ភ្នំពេញៈក្រសួងសាធារណការនិងដឹកជញ្ជូនកាលពីរសៀលថ្ងៃទី៧ខែមករាឆ្នាំ២០២០បានបើកឱ្យដំណើរការជាផ្លូវការ,នៃការលក់លេខចុះបញ្ជីពិសេសផ្ទាល់ខ្លួនសម្រាប់រថយន្ដដើម្បីផ្តល់ជម្រើសដល់ប្រជាពលរដ្ឋដែលមានលទ្ធភាពអាចជ្រើសរើសស្លាកលេខដែលមានលក្ខណៈពិសេសអាចកម្ម៉ង់តាមការពេញចិត្ត។
ការបើកឱ្យដំណើរការជាផ្លូវការនៃការលក់លេខចុះបញ្ជីពិសេសផ្ទាល់ខ្លួនសម្រាប់រថយន្តនេះធ្វើឡើងក្នុងគោលបំណងដើម្បីបំពេញតម្រូវការនិងផ្តល់ជម្រើសជូនប្រជាពលរដ្ឋដែលចង់បានលេខចុះបញ្ជីមានលក្ខណៈពិសេសផ្ទាល់ខ្លួន។ដែលបង្ហាញពីអត្តសញ្ញាណកម្ពុជាលើឆាកអន្តរជាតិអាចកៀរគរចំណូលបន្ថែមជូនជាតិនិងដើម្បីឱ្យម្ចាស់រថយន្តអាចរក្សាលេខនោះទុកសម្រាប់ចុះបញ្ជីលើរថយន្តថ្មីរបស់ខ្លួនក្រោយៗទៀត។
ស្លាកលេខរថយន្តពិសេសដែលអាចដាក់ឈ្មោះខ្លួនឯងឬដាក់តាមចិត្តចង់ព្រមទាំងអាចកាន់កាប់មួយជីវិតនោះមានតម្លៃចន្លោះពី២លានរៀលរហូតដល់១ពាន់លានរៀលនិងអាចលើសពីនេះតាមរយៈការដេញថ្លៃ។
លោកស៊ុនចាន់ថុលទេសរដ្ឋមន្ត្រីនិងជារដ្ឋមន្ត្រីក្រសួងសាធារណការនិងដឹកជញ្ជូនបានគូសបញ្ជាក់ថា លេខពិសេសផ្ទាល់ខ្លួន គឺសំដៅលើប្រភេទលេខចុះបញ្ជី ដែលផ្នែកខាងលើសរសេរអក្សរខ្មែរ “កម្ពុជា” ផ្នែកកណ្ដាលជាលេខចុះបញ្ជីមានលេខឬ/និងអក្សរឡាតាំងមិនលើសពី៨(ប្រាំបី)ខ្ទង់និងផ្នែកខាងក្រោមសរសេរអក្សរឡាតាំង“CAMBODIA” នៅពីក្រោមបន្ទាត់ផ្តេក។
ស្លាកលេខពិសេសផ្ទាល់ខ្លួនអាចដាក់ឈ្មោះឬលេខដែលខ្លួនពេញចិត្តបានលើកលែងតែឈ្មោះទីកន្លែងប្រវត្តិសាស្ត្រ ឈ្មោះប្រាសាទ ឈ្មោះរាជធានី-ខេត្ត ឈ្មោះក្រសួង-ស្ថាប័ន គណបក្សនយោបាយ ឈ្មោះថ្នាក់ដឹកនាំជាន់ខ្ពស់ និងជនល្បីឈ្មោះ ជាដើម។
ទន្ទឹមនឹងនោះផងដែរ លោកទេសរដ្ឋមន្ត្រី បានស្នើសុំឱ្យក្រសួងស្ថាប័ន-ពាក់ព័ន្ធសហការជាមួយអគ្គនាយកដ្ឋានជំនាញរបស់ក្រសួងសាធារណការនិងដឹកជញ្ជូនដើម្បីអនុវត្តការងារនេះឱ្យមានប្រសិទ្ធភាពខ្ពស់ព្រមទាំងអំពាវនាវឱ្យបងប្អូនប្រជាពលរដ្ឋប្រើប្រាស់ប្រព័ន្ធស្វ័យប្រវត្តិកម្មរបស់ក្រសួងក្នុងការស្នើសុំសេវាសាធារណៈចាំបាច់នានា ជាពិសេសចូលរួមជាមួយក្រសួងក្នុងការអនុវត្តការងារផ្ទេរកម្មសិទ្ធិរថយន្ត។
សូមបញ្ជាក់ថា៖តម្លៃមូលដ្ឋានក្នុងការលក់លេខចុះបញ្ជីពិសេសផ្ទាល់ខ្លួនគឺចាប់ពីពីរលានរៀលឡើង រហូតដល់មួយពាន់លានរៀលហើយការលក់លេខចុះបញ្ជីពិសេសផ្ទាល់ខ្លួននេះត្រូវបានបែងចែកជាបីប្រភេទគឺទិញស្នើទិញនិងការដាក់ដេញថ្លៃ។
លេខសម្រាប់ដាក់លក់គឺជាលេខទាំងឡាយណាដែលមានចំនួនតួអក្សរ[A-Z] ឬលេខ[0-9] និងសញ្ញាចុច[.]ហើយត្រូវបានកំណត់តម្លៃដោយស្វ័យប្រវត្តិ ផ្អែកលើមូលដ្ឋានរូបមន្តប្រមាណ១២០០រូបមន្ត។
ការដេញថ្លៃត្រូវធ្វើឡើងតាមប្រព័ន្ធស្វ័យប្រវត្តិកម្មប្រព្រឹត្តទៅនៅក្នុងសាលឬតាមប្រព័ន្ធអនឡាញដែលមានអាស័យដ្ឋាន៖vehicle.mpwt.gov.khហើយអ្នកដេញថ្លៃដែលឱ្យថ្លៃខ្ពស់ជាងគេបំផុតជាម្ចាស់នៃលេខនោះ។ចំណែកឯការទូទាត់ប្រាក់ត្រូវធ្វើតាមប្រព័ន្ធស្វ័យប្រវត្តិកម្ម។
លោកទេសរដ្ឋមន្ត្រីស៊ុនចាន់ថុលបានថ្លែងថាស្លាកលេខពិសេសផ្ទាល់ខ្លួននេះមានតម្លៃចាប់ផ្តើមពី២លានរៀលឡើងទៅរហូតដល់១.០០០លានរៀលតែសម្រាប់ការដេញថ្លៃអាចនឹងមានតម្លៃច្រើនជាងនេះ។ ក្រៅពីការជ្រើសរើស និងកំណត់ឈ្មោះតាមការចង់បានហើយនោះស្លាកលេខពិសេសនេះ អាចរក្សាទុកពេញមួយជីវិតដោយគ្រាន់តែកាត់ឈ្មោះចេញនៅពេលលក់រថយន្តឬគេអាចលក់ស្លាកលេខពេលលក់ទាំងរថយន្តក៏បាន។
ប៉ុន្តែបើលក់រថយន្តចាស់ចេញទៅហើយគឺត្រូវយករថយន្តថ្មីទៅកិបលេខនេះផងដែរបើមិនយករថយន្តថ្មីទៅកិបលេខក្នុងរយៈពេល៣ខែស្លាកលេខរថយន្តនឹងធ្លាក់ចូលទៅក្នុងប្រព័ន្ធដាក់លក់វិញហើយ។
បើតាមលោករដ្ឋមន្ត្រីក្រសួងសាធារណការស្លាកលេខពិសេសនេះមិនអនុញ្ញាតឱ្យដាក់ពាក្យពេជ្រមួយចំនួនដូចជាពាក្យអាសអាភាសន៍ឈ្មោះប្រាសាទឈ្មោះថ្នាក់ដឹកនាំនិងស្ថាប័នធំៗដែលគេស្គាល់ច្រើនក៏មិនត្រូវបានអនុញ្ញាតឱ្យប្រើប្រាស់បាននោះទេ។ចំពោះប្រជាពលរដ្ឋដែលប្រើប្រាស់រថយន្តមានស្លាកលេខធម្មតាហើយ អាចប្តូរទៅប្រើស្លាកលេខពិសេសនេះបានផងដែរ ប្រសិនបើពួកគេចង់ប្តូរ។
លោករដ្ឋមន្ត្រីក្រសួងសាធារណការបានអះអាងថាការរៀបចំឱ្យមានស្លាកលេខរថយន្តពិសេស ដើម្បីចូលរួមស្វែងរកចំណូលពីការលក់ផ្លាកលេខជួយទ្រទ្រង់ដល់សេដ្ឋកិច្ចជាតិនិងពង្រឹងដល់ការគ្រប់គ្រងយានយន្តនៅកម្ពុជាផងដែរ៕សុផល
