មណ្ឌលគិរី៖គ្រោះថ្នាក់ចរាចរមួយដោយរថយន្តដឹកអ្នកដំណើរពីរជាន់របស់ក្រុមហ៊ុនវិរៈប៊ុនថាំងបានក្រឡាប់ខ្លួនឯងបណ្តាលឱ្យមានអ្នករបួសក្មេងចាស់ចំនួន១២នាក់។ហេតុការណ៍នេះបានកើតឡើងនៅចំណុចស្ពានទី២សង្កាត់រមនាក្រុងសែនមនោរម្យខេត្តមណ្ឌលគិរីកាលពីវេលាទាបភ្លឺថ្ងៃទី៥ខែមេសា២០២០។
សមត្ថកិច្ចបានឱ្យដឹងថានៅវេលាម៉ោង៤និង១៥នាទីទាបភ្លឺថ្ងៃទី៥ខែមេសា២០២០នេះមានរថយន្តដឹកអ្នកដំណើរពីរជាន់របស់ក្រុមហ៊ុនវិរៈប៊ុនថាំងចេញដំណើរពីភ្នំពេញទៅខេត្តរតនៈគិរី។លុះមកដល់ចំណតក្រុមហ៊ុននៅខេត្តមណ្ឌលគិរីបានឈប់ដាក់អ្នកដំណើរ ហើយបន្តហួសទៅខេត្តរតនៈគិរី ។
សមត្ថកិច្ចបញ្ជាក់ថាក្រោយពិនិត្យទីតាំងនិងសាកសួរព័ត៌មានលម្អិតមូលហេតុគឺបណ្តាលមកពីអ្នកបើកបរបើកក្នុងល្បឿនលឿនជាមួយនិងស្ថានភាពផ្លូវចុះចំណោតកោង។មានស្ពាននៅខាងមុខទៀតក៏ជ្រុលចង្លូតធ្លាក់ផ្លូវតែម្តង។ក្រោយកើតហេតុអ្នកបើកបរបានរត់គេចខ្លួនដោយបន្សល់ទុកអ្នករបួសរដូករណែល។សមត្ថកិច្ចបានបញ្ជូនអ្នករបួសតាមរថយន្តសាម៉ុយយកទៅសង្គ្រោះនៅមន្ទីរពេទ្យ៕ចាន់បុត្រ