ភ្នំពេញ៖សមត្ថកិច្ចចាប់បញ្ជូនជនសង្ស័យ២នាក់ពាក់ព័ន្ធករណីញុះញង់និងប្រមាថលើអង្គព្រះមហាក្សត្រទៅតុលាការរាជធានីភ្នំពេញដើម្បីបន្តនីតិវិធី។ លោកឧត្តមសេនីយ៍ត្រី សាន សុខសីហា អ្នកនាំពាក្យនគរបាលភ្នំពេញបានឱ្យដឹងថា បុរស២នាក់ដែលកម្លាំងឃាត់ខ្លួន កាលពីល្ងាចថ្ងៃទី២១ ខែមីនា នៅខណ្ឌពោធិ៍សែនជ័យ និងខណ្ឌដង្កោ។សមត្ថកិច្ចបានបញ្ជូនទៅតុលាការភ្នំពេញ នារសៀលថ្ងៃទី២២ ខែមីនានេះ ពាក់ព័ន្ធបទល្មើស ទី១-ញុះញង់និងទី២ ពីបទប្រមាថលើអង្គព្រះមហាក្សត្រ។សម្តេចតេជោ ហ៊ុន សែន បានថ្លែងថា មានការបង្ហោះព័ត៌មានមិនពិត លើបណ្ដាញសង្គម ដែលជាចេតនាដ៏អាក្រក់ប្រមាថព្រះចេស្ដាព្រះមហាក្សត្រ និងកិត្តិយសរបស់នាយករដ្ឋមន្ត្រី ។ក្នុងពេលព្រះអង្គយាងជាព្រះរាជអធិបតីដ៏វិសេសវិសាល ប្រោសព្រះរាជប្រទានព្រះអគ្គិកីឡា សម្រាប់ការប្រកួតកីឡាអាស៊ីអាគ្នេយ៍លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣ នៅប្រាសាទអង្គរវត្ត។សម្តេចតេជោ ហ៊ុន សែន បន្តថា ពេលនេះសមត្ថកិច្ចបានឃាត់ខ្លួនក្រុមប្រឆាំង២នាក់ ឈ្មោះហ៊ុន កុសលនិងយឹម ស៊ីណន កាលពីម្សិលមិញ ទាក់ទងនឹងការបង្ហោះសារប្រមាថលើព្រះចេស្ដា អង្គព្រះមហាក្សត្រ។ទន្ទឹមនោះ សម្តេចតេជោ ជំរុញដល់គ្រប់ទូរទស្សន៍ទាំងអស់ចាក់ផ្សាយឡើងវិញនូវ ព្រះរាជពិធីប្រោសព្រះរាជទានព្រះអគ្គិជ័យកីឡា និងពិធីរត់ភ្លើងគប់កីឡា សម្រាប់ព្រឹត្តិការណ៍ប្រកួតកីឡាអាស៊ីអាគ្នេយ៍លើកទី៣២ និងកីឡាអាស៊ានប៉ារ៉ាហ្គេមលើកទី១២ ឆ្នាំ២០២៣ កាលពីថ្ងៃទី២១ ខែមីនា ម្សិលមិញ ដើម្បីឱ្យពលរដ្ឋបានឃើញពីការគោរពប្រណិបត្តិរបស់សម្ដេចតេជោ ចំពោះអង្គព្រះមហាក្សត្រ៕
Related Articles
មិនតម្រូវឱ្យយកភាស៊ីពីការលក់ដូរតិចតួច តាមកញ្ច្រែង-ល្អី-កញ្ជើនិងចល័ត
ភ្នំពេញ៖រដ្ឋបាលរាជធានីភ្នំពេញ កាលពីថ្ងៃទី៣១ ខែតុលាឆ្នាំ២០២៣ បានចេញសេចក្ដីណែនាំស្តីពីការមិនឱ្យយកភាស៊ី និងបង់ថ្លៃផ្សេងៗ ចំពោះអ្នកលក់ដូរតាមកញ្ច្រែង-កញ្ជើ-ល្អី និងលក់ដូរចល័តគ្រប់ប្រភេទ។ តាមសេចក្តីណែនាំបានបញ្ជាក់ថា កន្លងមកដោយមានការយកចិត្តទុកដាក់ ពីជីវភាពរស់នៅប្រជាពលរដ្ឋ នៃរាជរដ្ឋាភិបាលអាណត្តិទី៦ ក្រោមការដឹកនាំរបស់ សម្តេចតេជោ ហ៊ុន សែន បានដាក់ចេញសារាចរចុះថ្ងៃទី៩ ខែធ្នូឆ្នាំ២០១៦។សារាចរបានសម្រេចលុបការបង់ភាស៊ី និងបង់ថ្លៃផ្សេងៗទៀត ចំពោះពលរដ្ឋលក់ដូរតាមកញ្ច្រែង-កញ្ជើ-ល្អី-និងចល័តគ្រប់ប្រភេទនៅទីកន្លែងលក់ដូរ និងទីផ្សារទូទាំងប្រទេស។ជាមួយនេះកាលពីថ្ងៃទី៣ ខែតុលាឆ្នាំ២០២៣ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានដាក់បទបញ្ជាឱ្យអនុវត្តនូវសារាចរណែនាំខាងលើ ឱ្យបានម៉ឺងម៉ាត់បំផុត នាឱកាសសម្តេចជួបសំណេះសំណាលជាមួយកម្មករ-កម្មការិនីនៅភ្នំពេញ។ បទបញ្ជានេះដើម្បីពង្រឹង និងចៀសវាងជនខិលខូចមួយចំនួនឆ្លៀតឱកាស ដើរប្រមូលថវិកាក្រោមរូបភាពប្រមូលភាស៊ី ពីអ្នកលក់ដូរតាមកញ្ច្រែង-កញ្ជើ-ល្អី និងការលក់ដូរចល័តពីអាជីវករ។ រដ្ឋបាលរាជធានីភ្នំពេញ បានណែនាំដល់រដ្ឋបាលខណ្ឌ-សង្កាត់-គណៈកម្មការផ្សារ-ក្រុមហ៊ុនវិនិយោគធ្វើអាជីវកម្មភាស៊ី និងអាជីវកម្មប្រមូលចំណូលអនាម័យ ព្រមទាំងភាគីពាក់ព័ន្ធទាំងអស់។ ត្រូវពង្រឹងប្រកបដោយស្មារតីទទួលខុសត្រូវខ្ពស់ក្នុងការអនុវត្ត សារាចរនៃរាជរដ្ឋាភិបាល ស្ដីពីការលុបការបង់ថ្លៃចំពោះពលរដ្ឋលក់ដូរតាមកញ្ច្រែង-កញ្ជើ-ល្អីនិងចល័តឱ្យមានប្រសិទ្ធភាព។ សេចក្តីណែនាំដដែលបានបញ្ជាក់ថា ក្នុងករណីមានអ្នកទាមទារ ឬបង្ខិតបង្ខំឱ្យបង់ភាស៊ី ឬបង់ថ្លៃផ្សេងៗតាមគ្រប់រូបភាព អាជីវករទាំងឡាយអាចរាយការណ៍ ជាបន្ទាន់មកអាជ្ញាធរមានសមត្ថកិច្ចនៅជិតបំផុតឬ Hotline 1299 ដើម្បីចាត់វិធានការរដ្ឋបាល និងវិធានការច្បាប់ចំពោះជនបង្កបានទាន់ពេលវេលា៕
ឆេះក្លិបកម្សាន្តមួយក្នុងក្រុងព្រះសីហនុធ្វើឱ្យស្លាប់២នាក់រងរបួស៣នាក់
ខេត្តព្រះសីហនុ៖អគ្គិភ័យបានឆាបឆេះក្លិបកម្សាន្តមួយក្នុងក្រុងព្រះសីហនុបណ្តាលឱ្យមនុស្ស២នាក់បានស្លាប់និងរងរបួស៣នាក់នៅម្តុំឧតុនិយមក្នុងក្រុងព្រះសីហនុ។ហេតុការណ៍នេះបានកើតឡើងនៅក្លិបកម្សាន្តមួយយីហោ Julie & Anna Tokyo ក្នុងភូមិ៣ សង្កាត់៣ ក្រុងព្រះសីហនុ ខេត្តព្រះសីហនុកាលពីយប់ថ្ងៃទី៣០ ខែមករា។លោកឧត្តមសេនីយ៍ទោ ជួន ណារិន្ ស្នងការនគរបាលខេត្តព្រះសីហនុបានឱ្យបណ្តាញសារព័ត៌មានដឹងថា អគ្គិភ័យនេះបណ្តាលមកពីជាងផ្សារដែកក្នុងក្លិបពេលកំពុងផ្សារក៏ឆាបឆេះតែម្តង។ភ្លាមៗត្រូវបានកម្លាំងសមត្ថកិច្ចនិងមន្ត្រីអាជ្ញាធរបានចុះទៅអន្តរាគមន៍បាញ់ទឹកពន្លត់មិនឱ្យឆេះរាលដាល។សមត្ថកិច្ចបានបញ្ជូនជនរងគ្រោះ៥នាក់ទៅមន្ទីរពេទ្យប៉ុន្តែដោយបញ្ហារបួសធ្ងន់ធ្ងរជនរងគ្រោះក៏បានស្លាប់២នាក់។អ្នករងរបួសចំនួន៣នាក់ស្លាប់២នាក់នោះឈ្មោះ ហ៊ន ស្រីវ៉េត ភេទស្រី អាយុ១៨ឆ្នាំបានស្លាប់។ឈ្មោះភនមករា ភេទប្រុស អាយុ ២២ឆ្នាំបានស្លាប់។ពួកគេរងគ្រោះដោយសារឈ្លក់ផ្សែងភ្លើង។អ្នករងបួសឈ្មោះណនរតនៈ អាយុ២០ឆ្នាំ-ឈ្មោះប្រាក់សារ៉ូ ភេទស្រី អាយុ ៣៤ឆ្នាំជាបុគ្គលិកនិងឈ្មោះ វង្សសារុំ ភេទស្រី អាយុ២៣ឆ្នាំជាបុគ្គលិកក្លិប។ជនរងគ្រោះស្នាក់នៅភូមិ៥សង្កាត់លេខ៤ ក្រុង/ខេត្តព្រះសីហនុ។ចំណែកម្ចាស់ក្លិបឈ្មោះហុងសេងអាយុ ៣៣ឆ្នាំ។គ្រោះអគ្គិភ័យនោះបង្កការខូចខាតក្លិបនិងសម្ភារត្រូវភ្លើងឆេះអស់ទាំងស្រុង៕
អ្នកចម្រៀងបើករថយន្តទំនើបបុកថ្មគល់ស្ពានអាកាសខ្ទេចផ្នែកខាងមុខ
ភ្នំពេញ៖អ្នកចម្រៀងជើងចាស់ដ៏ល្បីម្នាក់ បានបើករថយន្តម៉ាកLexusRX330 យ៉ាងលឿនទៅបុករបាំងថ្មគល់ស្ពានអាកាសក្បាលថ្នល់ ធ្វើឱ្យរថយន្តខួចខ្ទេចខាងមុខទាំងស្រុង។គ្រោះថ្នាក់ចរាចរណ៍នេះបានកើតឡើងនៅមហាវិថីព្រះនរោត្តម ស្ថិតក្នុងសង្កាត់ទន្លេបាសាក់ ខណ្ឌចម្ការមន កាលពីរំលងអធ្រាត្រចូលថ្ងៃទី២ ខែមីនា។អ្នកឃើញហេតុការណ៍បានឱ្យដឹងថា ដំបូងគេឃើញរថយន្តម៉ាក Lexus RX330 ផ្លាកលេខភ្នំពេញ 2BF-7616 បើកបរដោយអ្នកចម្រៀងជើងចាស់ម្នាក់ឈ្មោះ ណយ វណ្ណា តាមមហាវិថីព្រះនរោត្តមពីជើងទៅត្បូងក្នុងល្បឿនលឿន។មកដល់កន្លែងខាងលើរថយន្តបានរេចង្កូតបុករបាំងថ្មគល់ស្ពានអាកាសក្បាលថ្នល់ ពេញទំហឹង បណ្ដាលឱ្យរថយន្តខូចខ្ទេចមួយកំណត់មុខ។តែមិនមានគ្រោះថ្នាក់ដល់មនុស្សទេ។ បន្ទាប់ពីជួបគ្រោះថ្នាក់លោកពូ ណយ វណ្ណាត្រូវបានក្រុមគ្រួសារដឹកយកចេញពីកន្លែងកើតហេតុ។ចំណែករថយន្តត្រូវសមត្ថកិច្ចយកទៅទុកនៅកន្លែងនគរបាលចរាចរណ៍រាជធានីភ្នំពេញដើម្បីដោះស្រាយពេលក្រោយ៕