កូរ៉េខាងជើងបានបាញ់បង្ហោះមីស៊ីលពីនាវាមុជទឹកថ្មីរបស់ខ្លួន

អន្តរជាតិ៖កូរ៉េខាងជើងបានចាប់ផ្តើមប្រតិបត្តិការលើកដំបូងរបស់ខ្លួន“នាវាមុជទឹកវាយប្រហារនុយក្លេអ៊ែរយុទ្ធសាស្ត្រ” ដែលជាផ្នែកសំខាន់នៃផែនការរបស់មេដឹកនាំគីម ជុងអ៊ុន ដើម្បីបង្កើតកងនាវាចរដែលបំពាក់អាវុធនុយក្លេអ៊ែរ ប្រឆាំងសហរដ្ឋអាមេរិកនិងសម្ព័ន្ធមិត្ត។នាវាមុជទឹកNo 841–មានឈ្មោះ Hero Kim Kun Ok បន្ទាប់ពីឥស្សរជនប្រវត្តិសាស្ត្រកូរ៉េខាងជើងដ៏លេចធ្លោមួយរូប ត្រូវបានបាញ់បង្ហោះកាលពីថ្ងៃពុធ ដោយមានលោក Kim ជាអ្នកមើលការខុសត្រូវលើព្រឹត្តិការណ៍នេះ។នេះបើយោងតាមទីភ្នាក់ងារសារព័ត៌មានកណ្តាលកូរ៉េ KCNA។

មន្ត្រីKCNAបាននិយាយថា នាវាមុជទឹកត្រូវបានរចនាឡើងដើម្បីបាញ់អាវុធនុយក្លេអ៊ែរយុទ្ធសាស្ត្រពីក្រោមទឹក ហើយបានប្រកាសពីការចាប់ផ្តើមនៃជំពូកថ្មីសម្រាប់កងទ័ពជើងទឹកកូរ៉េខាងជើង។ប៉ុន្តែមិនបានបញ្ជាក់ពីចំនួនកាំជ្រួចដែលកប៉ាល់អាចបាញ់បាននោះទេ។

នាវាមុជទឹក Kim Kun Ok ដែលនឹងត្រូវដាក់ពង្រាយទៅដែនទឹករវាងឧបទ្វីបកូរ៉េ និងជប៉ុន នឹងបំពេញបេសកកម្មប្រយុទ្ធរបស់ខ្លួនជា “មធ្យោបាយវាយលុកក្រោមទឹកស្នូលមួយនៃកម្លាំងទ័ពជើងទឹក” របស់ប្រទេសកូរ៉េខាងជើង។ដោយផែនការរបស់ប្រទេសនេះ ដើម្បីប្រែក្លាយនាវាមុជទឹកដែលមានស្រាប់របស់ខ្លួនទៅជានាវាមុជទឹកវាយប្រហារដោយអាវុធនុយក្លេអ៊ែរ និងពន្លឿនការជំរុញរបស់ខ្លួនក្នុងការអភិវឌ្ឍនាវាមុជទឹកដើរដោយថាមពលនុយក្លេអ៊ែរ។

គួរជម្រាបថា កូរ៉េខាងជើងបានធ្វើតេស្តអាវុធជាបន្តបន្ទាប់ក្នុងរយៈពេលប៉ុន្មានឆ្នាំចុងក្រោយនេះ រួមទាំងអ្វីដែលខ្លួនបាននិយាយថា ជា”ប្រភេទថ្មី”នៃមីស៊ីលផ្លោងបាញ់ពីនាវាមុជទឹក។ ខណៈដែលលោក Kim បង្កើនកិច្ចខិតខំប្រឹងប្រែងរបស់គាត់ដើម្បីធ្វើទំនើបកម្មយោធារបស់ប្រទេស។ប្រទេសនេះត្រូវបានហាមប្រាមមិនឱ្យសាកល្បងកាំជ្រួច មីស៊ីល បាលីស្ទីក ក្រោមការដាក់ទណ្ឌកម្មនៃអង្គការ សហប្រជាជាតិជាយូរមកហើយ៕សហការី