ភ្នំពេញ៖ករណីគ្រោះថ្នាក់ពីការផ្ទុះធុងហ្គាស បង្កជាអគ្គិភ័យបានឆាបឆេះបុរសម្នាក់បណ្តាលឱ្យស្លាប់ក្នុងភ្នក់ភ្លើងយ៉ាងអណោចអធ័ម។ហេតុការណ៍ដ៏រន្ធត់នោះ បានកើតឡើងនៅក្នុងបុរីហាយលែន ភូមិទ្រង់មាន់ សង្កាត់អូរបែកក្អម ខណ្ឌសែនសុខ កាលពីថ្ងៃទី១៨ ខែសីហាឆ្នាំ២០២៣។មន្ត្រីអគ្គស្នងការដ្ឋាននគរបាលជាតិបានឱ្យដឹងថា បុរសរងគ្រោះបាត់បង់ជីវិតឈ្មោះ GUAN PENGZHI អាយុ៣៥ឆ្នាំជនជាតិចិន។ បន្ទាប់ពីទទួលព័ត៌មានករណីផ្ទុះធុងហ្គាសមានស្លាប់មនុស្សភ្លាម កម្លាំងជំនាញបង្ការពន្លត់អគ្គិភ័យនិងសង្គ្រោះ នៃស្នងការដ្ឋាននគរបាលរាជធានីភ្នំពេញ-នគរបាលខណ្ឌសែនសុខ និងនគរបាលប៉ុស្តិ៍រដ្ឋបាលបានចុះដល់ទីតាំងកើតហេតុ។ជាមួយនោះមានរថយន្តពន្លត់អគ្គិភ័យជួយអន្តរាគមន៍បាញ់ទឹក ការពារមិនឱ្យឆេះរាលដាលបន្ត។គ្រោះអគ្គិភ័យនោះបណ្តាលឱ្យឆេះខូចខាតសម្ភារមួយចំនួននិងស្លាប់មនុស្សម្នាក់។ក្រោយកើតហេតុសមត្ថកិច្ចផ្នែកកោសល្យវិច័យរាជធានីភ្នំពេញ បានចុះពិនិត្យសពដោយបានបញ្ជាក់ថា ជនរងគ្រោះពិតជាស្លាប់ដោយការផ្ទុះធុងហ្គាស ហើយប្រគល់សពឱ្យក្រុមគ្រួសារយកទៅធ្វើបុណ្យ៕
Related Articles
ដាក់គុក២នាក់បងប្អូនម្នាក់ៗពី៥-៦ឆ្នាំពីបទប្រើលុយ$១០ម៉ឺនយកសូកប៉ាន់
ភ្នំពេញ៖តុលាការភ្នំពេញនៅថ្ងៃទី១១ ខែតុលានេះបានផ្តន្ទាទោស២នាក់បងប្អូនបង្កើតដាក់ពន្ធនាគារក្នុងម្នាក់ៗពី៥ទៅ៦ឆ្នាំពីបទយកលុយ១០ម៉ឺនដុល្លារសូកប៉ាន់ជាថ្នូរការដោះលែងជនល្មើសគ្រឿងញៀន។មន្ត្រីតុលាការបានឱ្យដឹងថា ជនជាប់ចោទទាំង២នាក់នេះ ត្រូវជាបងប្អូនបង្កើតដែលម្នាក់ ឈ្មោះប៉ុន ចិត្រា អាយុ៣៦ឆ្នាំស្ថិតនៅក្នុងឃុំត្រូវជាប់ពន្ធនាគារ៦ឆ្នាំក្រោមការចោទប្រកាន់ពីបទ«ផ្តើមគំនិតក្នុងអំពើសូកប៉ាន់» តាមបញត្តិមាត្រា២៨មាត្រា៦០៥នៃក្រមព្រហ្មទណ្ឌ និងមាត្រា៣២ ច្បាប់ស្តីពីប្រឆាំងអំពើរពុករលួយ។ ចំណែកឈ្មោះ ប៉ុន រ៉ានី ភេទស្រី អាយុ៤៩ឆ្នាំវិញស្ថិតនៅក្រៅឃុំ ត្រូវជាប់ពន្ធនាគារ៥ឆ្នាំ។ប៉ុន្តែការអនុវត្តត្រូវព្យួទោសទាំងអស់ដោយជាប់ចោទពីបទ «សូកប៉ាន់» តាមបញ្ញត្តិមាត្រា ៦០៥នៃក្រមព្រហ្មទណ្ឌនិង មាត្រា៣២ ច្បាប់ស្តីប្រឆាំងអំពើ ពុករលួយ។តុលាការក៏បាន សម្រេចរឹបអូសយក វត្ថុតាងជាលុយសំណូកចំនួន១០ម៉ឺនដុល្លារ នោះទុកជាទ្រព្យសម្បត្តិរដ្ឋ៕
