ភ្នំពេញ៖កម្លាំងនគរបាលបានចាប់ មន្ត្រីក្រសួងសេដ្ឋកិច្ចនិងហិរញ្ញវត្ថុម្នាក់ ករណីបើករថយន្តម៉ាក Ford Ranger បុករះរថយន្ត២គ្រឿងនិងម៉ូតូ៤គ្រឿង បណ្តាលឱ្យស្លាប់៤នាក់ រងរបួសធ្ងន់២នាក់។គ្រោះថ្នាក់ចរាចរណ៍ដ៏រន្ធត់នេះ បានកើតឡើងនៅម្តុំស្តុបស្ពានឫស្សីកែវ ផ្លូវជាតិលេខ៥ ភូមិមិត្តភាព សង្កាត់ឫស្សីកែវ ខណ្ឌឫស្សីកែវ កាលពីយប់ថ្ងៃទី២០ ខែមករា។មន្ត្រីនគរបាលរាជធានីភ្នំពេញបានឱ្យដឹង នៅព្រឹកថ្ងៃទី២១ខែមករានេះថា កម្លាំងនគរបាលជំនាញ បានឃាត់ខ្លួនអ្នកបើករថយន្តម៉ាក Ford Ranger ដែលបង្កគ្រោះថ្នាក់ចរាចរណ៍ បណ្ដាលឱ្យមនុស្សស្លាប់៤នាក់ និងរងរបួសធ្ងន់២នាក់ យកចាត់ការតាមនីតិវិធី។មន្ត្រីដដែលបានបន្តថា មុនកើតហេតុរថយន្តម៉ាក Ford Ranger ពណ៌ស ផ្លាកលេខ ភ្នំពេញ 2AZ-5854 បើកបរដោយបុរសឈ្មោះ នាង សំអូន ជាមន្ត្រីក្រសួងសេដ្ឋកិច្ច និងហិរញ្ញវត្ថុ ទីលំនៅផ្ទះលេខ៤០A ផ្លូវលេខ២១០ ភូមិ៤ សង្កាត់ច្រាំងចំរេះ១ ខណ្ឌឫស្សីកែវ។ សមត្ថកិច្ចបានឱ្យដឹងទៀតថា រថយន្តបានបើកយ៉ាងលឿន ក៏បុករះរថយន្ត២គ្រឿងម៉ាក Lexus NX២០០T, និងម៉ាក Toyota Vitz។ម៉ូតូ៤គ្រឿងម៉ាក Honda Click,ម៉ាក Honda Beat, ម៉ាក Honda Dream,និងម៉ាក Honda Scoopy បណ្តាលឱ្យមនុស្សស្លាប់ស្រី៣នាក់និងប្រុសម្នាក់នៅកន្លែងកើត និងស្រីរងរបួសធ្ងន់២នាក់ ត្រូវបានបញ្ជូនទៅសង្គ្រោះនៅមន្ទីរពេទ្យកាល់ម៉ែតភ្លាមៗ។បន្ទាប់ពីបង្កគ្រោះថ្នាក់សមត្ថកិច្ចបានឃាត់ខ្លួនអ្នកបើកបរស្ថិតក្នុងស្ថានភាពស្រវឹង កម្រិតជាតិអាកុល ០.៥៤។ក្រោយពីឃាត់ខ្លួនផ្នែកជំនាញបាននាំទាំងរថយន្ត និងមធ្យោយបាយរងគ្រោះ ទៅកន្លែងនគរបាលចរាចរណ៍រាជធានីភ្នំពេញ ដើម្បីអនុវត្តតាមច្បាប់៕ IMG_4113