សៀមរាប៖អាជ្ញាធរខេត្តសៀមរាបព្រឹកថ្ងៃទី២ ខែកញ្ញានេះបានឃាត់ស្ត្រី៦នាក់តំណាងគណបក្សសម្ព័ន្ធដើម្បីប្រជាធិបតេយ្យ LDP ពីបទប្រឆាំងអ្នករាជការសាធារណៈនិងត្រៀមបញ្ជូនទៅតុលាការ។
លោកវរសេនីយ៍ទោ សុខម៉េងអ៊ាង ប្រធានការិយាល័យនគរបាលព្រហ្មទណ្ឌកម្រិតធ្ងន់ ខេត្តសៀមរាបបានឱ្យប្រព័ន្ធផ្សព្វផ្សាយក្នុងស្រុកដឹងនៅព្រឹកថ្ងៃទី២ ខែកញ្ញានេះថា មនុស្ស៦នាក់ដែលជាតំណាងគណបក្សសម្ព័ន្ធដើម្បីប្រជាធិបតេយ្យ LDPរបស់លោក ខឹម វាសនា ត្រូវបាន សមត្ថកិច្ចឃាត់ខ្លួន។
លោកបន្តថា ការឃាត់ខ្លួនបន្ទាប់ពីពួកគាត់បានបំពានកិច្ចសន្យា និងធ្វើសកម្មភាពប្រឆាំងអ្នករាជការសាធារណៈ ដោយមិនស្ដាប់តាមការណែនាំ និងមានការបង្ខាំងមនុស្សមិនឱ្យចាកចេញពីចម្ការលោក ខឹម វាសនា ដែលស្ថិតនៅជើងភ្នំគូលែន ស្រុកបន្ទាយស្រី ខេត្តសៀមរាប។
ផ្តើមពីការឃាត់ខ្លួនមនុស្សទាំង៦នាក់នោះបានចាកចេញពីដីចម្ការរួចហើយស្រាប់តែព្យាយាមចូលទៅវិញត្រូវអាជ្ញាធរមិនឱ្យចូល ក៏ធ្វើសកម្មភាពជេរប្រមាថមកលើសមត្ថកិច្ចតែម្តង។ បច្ចុប្បន្នជំនាញកំពុងកសាងសំណុំរឿងបញ្ជូនស្ត្រី៦រូបនេះទៅតុលាការពីបទ“ប្រឆាំងអ្នករាជការសាធារណៈនិងបទញុះញង់ឱ្យប្រព្រឹត្តអំពើប្រឆាំងនឹងអ្នករាជការសាធារណៈ” ៕