ប្រជុំបែងចែកការងារដល់ក្រុមការងាររាជរដ្ឋាភិបាលមូលដ្ឋានស្រុកកោះសូទិន
ភ្នំពេញ៖ឯកឧត្តមខៀវកាញារីទ្ធរដ្ឋមន្ត្រីក្រសួងព័ត៌មានអនុប្រធានក្រុមការងាររាជរដ្ឋាភិបាលមូលដ្ឋានខេត្តកំពង់ចាមនិងជាប្រធានក្រុមការងារថ្នាក់ជាតិមូលដ្ឋានស្រុកកោះសូទិន។ ឯកឧត្តមបានអញ្ជើញដឹកនាំកិច្ចប្រជុំបែងចែកការងារថ្នាក់មូលដ្ឋានជូនដល់ថ្នាក់ដឹកនាំក្រសួងព័ត៌មាននៃក្រុមការងាររាជរដ្ឋាភិបាលចុះមូលដ្ឋានស្រុកកោះសូទិនខេត្តកំពង់ចាមកាលពីព្រឹកថ្ងៃទី៧ខែមីនាឆ្នាំ២០២០នៅភ្នំពេញ៕វេបសាយៈក្រសួងព័ត៌មាន
សត្វទន្សោងឈ្មោលមួយក្បាលបានងាប់ក្នុងព្រៃសហគមន៍សង្ឃរុក្ខវ័ន្ត
ភ្នំពេញ៖សត្វទន្សោងឈ្មោលមួយក្បាលបានងាប់នៅក្នុងព្រៃសហគមន៍សង្ឃរុក្ខវ័ន្តនៅក្នុងដែនជម្រកសត្វព្រៃសង្ឃរុក្ខវ័នខេត្តឧត្តរមានជ័យកាលពីល្ងាចថ្ងៃទី២៤ខែឧសភាឆ្នាំ២០២០ដោយសារតែស្ថានភាពសុខភាពចុះខ្សោយខ្លាំងនិងរបួសធ្ងន់ដោយសារតែជាប់អន្ទាក់របស់ព្រានជាយូរថ្ងៃមកហើយ។ ទោះបីជាក្រុមជំនាញបសុសត្វនិងមន្ត្រីពាក់ព័ន្ធខិតខំព្យាយាមសង្គ្រោះយ៉ាងយកចិត្តទុកដាក់យ៉ាងណាក៏ដោយ។នេះគឺជាការថ្លែងឱ្យដឹងរបស់លោកនេត្រភក្ត្រារដ្ឋលេខាធិការនិងជាមន្ត្រីនាំពាក្យក្រសួងបរិស្ថានកាលពីល្ងាចថ្ងៃទី២៤ ខែឧសភា ឆ្នាំ ២០២០។ លោកបានថ្លែងថាសត្វទន្សោងដែលជាប់អន្ទាក់ព្រានព្រៃនោះត្រូវបានប្រទះឃើញនៅក្នុងភូមិសាស្ត្រចំណុចអូរថ្មក្នុងព្រៃសហគមន៍សង្ឃរុក្ខាវ័នស្ថិតក្នុងដែនជម្រកសត្វព្រៃសង្ឃរុក្ខវ័ននិងបានទទួលការសង្គ្រោះបឋមមុននឹងសត្វទន្សោងនេះបានងាប់។សពសត្វទន្សោងនេះត្រូវបានមន្ត្រីឧទ្យានុរក្សនិងសហគមន៍ព្រៃសង្ឃរុក្ខវ័នដឹកនាំដោយព្រះអង្គប៊ុនសាលួតបញ្ចុះនៅស្នាក់ការកណ្តាលរបស់ព្រះអង្គ៕