ់និងជាប់អន្ទាក់កាលពីសប្តាហ៍កន្លងមកនេះ។ខណ:កម្លាំងការពារអភិរក្សបានដើរល្បាតប្រទះឃើញនៅស្នាមដានជើងក្រោយអូសនិងមានឈាមស្រក់រងរបួសកំពុងលាក់ខ្លួន។
ព្រះសង្ឃបន្តថាសកម្មភាពស្វែងរកសត្វទន្សោងរងរបួសនេះបានចែកជាបីក្រុម។គឺក្រុមមន្ត្រីពេទ្យជំនាញ,ក្រុមមន្ត្រីឧទ្យានុរក្ស,ក្រុមកម្លាំងព្រះសង្ឃនៅចំណុចគោលដៅផ្សេងៗគ្នា។តំបន់ភ្នំអណ្តូងតំបន់ភ្នំក្រោលនិងតំបន់ភ្នំភ្ជៀវស្ថិតនៅភូមិចារថ្មីឃុំលំទងស្រុកអន្លង់វែង។រហូតមកដល់ពេលនេះនៅរកមិនទាន់ឃើញនៅឡើយទេ។
ព្រះសង្ឃមានសង្ឃដីកាបន្ថែមថា បច្ចុប្បន្នដោយស្ថានភាពអាកាសធាតុមានភ្លៀងធ្លាក់ជាបន្តបន្ទាប់ ធ្វើឱ្យបាត់ស្នាមពិបាកនឹងការស្វែងរក។តែទោះយ៉ាងណាកម្លាំងនៅតែបន្តរុករកតាមតំបន់និងជម្រកថ្មីផ្សេងទៀត។
គួររំលឹកថាថ្មីៗនេះសត្វទន្សោងឈ្មោលមួយក្បាលរងរបួសដាច់ជើងក្រោយដោយសារតែជាប់អន្ទាក់របស់ព្រាន និងដាច់ទឹកស្មៅជាច្រើនថ្ងៃផងនោះបានងាប់។ទោះបីជាក្រុមមន្ត្រីជំនាញនិងមន្ត្រីពាក់ព័ន្ធ បានខិតខំព្យាយាមសង្គ្រោះយ៉ាងណាក្តី៕សាយ
